Read ninzo Matiyu 1 Bible Online

Matiyu 1 - ninzo bible

Matiyu 1

¹Uwanggo yo a si are ka uga ku Yesu Kristi ka. Yesu à zhi nu uki ku uttu Doda, u Doda a zhi nu uki ku Ibrayi. Uwanggo yo a si asa a ábáchí ma wa.

²Ibrayi à si aki a Ishaku. Ishaku à si aki a Yakubu. Yakubu à si aki a Yahuda na amuyirr ba.

³Yahuda à si aki a Perrezi tuku Zerra, (Ayirr ambarr wa à si Tama). Perrezi à si aki a Hezroni. Hezroni à si aki a Ramu.

⁴Ramu à si aki a Aminada. Aminada à si aki a Nashoni. Nashoni à si aki a Salimo.

⁵Salimo à si aki a Bowazi. (Ayirr ama wa yo à si Raha). Bowazi à si aki a Obedi. (Ayirr ama wa yo à si Rutu.) Obedi à si aki a Jesi.

⁶Jesi à si aki a Doda. Doda à si aki a Solomo. (Ayirr ama wa yo à si Basheba, ayamba a Urriya.)

⁷Solomo à si aki a Rehobowa. Rehobowa à si aki a Abija. Abija à si aki a Asa.

⁸Asa à si aki a Jehoshafa. Jehoshafa à si aki a Jehorramu. Jehorramu à si aki a Uziya.

⁹Uziya à si aki a Jotamu. Jotamu à si aki a Ahazi. Ahazi à si aki a Hezekiya.

¹⁰Hezekiya à si aki a Manase. Manase à si aki a Amoni[1]. Amoni à si aki a Josiya.

¹¹Josiya à si aki a Jekoniya na amuyirr ba. (Na ase ka nggo a vɨ anu Israila ba igarr yi na ko nu Babilo.)

¹²Nu ugo ku igarr ku nu Babilo: Jekoniya à si aki a Sheyalitiye. Sheyalitiye à si aki a Zerrubabe.

¹³Zerrubabe à si aki a Abiyudu. Abiyudu à si aki a Eliyaki. Eliyaki à si aki a Azorr.

¹⁴Azorr à si aki a Zado. Zado à si aki a Akimu. Akimu à si aki a Eliyudu.

¹⁵Eliyudu à si aki a Eliyaza. Eliyaza à si aki a Matani. Matani à si aki a Yakubu.

¹⁶Yakubu à si aki a Isuhu. Isuhu yo à si unuru a Maryamu wa. Maryamu à si ayirr Yesu wa. A yo Yesu yo di Kristi.

¹⁷Meme nggo, bazhi ni Ibrayi ku, kuma nu uttu Doda ku à si uka uwurr nu une̱. Na bazhi nu uttu Doda ku ko nu nggo a vɨ anu Israila ba na kuma nu Babilo a si uka uwurr nu une̱, na bazhi nu nggo anu Israila ba a kazhi nu Babilo nga ni ingri i Kristi[2] yi, a si uka uwurr nu une̱.

¹⁸Ingri i Yesu Kristi inggi i si ma mi: Ayirr a Yesu wa à si Maryamu. A go ma zu ku ugo numa à ri Isuhu. Nggo Isuhu à nise gri ma nga ni iko ima, aba a gru kakye Maryamu à se ni ine. À si Izhi i Abachi iyo ì na ukyekye ukuma.

¹⁹Isuhu uruma wa, a si ni ikru isisu i Abachi ni isisurr ima, na kye ì si ta wre uwa bu ba Maryamu nggarr la na azhi hen, mre na ssu anko du uwa ta kà ma du, du anishirr si hi hen.

²⁰Nggo Isuhu à ni so ri amarr akama meme, unitu a Atiko wa à nga na ku nu uzhila, ni da ku di, “Isuhu, uhanma a Doda, si kru isisu i ba Maryamu ki uwami hen. Kye, uvuvurr wa nggo à se ni ine ima yi nggo à zhi ni Izhi i Abachi. Si kà ma du hen.

²¹À ta ngri uvuvurr unuru. Nggo a ti ngri uvuvurr wa, uwa bu yo ma di Yesu. Kye, uwa yo à taka ni kpa anishirr ama ba ttungo ni ila ure imbarr yi.”

²²Ziza, inkindirr inggi yi i ta si meme, wre ku ure ku u bu kurr meme yo nggo Atiko à du Abi kpa are ama ba a nga ni da ku zu ni ikuchi yi nggo.

²³“Kye, uva wanggo nggo à nise hi unuru kye à ta hru ine na ta ngri uvuvurr unuru, aba ta yo isa ima yi di Imanuwe,” inkpi i isa ima inggi ì si, “Abachi à se ni inta ba.”

²⁴Isuhu à kasi ni ina yi nggo, na na inkindirr yi nggo unitu a Atiko wa à da ku nggo. Na gru ku gri Maryamu na nga ni iko ima ki uwama.

²⁵Bazhi nu nggo a di to ikpa yi nga ni ingri i uzuma yi, Isuhu à nise hi ma ki ayamba kye. Uwa à ni ngri nggo, Isuhu à yo uvuvurr wa di Yesu.