Read ninzo Ibwu Tsarr 12 Bible Online

Ibwu Tsarr 12 - ninzo bible

Ibwu Tsarr 12

¹A hi inkindirr i ku ayisurr inuma nu unkplassu. Ayamba à surr azhi a la wa ki ankru, uhwa ku u se ku na aza, na turr anzɨ ittu ni itu nggo a na wa ni intsintse̱ iwurr ni iha.

²Ayamba wa à ki ywhiywhirr ingri, na so yì ine yi kakami.

³Inkindirr inuma i nggurr ssuzzu nu ussu. Kye, ìwǎ drago[10] ususarr unkpi ku a se na atu atangba, injinju iwurr, na hru anzɨ tangba na atu ama wa wemi.

⁴A ki azzuzzu ama wa a gba anga ayirr na anga atarr ka intsintse̱ yi zhi nu ussu ku ji nga ni imimi. Ìwǎ drago wa à kri na so kye, wre ku ayamba wa à ti ngri, uwa à ta ba uvuvurr wa ttumri.

⁵Ayamba wa à ngri uvuvurr unuru, nggo à taka gri ingbingbru anishirr yi we na anjingba ka ittu. Aba narr uvuvurr wa glo ma, a ba ma gri ku Abachi ku sa ni ittu ima yi.

⁶Ayamba wa à kru rri na ankpuji. À kru kuma na abubo wa nggo Abachi à ssu wa bi ku nggo. A ta di ssu ma gri ki ivi ukrɨ uyirr na ayiyirr aha ni so tani (1,260).

⁷Iku i gru nu unkplassu. Makyarr[11] na abitu ama ba à tsi ni ìwǎ drago wa ku. Ìwǎ drago wa mi à gri abitu ama ba na tsi.

⁸Nu nggo a ri ìwǎ drago wa ni iku yi nu unkplassu. Ima yo du ba a han ma na abitu ama ba nu unkplassu.

⁹Aba han ìwǎ drago unkpi wa ji nga ni imimi. Uwa yo à su uchuche ìwǎ ku nggo ri Umimi ka Isheta, nggo à re ingbingbru yi wemi nggo. A ta ma na abitu ama ba we ji nga ni ingbingbru yi.

¹⁰Ingga gru wo ukorr hantu zhi nu unkplassu u da di: “Ziza nggo inta hi ikpa ttungo nu ukyekye, ni ittu i Abachi amunta wa tuku ukyekye ku Kristi ama wa. Kye uni kri angbachi na amuya abiga ba ba, nggo uwa yo à kri di glo amuya amunta ba na age̱ ka Abachi na azhi ni ibittu, a ta ma ji nga ni ingbingbru yi.

¹¹Aba a kpa ma ka na ayiyi a Uvuvurr Inkru wa tuku ure ujiji ku Abachi ku na kri ngbangba du ure ku Abachi ku u su ujiji. Na a kpanye da aba a ta ni atu ambarr wa na kɨ.

¹²Uwa a si ni ima yo, imba unkplassu ku, ni imba nggo i so na ku nggo, imba bu nyarr! Uwa ta si ingbingbru yi tuku amasirr ka nanko, uje umba, nu nggo Isheta à ka ji nga ni imba ba ba, nu unfu kakami, nu nggo à hi di ivi i ma yi i ji ntsɨmi.”

¹³Nggo ìwǎ drago wa à hi di a turr ùwà ji nga ni ingbingbru yi, mre na gru so han ayamba wa nggo à ngri uvuvurr unuru wa nggo.

¹⁴Aba a nu ayamba wa angba ka bwa aha ka ankpa ankpi, nggo a ta bwa share ku ìwǎ drago wa kuma na abubo ama wa na ankpuji wa. Nabo yo a ta ku ssu ma gri zizi ki ase atarr ni inkpu, nggo ìwǎ drago wa à si ta hi ma hen.

¹⁵Ìwǎ drago wa à ta amasirr ssuzzu na angu nâ ta si inyi nggo. Na zha da amasirr wa bu gu ayamba nado.

¹⁶Imimi yi i zi ayamba wa, ni gburr amasirr wa nggo a ssuzzu na angu ka ìwǎ drago wa ttumri.

¹⁷Ìwǎ drago wa à ki unfu na ayamba wa ku, na kuma du uwa a ta ku ta iku na ahinhan abanu ba ayamba ba ba, abangga ba nggo a di kru isisu i ure ku Abachi na di kri ngbangba da aba sa abi Yesu.

¹⁸Ìwǎ drago wa kri nu ugbuhun nu unddu inyi unkpi ku.