Read njo LIPOK 11 Bible Online

LIPOK 11 - njo bible

LIPOK 11

¹Alima ajak nung oshi ka aser o ka dang liasü.

²Parnoki anüdokleni aodang Shinar lima nung lenten ka angu, aser parnok idakji ali.

³Aser parnok kati ka dang ashi, “Arung asenoki ajongli menoka lungru merang ama rudi.” Parnoki lung melena lungru, lishi melen süngnaktzü agi.

⁴Parnoki ashi, “Asenok alima ajak len prokshia oa lir, asenok tenüng ayutsü asoshi yimti ka lungru agi anüng tashi tua yangludi.”

⁵Meimchirtemi yangluba yimti aser lungkiji reprangtsü KIBUBA alu,

⁶aser KIBUBAi ashi, “Ajiang parnok kin ka aser oshi ka dang jembir. Parnoki kechi mapa inyaktsü ali aji tangang tetenzüker, aser parnok madang kecha tamakoktsü malitsü.

⁷Asenoki ludi aser parnok o parnok na o jembibaji mangatetteptsüsa parnok oji benjatsüdi.”

⁸Anungji KIBUBAi parnok alima ajakleni prokshidaktsü, aser parnoki yimti yanglubaji anenadok.

⁹Iba yimti tenüngji Babel ta aja, kechiaser idakji KIBUBAi meimchir ajak o benjatsü, aser parnokji alima ajaklen prokshidaktsü.

¹⁰Item ya Shem nungi jakzükbatem lir. Tzümetsüng süir kümnabuba nung Shem küm noklang ka lia Arpakshad jakzük.

¹¹Iba sülen pa küm noklang pungu ali aser jabaso jalatem jakzük.

¹²Arpakshad küm semer pungu lir Shela jakzük.

¹³Iba sülen Arpakshad küm noklang pezü ser asem liasü aser jabaso jalatem jakzük.

¹⁴Shela küm semer lir Eber jakzük.

¹⁵Eber sor Shela küm noklang pezü ser asem liasü, aser jabaso jalatem jakzük.

¹⁶Eber küm semer pezü lir Peleg jakzük.

¹⁷Peleg sor Eber küm noklang pezü ser semer liasü, aser jabaso jalatem jakzük.

¹⁸Peleg küm semer lir Reu jakzük.

¹⁹Reu sor Peleg küm noklang ana ser tuku liasü, aser jabaso jalatem jakzük.

²⁰Reu küm semer ana lir Serug jakzük.

²¹Serug sor Reu küm noklang ana ser tenet liasü, aser jabaso jalatem jakzük.

²²Serug küm semer lir Nahor jakzük.

²³Nahor sor Serug küm noklang ana liasü, aser jabaso jalatem jakzük.

²⁴Nahor küm metsür tuku lir Tera jakzük.

²⁵Tera sor Nahor küm noklang ka ser tertuku liasü, aser jabaso jalatem jakzük.

²⁶Tera küm neter lir Abram, Nahor aser Haran jakzük.

²⁷Item ya Tera dak jakzükbatem lir: Tera nungi Abram, Nahor aser Haran jakzük. Haran nungi Lot jakzük.

²⁸Haran tebu Tera dang nungi tama pei taso lima Kaldi nunger Ur yimti nung asü.

²⁹Abram aser Nahori kibutsütem agi. Abram tebutsü Sarai, aser Nahor tebutsü Milka, Haran jala, shiba Milka aser Iska na tebu liasü.

³⁰Saka Saraiji tapung, techir maliasü.

³¹Terai pei chir Abram, Haran chir Lot shiba pei semchir liasü; Abram kinungtsü Sarai anir Kanan limai aotsü asoshi Kaldi nunger Ur yimti nungi apusoa Haran tonga oa idakji ali.

³²Tera arishi küm noklang ana ser pungu liasü, aser pa Haran nung asü.