Read njo LIPOK 12 Bible Online

LIPOK 12 - njo bible

LIPOK 12

¹ Tang KIBUBAi Abram dang ashi, “Ner lima nungi, ner kinunger nungi aser nebu ki nungi apusoa ni ne dang sayutsüba limai oang.

²Ni na agi kin tulu ka kümdaktsütsü, aser ni na moatsütsütsü aser na tenüng ulutsütsütsü aser temoatsü ka alitsü.

³ Shiri na moatsüdir, ni parnok moatsütsü, aser shiri na atakatemdir, ni parnok atakatemdi, aser na ajanga ni alima meimchir ajak moatsüdi.”

⁴Abram küm neter pungububa nung KIBUBAi ashiba ama Haran nungi apusoa ao, aser Lot Abram den ao.

⁵Abrami tebutsü Sarai, tenu chir Lot, aser parnoki bendenba rongsen ajak aser kilirtem ajak den parnoki Haran nungi Kanan lima bushia oa aji atong. Kodang parnoki Kanan atong,

⁶Abrami Shekem lima More sülem dong tashi aru. Kanan nunger idakji liasü.

⁷Idakji KIBUBAi Abram dangi jungkai adoka ashi, “Ni ne semchirtem nem iba lima ya agütsütsü.” Anungji KIBUBA shiba pa dangi jungkai adok, idakji Abrami tenladak ka yanglu.

⁸Yang nungjagi anüdoklen tenem lima Bethel anüolen aser Ai anüdoklen tsüngda pai süki yanglu. Idakji KIBUBA atema tenladak ki ka yanglu aser KIBUBA tenüng nung aja.

⁹Aser pai tesem tesem nung nemzüa senzü, aser anüdoklentip Negeb lima tashi aru.

¹⁰Saka Kanan nung ayawara kanga sashia liasü, anungji Abrami Ijip nung tatsüka amungtsü alu.

¹¹Kodang parnok Ijipi aitsü anasa aru, Abrami tebutsü dang ashi, “Na tereprangtsü tobur tajung ta ni metet,

¹²aser Ijip nungeri na angudang ashitsü, ‘Ibai pa kinungtsü,’ aser parnoki ni tepsettsü, saka nabo taküm lidaktsütsü.

¹³ Parnok dang na künu ta shiang ta ni mepishir, idangji na atema parnoki kü taküm kümzüktsü, aser kü danga junga benshitsü.”

¹⁴Kodang Abram Ijipi aru, Ijip nungeri tebutsü tobur kanga tajung ta angu.

¹⁵Kodang Farao tamarenertemi la angu, la tobur ajungba indang Farao dang ashi, aser la Farao kidangi anir ao.

¹⁶Aser la atema Faraoi Abram dang junga benshi, aser Abram san, nashi, gado, kilir, aser kilitsür, aser ut itemji aika liasü.

¹⁷Saka Faraoi Abram kinungtsü Sarai agiba yong KIBUBAi Farao aser par kidang alirtem ajak dak tashitak wara agi tongdaktsü.

¹⁸Idangji Faraoi Abram jar asüngdang, “Nai kü dang inyakba ya kechi? Laji kübutsü ta nai kechiba kü dang mashi?

¹⁹Nai kechiba laji künu ta ashi, aser la kübutsü asütsü agidaktsü? Yangi nebutsü lir, la anir oang.”

²⁰Faraoi nisungtem dang ozüng agüja ashi, aser parnoki pa aser tebutsü, aser pa akaba ajak bener yokadok.