Read njo LIPOK 13 Bible Online

LIPOK 13 - njo bible

LIPOK 13

¹Anungji Abrami pei kinungtsü aser pa akaba ajak aser Lot anir Ijip lima nungi aenshia anüdoklentip Negeb limai atu.

²Abram kiset shirurutem, hon aser taribi nung kanga takar liasü.

³Negeb nungjagi pai aenshia oa Bethel aser Ai tsüngda kong tamasa pai süki yanglu, idakji anenzük;

⁴aser tenladak ka yanglu, aser idakji pai KIBUBA tenüng nung aja.

⁵Lot, shiba Abram den ao, pa-a san telok, nashi telok aser süki, item ka-a liasü, aser pei kibong den kilirtem liasü.

⁶Aser parnok külemi alitsü ali agi meperi; kechiaser parnok akaba aika asünung parnok külemi melitet.

⁷Abramer shiruru anükertem aser Loter shiruru anükertem na tsüngda raratepsa adok. Iba mapang linük nungji Kanan aser Periz nunger liasü.

⁸Idangji Abrami Lot dang ashi, “Ozü shiruru anüker o ner shiruru anüker na tsüngda nung teraratep kecha telidaktsü ta ni ne dang mepishir, kechiaser asenok sosem lir.

⁹Alimaji ne jakdang mali no? Yimlibilema kü dang nungi pila-ang. Na tabeleni ora ni tajichileni aotsü, mesüra na tajichileni ora ni tabeleni aotsü.”

¹⁰Loti pei tenük roka asoa reprang, aser Yordan lenten, KIBUBA tsüki[6] mesüka, iba ajaklen tzü teperi angu. Ibaji KIBUBAi Sodom aser Gomora mesamatsü dang liasü. Iba limaji Zoar len aliba Ijip lima ama liasü.

¹¹Anungji Loti pei asoshi Yordan lenten ajonga shimtet, aser Lot lenten lima yimtitem nung ali aser pa anüdoklen tsütsüi oa parnok pila.

¹²Anungji Abram Kanan lima nung ali, aser Lot lenten lima yimtitem nung ali, aser pa süki Sodom tashi bener ao.

¹³Sodom nungerji kanga tamajung ashikülaker KIBUBA anema temenen tulu benshirtem liasü.

¹⁴Lot pila-a or külen, KIBUBAi Abram dang ashi, “Na noktaka alidak nungi ne tenük roka asoa tesem ajaklenji oda anüdoklentip, anüolentip, anüdoklen aser anüolen reprangang.

¹⁵Kechiyong nai anguba lima ajakji na aser ne dak jakzükbatem nem teti asoshi ni agütsüdi.

¹⁶Ni ne metsü alima lisem ama kümdaktsüdi, aser kari alima lisem züngdangtetra, ne metsüa züngdangtettsü.

¹⁷Tang aramesoang aser alima lenten metong ajakji ajangdanga jaja-ang, kechiaser item ajakji ni ne nem agütsütsü.”

¹⁸Abrami pei süki bener arua Hebron nung aliba Mamre sülem dong anasa ali, aser KIBUBA atema tenladak ka yangji yanglu.