Read njo LIPOK 14 Bible Online

LIPOK 14 - njo bible

LIPOK 14

¹Item anogo nung Shinar chuba Amrafel, Elasar chuba Ariok, Elam chuba Kedolamer, Goiim chuba Tidal,

²parnoki Sodom chuba Bera, Gomor chuba Birsha, Adma chuba Shinab, Zeboiim chuba Shemeber, aser Bela (aji Zoar) chuba den raratsü tenzük.

³Item chuba punguji külemi lungjemer Sidim nung noktak.

⁴Parnoki küm terana tashi Kedorlaomer chuba tenzük, aser küm terasembuba nung pa anema apuso.

⁵Küm terpezübuba nung Kedorlaomer aser pa den adenba chubatemi Ashterot-Karnaim nung Refaim nunger, Ham nung Zuzim nunger; Shave-Keriatim nung Emim nunger,

⁶Hor nunger Seir tenem nung aliba El Paran tashi amak.

⁷Parnoki meyipa Enmeshefati (aji Kadesh) arua Amalek nunger lima aser Hazazontamar nung aliba Amor nunger lima ajak amak.

⁸Idangji parnok anema Sodom chuba, Gomora chuba, Zeboiim chuba, Bela chuba apuso. Parnoki Sidim lenten nung tsükchir anema tongbang renem.

⁹Elam chuba Kedorlaomer, Goiim chuba Tidal, Shinar chuba Amrafel, Elasar chuba, Ariok; chuba pungu anema chuba pezüi apuso.

¹⁰Tang Sidim lentenji süngnaktzü ongken agi sünga liasü. Kodang Sodom o Gomora chubatem tongbang nungi ajen, parnok ongken nungji tsük, saka tanüngba chuba asemji tenem nung jenok.

¹¹Anungji tsükchirtemi Sodom aser Gomora rongsen, aser parnok chiyungtsü ajak rakzüka bener ao.

¹²Parnoki Abram tenu chir Lot, shiba Sodom nung liasü pa aser par rongsen ajak bener ao.

¹³Rara nungi jenbuba Ibri nunger kati Abram, shiba Amor nunger sülem dong anasa liasü; pa dang ashi. Aner aser tenu Eshkol tenati parnok den jungtepa liasü.

¹⁴Kodang Abrami pa adianu pua bener ogo ta angashi, pai pei kidang asoba tazüoktet nisung noklang asem ser ter-ti anir Dan tashi aria ao.

¹⁵Pai aonung parnok anema pa kilirtem lemsa, aser parnokji akok, aser Damaska anüdoklentip Hoba tashi tsükchirtemji aridoktsü.

¹⁶Idangji pai oset ajak meyipa rakzük, aser tenu chir Lot, pa rongsen ajak den tetsürtem, aser nisungtemji meyipa anir aru.

¹⁷Kodang Abram Kedorlaomer aser pa den aliba tangar chubatem koker meyipa aru, Sodom chubai Shave lenten (aji chuba lenten taka ajar) tashi pa lenji ao.

¹⁸Aser Salem chuba Melkizedek, shiba dang Tematiba Tsüngrem putir ta ajar, pai amtsük aser yi bener arua,

¹⁹Abram moatsü aser ashi, “Tematiba Tsüngrem, shibai anüng ali yanglu pai Abram moajangma!

²⁰Tematiba Tsüngrem shibai tsükchir madak ne nem takokba agütsü, pa sangang.” Aser Abrami temakzükba ajak nungi pa nem ter shilem agütsü.

²¹Sodom chubai Abram dang ashi, “Temakzükba oset ajakji na agiang, saka kü nembo nisungtem dang kua.”

²²Abrami Sodom chuba dang ashi, “Ni Tematiba Tsüngrem KIBUBA anüng-ali Yanglusang KIBUBA matsüngdang azüngashiogo,

²³ni ne rongsen angjang ka mesüra tsüngsem lisü kata mesüra tanga kecha magitsü; ashiko nai ashitsü, ‘Ni Abram takar kümdaktsü.’

²⁴Kü den aor nisungtem tsüta aser asangurtemi kechi achi, iba dak alema ni kecha magitsü. Saka kü den külemi aortem, Aner, Eshkol, aser Mamre parnokbo pei shilem agidakjang.”