Read njo LIPOK 15 Bible Online

LIPOK 15 - njo bible

LIPOK 15

¹Iba sülen KIBUBA o mangdang ka nung Abram dangi arua ashi, “Tetsübuma, Abram. Ni ne jong, aser ne sempet kanga tulu alitsü.”

²Saka Abrami langzü, “Oh Tematiba KIBUBA, ni techir mali, aser kü ki senmangtsübaji Damaska nunger Eliezer lir; ajangla nai kü nem kechi agütsütsü?

³Nai kü nem techir magütsü, anungji kidang alar kati kü senmang amangtsü.”

⁴Ano KIBUBA o pa dangi arua ashi, “Iba alar ne senmanger masütsü, saka shiba ne temang nungi adoktsü, ibaji ne senmangba asütsü.”

⁵ Iba sülen KIBUBAi Abram kimaleni anir adoka ashi, “Anünglen ajiang aser petinutemji züngdangtetdisü mezüngdangtetlir züngdangang, ne semchirtem yamaji alitsü.”

⁶ Abrami KIBUBA dak amang aser pa atema aji temeshiba ta züngshi.

⁷Ano KIBUBAi Abram dang ashi, “Ni KIBUBA, shibai na Kaldi lima Ur yimti nungi iba lima senmang amangdaktsütsü anir aru.”

⁸Saka Abrami langzü, “Oh KIBUBA Tsüngrem, ibai kü meyong asütsü ta ni kechi koda metettsü?”

⁹KIBUBAi langzü, “Ni asoshi küm asem tain nashi tsüla ka, nabong tetsü ka, san tepung ka, guduru ka aser posü chanu ka ta bener arung.”

¹⁰Abrami shirurutemji bener aru aser itemji tiyongi lepsa-a shilem shiaji balala ayu, saka pai ozütemjibo melepsa.

¹¹Kodang shi achiba ozütem tasümangji bushia aru, Abrami itemji aridok.

¹²Anü luya alidang Abram ayipjanga mejanga ao, aser ammang tulu tetsübutsü ka pa madak aru.

¹³ KIBUBAi pa dang ashi, “Ya metetdang, ne semchirtem parnok meyong masüba bendanger lima nung alar süa alitsü, aser küm noklang pezü tashi kanga mejungi timtemdaktsütsü.

¹⁴ Saka parnok nem timtem agütsüba kinji ni merenshitsü, aser kodang parnok bendanger lima nungi meyipa adokdir parnoki rongsen jenti den adoktsü.

¹⁵Saka nabo arishi talang lir tesünep nung ne tsüraburtem den aremtsü.

¹⁶Aso pezübuba nung parnok yangi meyipa arutsü, kechiaser Amor nunger temenen kodang tali kümdir, idangji ang ni parnok merenshitsü.”

¹⁷Kodang anü yir ammang kümadok, mokozü alongba mi chipo ka aser tesangwa milen ka shiruru temang ayuba tsüngda jagi süia ao.

¹⁸Iba anogo nungji KIBUBAi Abram den tezüngzüktepba ka yanglua ashi, “Ne semchirtem nem ni iba lima: Ijip ayong nungi Eufrata ayong tulu tashi agütsür,

¹⁹Ken nunger, Keniz nunger, Kadmon nunger,

²⁰Hit nunger, Periz nunger, Refaim nunger,

²¹Amor nunger, Kanan nunger, Girgas nunger aser Yebus nunger, par lima ajak ni agütsüogo.”