Read njo LIPOK 16 Bible Online

LIPOK 16 - njo bible

LIPOK 16

¹Tang Sarai, Abram kinungtsüi pa nem tanur mesotsü, saka la kilirla Ijiptsür ka tenüng Hagar liasü.

²Anungji lai pa dang ashi, “Ni tanur masotsüsa KIBUBAi sot, kü kilirla den nai medemang, ashiko la agi ni tanur angutsüa kar.” Abrami Sarai o ama inyak.

³Aser lai Hagarji Abram kinungtsü asütsü agütsü. Ibai Abram Kanan lima nung küm ter lir atalok.

⁴Abrami Hagar den medem aser la mashisa aküm. Kodang la mashisa kümogo ta lai metet, lai pei sasa asüküma aser pei kiburla Sarai mezüngmeshia aküm.

⁵Aser Sarai Abram dang ashi, “Kü tai ne dak liang, ni kü kilirla ne teku nung agütsü, aser kodang lai la mashisa ta metet, la nükdang ni mezüngmeshia aküm. KIBUBAi ana tsüngda o bendangjang.”

⁶Abrami langzü, “Ne kilitsür ne ket nung lir, ne dang kechi ajung aji la dang inyakang,” Aser Sarai la dang meketmeseni sashia benshi nung Hagar jena ao.

⁷KIBUBA tenyari lisem lima azüngmeyakdak Sher lenmang tzübu ka anasa Hagar ajurua ashi,

⁸“Hagar, Sarai kilitsürla, na kong nungi aru aser koleni aor?” Lai langzü, “Ni kü kiburla Sarai jakdang nungi ajener.”

⁹Tenyar jagi ashi, “Ne kiburla dangi meyipa oang aser la kübok la tenzüka liang.”

¹⁰Ano tenyar jagi la dang ashi, “Ni ne nem semchirtem jenti agütsütsü, oda shingaia parnokji mezüngdangtettsüsa.

¹¹Nai jabaso ka asotsü aser pa tenüng Ishmael ta ajatsü, kechiaser KIBUBAi ne timtemba ola angashiogo.

¹²Pa nisung rongnung gado ama alitsü, pa teka nisung ajak anema alitsü. Pa pei adianutem ajak madang nungi pila-a alitsü.”

¹³Hagari ashi, “Tsüngrem shiba ni nguogo iba indang ashitsüsa ni taküm lidi ma?” Aser KIBUBA shibai la den jembi pa dang lai “Tangusang Tsüngrem” ta aja.

¹⁴Anungji nisungtemi tzübu tenüngji Beer-lahai-roi ta aja. Ibai kadesh o Bered na tsüngda nung lir.

¹⁵Hagari Abram nem jabaso ka sotsü, aser lai pa tenüng Ishmael ta aja.

¹⁶Hagari Ishmael asoba mapang Abram arishi küm tirtrok liasü.