Read njo LIPOK 17 Bible Online

LIPOK 17 - njo bible

LIPOK 17

¹Kodang Abram arishi küm tukur-tuku liasü, KIBUBA pa dangi jungkai adoka ashi, “Ni Ajak Takoksang, kü den jajaang aser tai makai liang.

²Ni kü tezüngzüktepba ne den yangludi, aser ne semchirtem jenti rendaktsüdi.”

³Abrami pei tejak rembanga ali nung apudak, aser Tsüngremi pa dang ashi,

⁴“Kü tezüngzüktepba ne den lir. Na kin aika tebu akümtsü.

⁵Ne dang joko Abram ta majatsü, saka ne tenüng Abraham ta ajatsü, kechiaser ni na kin aika tebu kümdaktsüogo.

⁶Ni na kanga rendaktsüdi, ne dak nungi alima kintem adokdaktsüdi, aser ne dak nungi chubatem adoktsü.

⁷ “Na aser ne semchirtem aser tarutsü pututem asoshi ni kü tatem maka tezüngzüktepba yangludi. Na aser ne semchirtem putu ajak atema ni Tsüngrem asütsü.

⁸Ni ne nem aser ne semchirtem nem na senzüdak iba Kanan lima ajak agütsüdi, aser ni parnok Tsüngrem alitsü.”

⁹Tsüngremi Abraham dang ashi, “Na aser ne sülen tarutsü putui iba tezüngzüktepba ayutsüla.

¹⁰ Ibai kü tezüngzüktepba koba ni o na aser ne sülen semchirtem tsüngda nung ayutsü; nenok rongnung tebur ajak mejeptoktsüla.

¹¹Ni aser nenok tsüngda tezüngzüktepba temaitsüji nenok shi teküp temabaji mejeptokang.

¹²Nenok tarutsü pututem nunga tebur shia sor anogo tinübuba nung, oda ne kidang asoba süshia aener nungi sen agi alizükba süshia, ne semchir mesüaka, parnok ajak mejeptokang.

¹³Ne kidang asoba süshia, sen agi aliba süshia parnokji mejeptoktsüla aser kü tezüngzüktepba ne shi nung tatem makaba tezüngzüktepba asoshi alitsü.

¹⁴Tebur kar danga tema teküpji memejeptokra, paji kü nübur rongnungi jentoktsü, kechiaser pai kü tezüngzüktepba raksa.”

¹⁵Tsüngremi Abraham dang ashi, “Nai joko nebutsü dang Sarai[7] ta majatsüla, tang nungi la dang Sarah ta ajatsüla.

¹⁶Ni la moatsütsü, la ajanga ne nem jabaso ka agütsütsü; ni la moatsütsü aser la kintem tetsü akümtsü, la semchirtem nungi chubatem adoktsü.”

¹⁷Abrahami pei tejak rembanga apudaker menü aser pa mulung nung ashi, “Tebur ka küm noklang ka tain kümer tanur ngudima? Aser Sarah shiba küm tukur tain lir, lai tanur sodi ma?”

¹⁸Abrahami Tsüngrem dang asüngdang, “Ishmael ne jakdang lilasang koda jungla?”

¹⁹Saka Tsüngremi ashi, “Masü, nebutsü Sarahi ne nem jabaso ka sotsütsü, aser nai pa tenüng Isak ta ajatsü. Ni pa aser pa semchirtem den tezüngzüktepba ka ayutsü. Ibai tatem makaba tezüngzüktepba alitsü.

²⁰Ishmael indang ne temepishibaji ni angashiogo. Ni pa moatsütsü; ni pa tejang jenti atangba kümdaktsüdi. Pa chuba terana tebudi akümtsü; aser ni pa agi kin tulu ka kümdaktsüdi.

²¹Saka Isak shiba sangküm Sarah iba mapang nung ne nem sotsütsü, pa den ni kü tezüngzüktepba yanglutsü.”

²²Kodang Tsüngremi Abraham den jembiba anen, pai pa toktsü.

²³Abrahami Tsüngrem dang tashi anga aser panüjisa pai pei chir Ishmael aser kidang alir tebur ajak alartem aser sen agi alizükba ajak mejeptoktsü.

²⁴Abraham arishi küm tukur-tuku alidang pa-a mejeptok,

²⁵aser pei chir Ishmael mejeptokdang küm terasem liasü.

²⁶Abraham aser pa chir Ishmael tenaprongla panüjisa mejeptok,

²⁷Abraham kidang aliba tebur ajak, kidang asor mesüra aener dang sen agi aliba ajak pa den külemi mejeptok.