Read njo LIPOK 18 Bible Online

LIPOK 18 - njo bible

LIPOK 18

¹Abraham anüngdang kanga lemyia süki kikümbang nung mena alidang KIBUBAi Mamri sülemdong anasa pa dangi jungkai adok.

² Pai roka asoa reprang, aser nisung asem pa jakdang noktaka angu. Kodang pai parnok angu, pai süki kikümbang nungi parnok ajurutsü asema oa pei tejak ali nung apudaka ashi,

³“Kü KIBUBA, ni ne jakdang yimlibilem ngurabang ne kilir kidang anenangma.

⁴Nenok tetsüng meiter süngdong kübok anisüngzüktsü asoshi ni tzü bener arutsüdi.

⁵Ni ano nenok nem chiyungtsü kar yanglutsüdi; yagi nenok lenmang asoshi tashi agütsütsü, kechiaser nenoki nenok kilir dangi aru.” Parnoki ashi, “Kanga junger, nai ashiba amaji sang.”

⁶Abrahami süki-i ilunga Sarah dangi yia ashi, “Yakta am tajungtiba nungi tatakzük asem agiteta yangluang.”

⁷Abraham ano nashi telok dangi asema oa nashi chanu tajungtiba shimteta kilir nem agütsü aser parnoki aji aritepa renem.

⁸Pai temo, mamatzü aser nashi koba pai renema liasü, itemji bener oa parnok madang yutsü. Aser parnoki chiyungdang pai süngdong kübok ata.

⁹Idangji parnoki pa dang asüngdang, “Ne kinungtsü Sarah kong lir?” Pai langzü, “La süki nung lir.”

¹⁰ “Sangküm kasa mapang nung ni ne dangi meyipa arutsü, aser nebutsü Sarai jabaso ka asotsü.” Sarai kiküm nungi aji angashi.

¹¹Tang Abraham aser Sarah tantsür tambur kümer aser Sarah dak tanur abentsü mapang süir liasü.

¹² Sarai pei mulung nung menüa ashi, “Tang ni kanga tantsür kümer aser kübuba-a tambur kümer ni shi nung tepela ngudima?”

¹³KIBUBAi Abraham dang asüngdang, “Ni kanga tantsür kümer tanur angutsü ama ta kechiba Sarai menüa ashi?

¹⁴ KIBUBAi makoktsüsa langka tasak lir asü? Ni sangküm kasa mapang nung ne dangi meyipa arutsü, aser Sarai jabaso ka asotsü.”

¹⁵Idangji Sarai tsübuadok aser menangzüki ashi, “Ni memenü.” Saka pai ashi, “Atangji nai menüogo.”

¹⁶Kodang nisungtemji yang nungjagi apuso, parnoki Sodom tsütsü reprang, aser Abrahami parnok sülen anitaka oa parnok pei lenmang nung meinoktsü.

¹⁷Idangji KIBUBAi pei sasa dang ashi, “Ni kechi inyaktsü ali, iba indang Abraham dang miimdi ma?

¹⁸Atangji Abraham kin tulu aser tashi tulu akümtsü, alima kin ajak na nungi moatsütsü.[8]

¹⁹Par chir aser pa semchirtemi KIBUBA dang tashi angatsü, aser kechi ochi aser shitak lir; itemji benshitsü sayutsü asoshi ni Abraham shimtetogo. Parnoki itemji benshira ni pa madang nangzükba ama ajak inyaktsü.”

²⁰Idangji KIBUBAi Abraham dang ashi, “Sodom aser Gomora nunger anema ayimtenba olaji kanga tulu asünung, aser parnok temenen aser tesashi teka yitepba mapa indang taitsüba onsara tulu asünung,

²¹tang ni lua parnok mapa atangji asü masü reprangdi, aser parnok taitsüba indang ni angashibaji shitak metettsü.”

²²Nisungtemji Sodom tsütsüi ao, saka Abrahami KIBUBA madang noktak.

²³Pai KIBUBA anasa arua pa dang asüngdang. “Nai temeshipurtemjia temenenpur denji samatsütsü asü?

²⁴Yimti nungji temeshipur tenem lira, tenem asoshiji nai yimtiji mesamatsütsü ama?

²⁵Atangji nai temeshipurji temenenpur den kodanga mesamatsütsü, kechiaser ibaji ne dak nungi talangka pila-a lir. Temenenpur den külemi temeshipur samatsüra, temeshi purtemji temenenpur ama kümdaktsür, O bendangbai alima ajak nung ochi mebenshili ma?”

²⁶KIBUBAi langzü, “Yimti nungji ni temeshipur nisung tenem ngurabang, parnok asoshi ni yimtiji kümzüktsü.”

²⁷Abrahami tanaben jembi, “Ajiang, ni ama ali nisungi KIBUBA den ano jembitsü tasü aiter,

²⁸temeshipur nisung tenem melen lir-pungu danga lira, pungu agi mabensaba asoshi nai yimtiji samatsütsü ama?” KIBUBAi langzü, “Ni idakji temeshipur lirpungu danga ngurabang yimtiji mesamatsütsü.”

²⁹Abrahami ano jembi, “Idakji lir danga ngura koda?” Pai langzü, “Lir asoshi ni aji mesamatsütsü.”

³⁰Idangji Abrahami ashi, “Ano ni jembiba atema KIBUBAi tejashima, idakji semer ngura koda?” Pai langzü, “Idakji semer ngurabang ni aji meinyaktsü.”

³¹Abrahami ashi, “Ni maneni tasü ita jembiba atema KIBUBAi kü dang tai tokangma, idakji metsü danga ngura koda?” Pai langzü, “Metsü asoshiji ni aji mesamatsütsü.”

³²Abrahami ashi, “Oh KIBUBA, yimlibilema tejashima, joko ni khen dang jembidi, ter danga ngura koda?” Pai langzü, “Ter danga ngura ni aji mesamatsütsü.”

³³KIBUBAi Abraham den jembizükli oadok, aser Abrahama pei talidaki meyipa aru.