Read njo LIPOK 19 Bible Online

LIPOK 19 - njo bible

LIPOK 19

¹Kodang tenyar anaji nikongdang Sodomi aru, Lot yimti süngkhüm nung mena liasü. Loti parnok ngua parnok den ajuruteptsü noktak, aser pai parnok madang apudaka ashi,

²“Kü kiburtem, yimlibilema nenok ner kilir kidangi meyipang ta ni mepishir. Nenok tetsüng meitang aser taonung idaki yipang, aser asüngnep yakta saker nenok pei lenmangi oangma.” Saka parnoki langzü, “Nung, onok ammang tepiyong yimti yimtong nungji alitsü.”

³Loti parnok dang onsara mepishi nung, parnoki tesü pa den par kidangi ao, aser pai parnok nem benjong ka yangluja piyazü meinokba amtsük renema chidaktsü.

⁴Saka aenertem mejanga maodang Sodom nunger lanu-ain ajak arua kiji meketbang.

⁵ Parnoki Lot jar asüngdang, “Taonung ner kidangi aitba nisungtemji kong lir? Parnokji onoki metettsüsa tang onok dangi anir adokang.”

⁶Loti kimai tugu aser pa sülen kishiji shibang,

⁷aser ashi, “Kü adianutem, nenoki tamajung tebenshi ta ni nenok dang mepishir.

⁸Reprangang, tebur memetetba kü jala tasüngtet ana lir, ni parnok nenok dangi anir adoktsüdi, nenoki kechi mulunger yamaji parnok dak benshiang; saka item nisungtem dak kecha tamajung teinyak, kechiaser parnok kü kilempoki aita lir.”

⁹Saka parnoki ashi, “Tesüleni aenshiang, iba nisung aener amungi aruba nisung ka sürnung tang pai asenok madak o bendanger kümdi asür. Onoki parnok dang benshitsüba dang nungi tamajungba ne dak benshitsü.” Parnoki Lot tesüleni atsür adok aser kishiji raksatsütsü tejakleni ait.

¹⁰Saka nisung ana jagi teka songtoka Lotji kidangi atsüketer kishiji shibang.

¹¹ Saka tenyar jagi kishi züngdang noktaka aliba lanu-ain na tenük pokdakja azük nungji parnoki kishiji meyimtena bushiba agi parnok sasa belemseta aküm.

¹²Tenyartem jagi Lot dang ashi, “Ne den idaki jala jabaso, anük-abang aser ner kimang yimti nung lira, parnok idak nungi anitetang,

¹³kechiaser iba yimti anema ayimtenba taitsüba onsara tulu KIBUBA madang kümogo. Aji asünung iba yimti samatsütsü asoshi KIBUBAi onok yok.”

¹⁴Idangji Loti oa pa jala agitsü jembia alirtem anük-abangtem dang ashi, “Yakta iba yimti nungi adokang, kechiaser KIBUBAi iba yimti samatsütsü.” Saka pai asayara ta dang parnoki bilem.

¹⁵Anepungi tenyartem jagi Lot dang ajungshia ashi, “Nebutsü aser ne jala ana anir tangsa apusoa oang, anungji iba yimti den külemi nenok mesamatsü.”

¹⁶ Saka Loti atapisa ali. Saka KIBUBAi pa dang aochia bilem nung tenyartem jagi pa kinungtsü aser jala ana teka nung amer yimti atena anir tugua yutsü.

¹⁷Kodang tenyartem jagi parnok yimti tezülen anir adoka yutsü, parnoki ashi, “Nenok taküm asoshi jenang, tesülen meyipa tereprang, aser lenten nungji tanen. Nenok sama-a lir tenemi jenang.”

¹⁸Saka Loti langzü, “Oh aji oda nungma kü kiburtem.

¹⁹Tang ajiang, ne kiliri nenok jakdang yimlibilem nguogo, aser kü taküm kümzüka yutsüba nung kü dang yimlibilem tulu sayuogo, aji saka ni tenemleni ajentsü makok, ashiko lendong kati ni menepadoktsü aser ni asütsü.

²⁰Ajiang oagi jenoktsü asoshi anasatiba yimti tila ka lir, ni idakji oa jenokdi, kechiaser ibaji yimti tila ka dang süaka idakji ni kümzüka alitsü.”

²¹Tenyar jagi Lot dang ashi, “Nai ashiba ama ni ibaia aochia melar, nai kü dang ashiba ama iba yimtiji mesamatsütsü

²²Ilungang, tangsa iba yimti nungji jenokang, kechiaser nai ibaji matong tashibo ni kecha meinyaktet.” Anungji iba yim tenüng Zoar ta aja.

²³Loti Zoar atongdang alima nung anü adoka liasü.

²⁴ Idangji KIBUBAi Sodom aser Gomora madak mitsüktsü lung aser mi tzünglu kotak nungi yok.

²⁵Pai item yimtitem aser lenten ajak, aser idakji aliba nisungtem; ali nung meiba ajakji samatsü.

²⁶ Saka Lot tebutsüi tesülen meyipa reprang, aser la metsü tongshi aküm.

²⁷Anepdang yakta Abrahami kong KIBUBA madang noktak ajagi atu,

²⁸pai Sodom aser Gomora lenten ajakji reprang, aser iba lima mokozüji misem tulu nungi adokba mokozü ama atua angu.

²⁹Anungji kodang Tsüngremi lenten lima yimtitem samatsü, pai Abraham bilemtet aser tesamatsü rongnungi kong Lot liasü, iba nungjagi pai Lot kümzük.

³⁰Loti Zoar nung alitsü tsübu nung pa aser jala tenem nung tuagi leprungki ka nung ali.

³¹Kenü anogo jala tantsülai tenu dang ashi, “Obala tambur kümogo, aser alima nunger yimya ama asenok den medema aseni tanur asotsüsa idaki tebur shinga mali.

³²Arung asen tebu metsü ayutsü asoshi asenoki obala nem yi jemdaktsüdi aser pa den medemdi.”

³³Paonungji parnoki tebu nem yi jemdaktsü aser tantsülai yia tebu den medem, saka tebui aji memetet, kechiaser pa yi agi meseper liasü.

³⁴Tasüngji tantsülai tanutsüla dang ashi, “Ni yasüng obala den medemogo, asen tebu metsü ayutsü asoshi taonunga pa nem yi jemdaktsüdi aser na yia pa den medemang.”

³⁵Paonungjia parnoki tebu nem yi jemdaktsü aser jala tanutsülai yia tebu den medem; saka tebui aji memetet, kechiaser pa yi agi meseper liasü.

³⁶Aji oda Lot jala anaprongla tebu agi temang mazüngi aküm.

³⁷Jala tantsülai tebur ka aso, aser lai pa tenüng Moab aja. Paji tanü tashi Moab kin tebu lir.

³⁸Jala tanutsülaia tebur ka aso, aser lai pa tenüng Ben-Ammi ta aja. Paji Ammon kin tebu lir.