Read njo LIPOK 2 Bible Online

LIPOK 2 - njo bible

LIPOK 2

¹Yamaji anüng-ali aser yangji aliba ajakji renem.

²Tenetnübuba nung Tsüngremi pai yangluba mapa atem aser pai yangluba mapa ajak nungi pai mungzük.

³Aser Tsüngremi anogo tenetnübubaji moaja meshitet, kechiaser iba anogo nung pai yangluba mapa ajak nungi anisüngzüka pai mungzük.

⁴Iba ya Tsüngremi anüng aser alima yangluba otsü, koba anogo nung Tsüngremi alima aser anüng poktetdaktsü. Kodang KIBUBAi anüng-ali yanglu,

⁵alima nung süngdonglidong maliasü, aser süngolio ano memeyi, kechiaser KIBUBAi alima nung ano tzünglu marudaktsü aser alijak züsentsü meimchir kata maliasü,

⁶saka tzüsü alima nungi tua alima nung tzünglu arudaktsü.

⁷ Idangji KIBUBA Tsüngremi ali nungi ajongli bena aru aser iba jagi nisung yanglu, aser pa teni nung taküm tangula apuoktsü aser nisungji akümlir ka aküm.

⁸KIBUBA Tsüngremi anüdoklen atsüki ka Eden nung yanglu, aser pai yangluba nisungji idakji yutsü.

⁹ Pai idakji tenük asoshi tobur tajung aser tachitsü süngjang atangba süngdongtem ali nungi meidaktsü. Atsüki tiyong nung taküm süngdong aser tajung o tamajung metetba süngdonga meidaktsü.

¹⁰Ayong ka atsüki nung tzü agüja ayimtsü asoshi Eden nungi adokdaktsü; idak nungjagi aji lemsa-a ayong pezü aküm.

¹¹Mezüngbuba ayong tenüngji Pishon, iba yagi hon aliba Habila lima ajak meketa ayimer.

¹²Hon temeja teronem menemba aser senti lung iba lima nung lir.

¹³Tanabuba ayong tenüng Gihon; yagi Kush lima ajak meketa ayimer.

¹⁴Tasembuba ayongji Tigris, Asiria anüdoklen ayimer, aser pezübuba ayong tenüng Eufrata.

¹⁵KIBUBA Tsüngremi nisungji anir arua Eden atsüki inyakdaktsütsü aser anüktsü yutsü.

¹⁶KIBUBA Tsüngremi nisung nem ozüng agüja ashi, “Atsüki nung atangba süngjang ajak nai achitsü akok,

¹⁷saka tajung o tamajung metetba süngdong nungi nai machitsüla; kechiaser koba anogo nung nai aji chidir na asütsü.”

¹⁸Aser KIBUBA Tsüngremi ashi, “Nisungji kija alitsü majung; ni pa asoshi tetemsü teyarir ka yangludi.”

¹⁹Aser KIBUBA Tsüngremi ali agi shiruru ajak aser anüng ozü ajak yanglur nisung jagi kechi tenüngsa jadir ta nisung dangi anir aru; aser nisung jagi shiruru shia dang kechi aja, aji parnok tenüng aküm.

²⁰Aser nisung jagi shiruru ajak nem aser anüng ozü ajak nem tenüng agütsü, saka nisung asoshi tetemsü teyarir ka mangu.

²¹Idangji KIBUBA Tsüngremi nisungji sümanga mejangdaktsü; aser pa tesaret ka agiteta aji shi agi mejembangtsü.

²²Tesaret koba nisung nungi agitet, iba jagi pai tetsür ka yanglu aser la nisung dangi anir aru.

²³Idangji nisung jagi ashi, “Tang ibai kü teret nungi teret, aser kü shi nungi shi. La dang tetsür ta ajatsü, kechiaser la tebur nungi agitet.”

²⁴Anungji kinungpuri pei tebu aser tetsü toktsür pei kinungtsü den sentepa alitsü, aser tena shi ka dang akümtsü.

²⁵Aser nisung aser pa kinungtsü naji mangsa liasü, saka parnok maktepi liasü.