Read njo LIPOK 20 Bible Online

LIPOK 20 - njo bible

LIPOK 20

¹Abrahami idak nungjagi apusoa anüolentip leni oa kadesh o Shur tsüngda nung ali, aser pai Gerar nung amung.

² Aser Abrahami tebutsü Sarah indang ashi, “La künu.” Anungji Gerar chuba Abimeleki Sarah pa dangi anir aru.

³Saka Tsüngremi Abimelek dang aonung pungmang nung adoka ashi, “Ajiang tetsür koba nai agi iba yongji na tasür dang lir, kechiaser la nisung ka kibutsü lir.”

⁴Saka Abimeleki la den ano memedemi liasü, aser pai ashi, “KIBUBA, ni la nungi asüngteta lir. Nai ni aser ozü kin samatsütsü ama?

⁵Abrahami kü dang laji künu ta, aser Saraia paji küdi ta mashi ama? Kü mulungsentsü temerük aser kü teka tindang agi ni ya inyak.”

⁶Pungmang nungji Tsüngremi langzü, “Hau, nai ne mulungsentsü temerük agi inyakogo, anungji ni anema temenen mebenshidaktsütsü asoshi nai la dak mekongshidaktsü.

⁷Tang la pei kinungpu nem meyipa agüjang, kechiaser pa ainkar ka lir, aser pai na asoshi sarasademtsütsü, anungji na masütsü. Saka nai la meyipa magütsüra, na aser ne den aliba ajakji asütsü ta nai metetang.”

⁸Anepdang yakta Abimeleki pa kilirtem aja aser kechi atalok iba indang parnok dang ashi, aser parnoki kanga tsübu.

⁹Idangji pai Abraham jar asüngdang, “Nai onok dang inyakba ya kechi? Ni na anema kechi tai inyakba yong ni aser kü yimli madaki iba tai tulu bener arutsür? Nai kü dang meinyaktsüba mapa ka inyakogo.”

¹⁰Abimeleki Abraham dang ashi, “Nai ya kechi bilemer inyak?”

¹¹Abrahami langzü, “Kechiaser ni ya bilem, iba lima nung Tsüngrem tsübuba shinga mali, aser kübutsü asoshi parnoki ni tepsettsü südi.

¹²La atangji künu, kütsür chir masü, saka kübur chir, kübutsü asütsü ni la agi.

¹³Aser kodang Tsüngremi ni kübur ki nungi bendang limai yok, ni la dang ashi, ‘Iba yimlibilem nai kü dang sayuangma, oda, kongisa asenok odir nai niji küdi ta shiangma.’ ”

¹⁴Idangji Abimeleki Abraham nem san, nashi, alar tebur aser tetsürtem aser tebutsü Sarah meyipa agütsü.

¹⁵Pai Abraham dang ashi, “Ajiang, kü lima ne jakdang lir, na linüdak ka liangma.”

¹⁶Aser Sarah dang pai ashi, “Ajiang ni nedi nem taribi sen meyirijang ka agütsüogo, iba yagi ne den aliba ajak madang na temerük aser metendaktsüogo ta kuli asütsü.”

¹⁷Idangji Abrahami Tsüngrem dang sarasadem, aser Tsüngremi Abimelek tebutsü aser lar tetsürtem anebtsü, aser parnoki tanur aso,

¹⁸kechiaser Abraham tebutsü Sarah atema Tsüngremi Abimelek kibong nung tetsürtem nu menden ajak shibangtsür liasü.