Read njo LIPOK 21 Bible Online

LIPOK 21 - njo bible

LIPOK 21

¹KIBUBAi nangzükba amato pai Sarah dang inyak aser la moatsü.

² Sarah mashisa aküm aser Abraham nem pa asa tao nung oda Tsüngremi atemzükba mapang shitak nung jabaso ka sotsü. Tanurji Tsüngremi atakzüka toktsüba mapang shitak nung aso.

³Sarai asoba tanur tenüngji Abrahami Isak[9] aja.

⁴Isak sor kodang anogo tinü abensa, Tsüngremi pa dang melaba ama Abrahami pa mejeptoktsü.

⁵Isak asodang Abraham arishi küm noklang ka tain liasü.

⁶Sarai ashi, “Tsüngremi ni menüdaktsü, aser shirnokisa ibai angashidir, parnoki kü den menütsü.”

⁷Ano lai ashi, “Sarai tanur nem mama yongdaktsütsü ta shibai Abraham dang shila? Saka pa asa taoi ni pa nem jabaso ka sotsüogo.”

⁸Tanurji ina mama tokdaktsü, aser Isak mama toktsüba anogo nung Abrahami benjong tulu ka yanglu.

⁹Saka kodang Sarai pei chir Isakji Ijiptsür Hagari Abraham nem sotsüba jabaso den asaya-a angu,

¹⁰ lai Abraham dang ashi, “Iba alatsür aser lar jabaso yokadokang, kechiaser iba alarla jabaso kü chir Isak den senmang maka.”

¹¹Iba o jagi Abraham kanga mepeladaktsü, kechiaser Ishmaeljia pa chir liasü.

¹² Saka Tsüngremi Abraham dang ashi, “Tanur aser ne kilitsür atema na shisa bulua tejashima, Sarai ne dang kechisa shidir ajakji inyakang, kechiaser ni ne dang nangzükba ama Isak dak ne metsüji ajatsü.

¹³Ano alatsürlai asoba tanur agi ni kin ka kümdaktsütsü, kechiaser pa ne metsü lir.”

¹⁴Anungji anepdang yakta Abrahami shishir chiyungtsü tera aser shiküp juli nung tzü sünga enoker Hagar nem agütsü. Aji la tapubang nung benloktsü aser tanur denji la kidang nungi yokadok. Aser lai pila-a oa Beersheba azüngmeyakdak nemzüa liasü.

¹⁵Kodang shiküp juli nung aliba tzüji agimadok, lai tanurji süngsem pok ka nung yutsü,

¹⁶aser lai pa jakdang nungi süklep lir shi pila-a ao. Kechiaser lai ashi, “Ni tanur asüba dakji mereprangli.” Aser lai pa jakdang mena alidang tanur jagi ola adoka ajeb.

¹⁷Tsüngremi tanur ajepba olaji angashi, aser kotak nungi tenyari Hagar dang jembia ashi, “Hagar, na kechi agi timatemer? Tetsübu, Tsüngremi tanur ajepba ola angashiogo.

¹⁸Aramesoang, tanurji mesoa nai ajunga arung. Pa metsü nungi kin tulu ka ni kümdaktsüdi.”

¹⁹Idangji Tsüngremi la tenük lapoktsü, aser lai tzübu ka angu, lai oa shiküp juliji tzü agi sünga tar tanur nemji jemdaktsü.

²⁰Tanurji ain, aser Tsüngrem pa den ali, aser pa arem nung lia lijak amshir tetangshi ka aküm.

²¹ Pa Paran arem nung ali, aser tetsüi pa asoshi Ijip lima nungi kinungtsü ka aniok.

²²Iba mapang nungji Abimelek aser par arkotong Fikoli Abraham dang ashi, “Nai inyakba ajak nung Tsüngrem ne den lir.

²³Anungji tang kü dang Tsüngrem agi azüngashiang; oda nai kü den, kü chir den aser kü semchirtem den külaka mebenshitsü; saka ni ne dang benshiba temeim amato nai kü dang aser alima kechi nung pa amung, iba dang benshitsü.”

²⁴Abrahami ashi, “Ni azüngashidi.”

²⁵Aser tzübu koba Abimelek kilirtemi rakzük, iba yongji Abrahami Abimelek arütsü.

²⁶Abimeleki ashi, “Ya shibai inyak nia memetet. Nai iba indang kü dang mashi, aser tanüang iba indang angashir.”

²⁷Idangji Abrahami nashi aser san kar Abimelek nem agütsü, aser tenati tezüngzüktepba ka yanglu.

²⁸Abrahami san tetsü chanu tenet san telok nungi shimdanga ayu.

²⁹Aser Abimeleki Abraham dang asüngdang, “Item san tetsü koba nai shimdanga ayu, aji tetezü kechi?”

³⁰Abrahami langzü, “Ni iba tzübu ya atu ta ni atema na-a kuli ka asütsü asoshi item san tetsü chanu tenet ya nai kü ket nungi agiang.”

³¹Anungji iba linük dang Beersheba[10] ta aja, kechiaser idakji tenati azüngashi.

³²Parnoki iba tezüngzüktepba Beersheba nung yanglur külen, Abimelek aser par arkotong Fikol, Filistia limai meyipa ao.

³³Abrahami Tamarisk süngdong ka Beersheba nung atem aser Tatem Makaba KIBUBA tenüng nung aja.

³⁴Aser Abrahami Filistia lima nung talangka amung.