Read njo LIPOK 22 Bible Online

LIPOK 22 - njo bible

LIPOK 22

¹Kenpiga lir külen Tsüngremi Abraham tendanga pa dang ashi, “Abraham.” Abrahami langzü, “Ni yangi lir.”

²Tsüngremi ashi, “Ne chir oda ne jabaso ka dang aliba, shiba nai kanga meimer, pa Moria limai anir oang. Yangji ni ne dang sayuba tenem nungji Isak kü nem tarongba tenla asoshi agüjang.”

³Abrahami anepdang yakta shishir, gado nung tamentsü menden enoka pa den Isak aser kilir ana anir, tarongba tenla asoshi süng sosar apusoa Tsüngremi pa dang sayuba tenem jagi ao.

⁴Anogo asemnübuba nung Abrahami pei tenük roka asoa reprang, aser alinükji talang nung angu.

⁵Idangji pai kilirtem dang ashi, “Nenok gado den yangi ata-a liang. Tanur küna ajagi odi, aser onoki tenla agütsür külen tanaben nenok dangi meyipa arutsü.”

⁶Abrahami tarongba tenla atema süngji pei chir Isak nem bendaktsü, aser pai pa teka nung mi aser nok aben aser tena külemi ao.

⁷Aser Isaki tebu dang asüngdang, “Oba!” Pai langzü, “Kü chir, ni yangi lir.” Isaki asüngdang, “Ajiang mi aser süngpong yangi lir, saka tarongba tenla asoshi sanbo kong ali?”

⁸Abrahami langzü, “Kü chir, Tsüngremi pei sasa asenok nem agütsütsü.” Aser tenaprongla külemi ao.

⁹ Kodang Tsüngremi pa dang ashiba linük jagi tena tonga aru, Abrahami idakji tenladak sabang yanglu, aser süngji tiptema iba manung ayu, aser pai pei chir Isak alener tenladak sabang manung ayu.

¹⁰Idangji pai pei chir tepsettsü asoshi nokji amer pa teka mekang,

¹¹Saka Tsüngrem kotak tenyari ashi, “Abraham, Abraham.” Abrahami langzü, “Ni yangi lir.”

¹²Pai ashi, “Tanur dak teka teyi aser pa dak kecha teinyak, kechiaser nai ne chir ka dang aliba mapayui kü nem agütsü nung nai Tsüngrem akhüm tsübur aser pa dang tashi angar ta ni meteter.”

¹³Abrahami reprang aser ajiang pa sülen san tepung ka tezü agi arem süngsem kongsang dak yitaker aliba angu. Pai oa aji sala aser pei chir Isak melena sanji tarongba tenla agütsü.

¹⁴Abrahami iba linük dang Yihovajire[11] ta aja. Tanü tashi nisungtemi jembiba ama, “KIBUBAi pei tenem nung agütsütsü.”

¹⁵KIBUBA tenyari Abraham dang tanaben kotak nungi aja,

¹⁶ aser ashi, “Nai iba mapa inyak nung, aser ne jabaso ka dang aliba sota meyui agütsü nung, ni kü tenüng agi pei sasa azüngashiogo.

¹⁷Ni atangji na moatsütsü. Ne semchirtem anüng petinutem ama, aser molu lisem ama rendaktsüdi. Ne semchirtemi parnok tsükchirtem yimti süngkhümtemji agitsü,

¹⁸ alima kintem ajak ne semchirtem agi moatsütsü, kechiaser nai kü o anga.”

¹⁹Idangji Abrahami pei kilirtem dangi meyipa aru, aser parnok ajak külemi Beershebai oa ali.

²⁰Iba sülen Abraham dang ya shia liasü, “Ajiang nenu Nahor nema Miklai techirtem soja lir.”

²¹Mezüng asobaji Uz, pa tenu Buz, Aram tebu Kemuel,

²²Kessed, Hazo, Pildash, Yidlaf aser Betheul.

²³Rebeka tebuji Bethuel, item jabaso tiji Milkai Abraham tenu Nahor nem sotsü.

²⁴Nahor tezüngatsü Reuma, lai Teba, Gaham, Tahas aser Maak sotsü.