Read njo LIPOK 23 Bible Online

LIPOK 23 - njo bible

LIPOK 23

¹Sarah arishi küm noklang ka ser metsür tenet liasü.

²La Kanan lima Kiriath Arba (aji Hebron) Kana lima nung asü, aser Abrahami la asoshi mang yima ajebtsü ai.

³Abrahami pei kinungtsü tasü mangji toktsür aramesoa Het nungertem dangi oa parnok dang ashi,

⁴ “Ni nenok rongnung aenersa aser amunger ka, ni kü tasüba aremtsüsa kü dang ali kar yokangma.”

⁵Het nungertemi Abraham dang langzü,

⁶“Onok dang angang kibur, na onok rongnung tashi tait tamarener ka lir; onok leper tajungtiba nung ne kinungtsü tasü mang remang. Ner tasüba meremdaktsütsüsa onoki pei leper na nungi sota mayutsü.”

⁷Abrahami noktaka iba lima nung alir Het nunger madang apudak,

⁸aser pai ashi, “Ni kübutsü tasü mang aremtsü nenoki mulungsoa melara, kü dang ya angang aser Zoar chir Efron dang ni asoshi mepishijang,

⁹oda kü dang par li tatem len aliba Makpela leprungki koba pa meyong lir, ibaji ozü tasü mang aremdak asütsü asoshi nenok tsüngdang pai aji kü nem jenjang talang agi agütsüdakjang.”

¹⁰Tang Het nunger Efron par nisungtem den yimti süngkhüm nung mena liasü, aser Het nunger süngkhümi arua alir ajak nem angashidakja Abraham dang pai langzü,

¹¹“Nung! Kü kibur; kü dang angang, aliji aser iba nung aliba leprungkiji ni ne nem agütsür. Kü nüburtem tsüngdang ni aji ner tasü mang aremtsü asoshi ni ne nem agütsür.”

¹²Idangji Abrahami iba lima nisungtem tsüngdang apudak.

¹³Pai Efron dang linük nübur ajaki angashia ashi, “Nai mulungra kü dang angang; ni ali jenjangji ne nem agütsüdi, nai aji kü dang nungi agiang aser ozü tasü mang idakji remdi.”

¹⁴Efroni Abraham dang langzü,

¹⁵“Kü dang angang kü kibur, ali jenjangji taribi sen noklang pezü lir, saka ana tsüngda nung aji kechi asütsü? Ner tasü mang remang.”

¹⁶Abrahami Efroni ashiba ama taribi sen noklang pezü iba mapang shishirtemi amshiba ama züngzüka agütsü.

¹⁷Anungji Efroner li Makpela, Mamre anüdoklen koba liasü, aji Abraham meyong aküm. Koba nung ali, leprungki aser arrtsü meketa aliba süngdong ajak pa meyong aküm.

¹⁸Itemji par yimti süngkhüm nung sentenba Het nungertem ajaki kuli süa pai Abraham nem agütsü.

¹⁹Ajiser külen Abrahami Kanan lima nung aliba Mamre anüdoklen Makpela leprungki nung pei kinungtsü Sarah arem.

²⁰Anungji aliji aser idakji aliba leprungkiji teti asoshi Abraham nem taremdak asütsü asoshi Het chirtemi kuli mesüa agütsü.