Read njo LIPOK 24 Bible Online

LIPOK 24 - njo bible

LIPOK 24

¹Abraham joko tambur aser arishi küm aika liasü, aser KIBUBAi ajak nung Abraham moatsü.

²Pai pei kilir tongtiba shiba pa rongsen ajak madak ketdangser liasü pa dang ashi, “Ne teka kü tepi pok nung yuang[12]

³aser ni ne dang KIBUBA anüng aser ali Tsüngrem agi azüngashidaktsüdi, Kanan nunger shir den ni alir, parnok jalatem nungi kü chir Isak asoshi kibutsü tagidaktsü,

⁴Saka ozü lima aser ozü kin dangi oa kü chir Isak asoshi kibutsü ka anir arutsüla.”

⁵Kilir jagi pa dang asüngdang, “Ashiko tetsür jagi kü sülen iba lima yagi anidaka arutsü memulungra koda na kong nungi aru, iba lima jagi ni ne chir tanaben anir aotsü asü?”

⁶Abrahami pa dang langzü, “Ajiang, nai kü chir tanaben iba lima jagi anir maotsüla.”

⁷KIBUBA, anüng Tsüngrem shibai ni kübu kidang nungi aser ni tasoba lima nungi anir aru, aser shibai kü dang azüngashia shiogo, ne metsü nem ni iba lima agütsüdi, pai pei kotak tenyar ne jakdangi yoktsü, aser nai idak nungjagi kü chir asoshi kibutsü ka anir arutsü.

⁸“Tetsür jagi ne sülen arutsü memulungra, nai kü dang azüngashiba nung na atema kecha tai malitsü. Saka nai kü chir ajagi anir maotsüla.”

⁹Anungji kilir jagi pei teka Abraham tepi pok nung ayu, aser pei kiburi ashiba indang azüngashi.

¹⁰Idangji kilir jagi pei kibur ut ter renem, aser tajungtiba oset aser sempet ajak renema bener apuso, kechiaser pa Abraham rongsen ajak madak kibur liasü. Pai apusoa Mesopotamia nung aliba Nahor yimti-i ao.

¹¹Nikongtsütsü tetsürtem tzütai aoba mapang nung yimti tezülen tzübu ka anasa pai pei ut apudakdaktsü.

¹²Aser pai sarasadem, “Oh KIBUBA, kü kibur Abraham Tsüngrem, tanü anogo kü mapa nung takok agüjang, aser kü kibur Abraham dang yimlibilem sayuangma.

¹³Ajiang ni iba tzübu kümbang nung noktaka lir, aser yimti nung alir jalatem tzütai arur.

¹⁴Ya oda atalokdakjang, ni shiba dang, ‘Ni tzü tajemtsü ne mori ajungzükang’ ta ni ashidang, la shibai ‘Jemang, ano ni ne ut nema jemdaktsüdi’ ta shidir, iba tetsürji ne tenzüker jabaso Isak asoshi shimtetbaji südakjang. Iba jagi kü kibur dang nai marakzüba temeim sayuogo ta ni metettsü.”

¹⁵Pa sarasadem matem dangsa Rebeka, la tapubang nung tzü mori bener aru. Laji Abraham tenü Nahor kibutsü Milka chir Bethueli aso.

¹⁶Laji tereprangtsü tobur tajung aser tasüngtet aiür ka, shiba tebur shinga dena munguyuba tetsür ka. Lai tzübui lua tzüji mori sünga tar adok.

¹⁷Kilir jagi asema or la dang ashi, “Yimlibilema ne mori nungi kü nem tajemtsü tzü tera kua.”

¹⁸Lai ashi, “Jemang kibur” aser lai ilungseta pei tzü mori ajungzüker pa nem jemdaktsü.

¹⁹Kodang pai tzüji jemzük, lai ashi, “Ni ano ne uttem nema parnok mejemshi tashi tajemtsü tzüji tatsüdi ni?”

²⁰Lai ilunga tzü mori nungi süng su nung tzüji enok aser ut ajak mejemzük tashi tzübu nungi tzüji ata.

²¹KIBUBAi pa aeni aoba ajak azükarudaktsü asü masü ta metettsü asoshi nisungba jagi mokorai la dak repranga ata.

²²Kodang uttem tzü jemzük, nisung jagi sen aika alangba hon küri la teni nung enoktsü, aser teka nung kisen ana sepoktsü.

²³Pai ashi, “Na shir jala? Kü dang shiangma. Nebu kidang onok asoshi tanendak peria lir ma?”

²⁴Lai pa dang langzü, “Ni Milka chir Bethuel jala shiba Nahor nem sotsü.”

²⁵Ano lai ashi, “Onok monü aser rem teperi lir, aser na asoshi tanendak taktang lir.”

²⁶Idangji nisung jagi apudaka KIBUBA dang külem.

²⁷Pai ashi, “Kü kibur Abraham KIBUBA Tsüngrem tenüng sangang, shibai kü kibur tsütsü pei takang temeim aser temulung lemtetba ayu. KIBUBAi nia kü kibur kinunger kidangi indang-indanga len ania aruogo.”

²⁸Idangji aiürlai asema oa la tetsü kibong dang item o ajak ashi.

²⁹Rebeka tedi ka tenüng agi Laban liasü, aser pai tzübu len jagi nisung dangi asema ao.

³⁰Kodang Labani pei tenu Rebeka ket nung kisen aser küriji angu, aser nisungba jagi item o kü dang ashi ta lai jembiba otemji pai angashi, paia nisungba dangi ao aser ajiang paji uttem den tzübu anasa noktaka liasü.

³¹Pai ashi, “Arung, na KIBUBAi moatsüsang, kechiba na idaki noktaker? Ni ozü kidang na aser uttem atema tanendak teperi renema lir.”

³²Anungji nisung jagi kidangi atu, aser Labani ut khu abenbaji sala-a uttem nem monü aser rem agütsü, aser pa den alirtem asoshi tetsüng shitoktsü tzü agütsü.

³³Kodang pa dangi chiyungtsü bener aru, pai ashi, “Ni kü osang mashi tashi ni kecha machitsü.” Labani ashi, “Na kechi tashitsü aka shiangma.”

³⁴Anungji pai ashi, “Ni Abrahamer kilir,

³⁵KIBUBAi kü kibur kanga moatsüogo, aser pa takar aser tulur kümdaktsüogo. Pai pa nem san telok, nabong aser nashi telok, taribi aser hon, alartem, ut aser gadotem agütsüogo.

³⁶Aser Sarah kü kibur kinungtsüi la asa taoi pa nem jabaso ka sotsü, aser kü kiburi pa jabaso nem pa akaba ajak agütsüogo.

³⁷Aser kü kiburi kü dang azüngashidakja ashi, ‘Nai Kanan nungertem shirnok rongnung ni alir, parnok jalatem nungi kü jabaso asoshi kibutsü asütsü shinga tagidaktsü.

³⁸Saka nai kübu kinunger aser kü kin dangi oa pa asoshi kibutsü ka anir arungma.’ ”

³⁹Idangji ni kü kibur dang asüngdang, “Saka tetsürlai kü den marunüra koda?”

⁴⁰Pai kü dang langzü, “KIBUBA shiba tsüngdang ni teti jajar, pai pei tenyar ne den yoktsü aser ne lenmang azükarutsütsü aser takok agütsütsü. Nai kü jabaso asoshi kibur kinunger aser kü kin nungi kibutsü anir arungma.

⁴¹Na kü kinungertem dangi oa parnoki ne nem pei jala magütsüra idangji iba azüngashiba nung na kecha tai malitsü.”

⁴²Tanü ni tzübu jagi arua sarasadem, “Oh KIBUBA, kü kibur Abraham Tsüngrem, nai dang kü aeni aoba azükarudaktsüra,

⁴³ajiang ni tzübu anasa noktaka lir. Kodang aiürtem tzütai arudir, aser shiba dang yimlibilema ne tzü mori nungi kü nem tajemtsü tzü kua ta ni shidir,

⁴⁴aser lai kü dang, jemang, aser ni ne uttem nema tzü tatsüdi ta shidir, laji nai kü kibur jabaso asoshi shimtetbaji südakjangma.”

⁴⁵Kü mulung nung sarasadem matemdang ajiang, Rebeka la tapubang nung tzü mori bener arua tzübui ai, aser lai tzü ata. Ni la dang ashi, “Yimlibilema kü nem tzüji jemdakjang.”

⁴⁶Lai ilunga tzü moriji pei tapubang nungi ajungzüka ashi, “Jemang, aser ni ne uttem nema jemdaktsüdi.”

⁴⁷Ni la dang asüngdang, “Na shir jala?” Lai langzü, “Ni Nahor aser Milka chir Bethueler jala.” Idangji ni la teni nung küri enoktsü aser teka nung kisenji sepoktsü.

⁴⁸Ni apudaka KIBUBA dang külem, aser KIBUBA, kü kibur Abraham Tsüngrem shibai kü kibur tenu jala par jabaso agitsü atema ni lenmang shitaki anir aruba Tsüngrem tenüng asang.

⁴⁹Tang nenoki kü kibur dang aochia aser temeim sayutsü kü dang shiangma. Aji oda mesüra ni tajichileni mesüra tabeleni meyiptsü.

⁵⁰Idangji Laban aser Bethueli langzü, “Ibai KIBUBA nungi lir, onoki ne dang tajung saka tamajung saka kecha meshitet.

⁵¹Rebeka ne jakdang lir, la anir oang, aser KIBUBAi ashiba amaji la ne kibur jabaso kinungtsü kümdakjangma.”

⁵²Kodang Abraham kiliri parnok oji angashi, pai apudaka KIBUBA dang külem.

⁵³Pai Rebeka nem hon, taribi, senti lung, aser süoshi bener arua agütsü, aser la tedi aser tetsü nem jenjang aika alangba sempettem agütsü.

⁵⁴Idangji Abraham kilir aser pa den aliba nisungtemi chia ajem aser paonungji idakji anen. Aser anepdang saaker pai ashi, “Ni kü kibur dangi meyipa yokangma.”

⁵⁵Saka la tedi aser tetsüi langzü, “Aiürlaji anogo ternü shi onok den lidakjang, ajiser lai aotsü akok.”

⁵⁶Saka pai parnok dang ashi, “Ni tenokdangma, kechiaser KIBUBAi kü aeni aoba azükarudaktsüogo. Ni kü kibur dangi meyipa yokangma.”

⁵⁷Parnoki langzü, “Onoki aiürla jar asüngdangdi.”

⁵⁸Anungji parnoki Rebeka jar la dang asüngdang, “Nai iba nisung den onüra ma?” Lai langzü, “Ni aotsü.”

⁵⁹Anungji parnoki tenu Rebeka aser lar kilitsür, Abrahamer kilir aser par nisungtem pila-a yok.

⁶⁰Aser parnoki Rebeka moaja ashi, “Tenü, na meyirijangsa meyirijang ter tetsü kümangma! Aser ne semchiri parnok tsükchir yimtitem agidakjangma.”

⁶¹Idangji Rebeka aser lar aiürtem apusoa ut nung amen, aser nisungba sülenji anitak. Aji oda Abraham kilir jagi parnok pei lenmangi anir ao.

⁶²Tang Isak Beer-lahaih roi arem len nungi aru, kechiaser pa anüolentip Negeb lima nung liasü.

⁶³Nikongdang Isaki sarasadema bilemdangtsü asoshi alupuleni ao, aser pai pei tenük rangketa yok nung uttem aruya angu,

⁶⁴Rebekai pei tenük roka asoa reprang, aser kodang lai Isak angu, lai ut nungi alu,

⁶⁵aser Abraham kilir dang asüngdang, “Oagi alupu nung asenok den ajuruteptsü aruya alibaji shiba?” Kilir jagi langzü, “Paji kü kibur.” Anungji lai temeibangba sü agiteta la süko mei.

⁶⁶Idangji kilir jagi Isak dang pai kechisa inyak item ajakji atonga ashi.

⁶⁷Aser Isaki pei tetsü Sarah süki-i Rebeka aniok aser la pa kinungtsü aküm aser pai la dang meim aser pei tetsü sür külen pa mulung sünepa ali.