Read njo LIPOK 25 Bible Online

LIPOK 25 - njo bible

LIPOK 25

¹Abrahami tetsür tanga ka agi, la tenüng Ketura liasü.

²Lai pa nem Zimran, Yokshan, Medan, Median, Ishbak, aser Shua sotsü.

³Yokshan nungi Sheba aser Dedan jakzük. Dedan nungi Ashurim letushim aser Leumim jakzük.

⁴Midian chirtem Efa, Efer, Hanok, Abida, aser Elda. Item ajak Ketura chirnurtem liasü.

⁵Abrahami pa akaba ajak Isak nem agütsü,

⁶Saka tangar tetsür ajanga asoba chir nem sempet agütsü. Aser pa taküm alidangsa pei chir Isak nungi aenshia parnok anüdoklen lima yok.

⁷Abraham arishi küm noklang ka ser neter pungu liasü.

⁸Aser pa arishi tetemsü tambur aser küm agi teperi lir asü aser pei pur den aden.

⁹Pa chirtem, Isak aser Ishmael nati Mamre jakdang aliba Het nunger Zoar chir Efron li Makpela leprungki nung pa arem,

¹⁰ koba ali Abrahami Het nunger dang ali, idakji Abraham aser pa tebutsü Sarah arem.

¹¹Abraham sür külen Tsüngremi Isak moatsü, aser Isaki Beerlahai-roi nung ali.

¹²Itemi Abraham chir Ishmael dak jakzükbatem, shiba Abraham tebutsü Sarah kilirla Ijiptsür Hagari Abraham nem sotsü.

¹³Ishmael chirtem tatongi parnok tenüngtem itemi. Ishmael mezüng chir Nebaiot, Kedar. Abdeel, aser Mibsam,

¹⁴Mishma, Duma, Masa,

¹⁵Hadad, Tema, Yetur, Nafis aser Kedema.

¹⁶Itemji Ishmael nungi jakzükbatem kin terana, parnok yim aser pei talidak agi parnok tenüng aküm.

¹⁷Ishmael arishi küm noklang ka ser semer-tenet ali aser pa asü, aser pa pei pur den aden.

¹⁸Ishmael dak jakzükbatem Havila nungi Shur arrtsü koba Asiria leni aoba Ijip anüdoklen lima nung pei adianutem nungi pila-a ali.

¹⁹Abraham chir Isak putu ya. Abrahamji Isak tebu liasü.

²⁰Isak küm lir alidang Padan-aram nungi Aram nunger Bethuel jala Rebeka, Laban tenu pai pei kibutsü asütsü agi.

²¹Isaki pei kibutsü Rebeka asoshi KIBUBA dang mepishi, kechiaser la tapung liasü. KIBUBAi pa sarasadem langzü, aser Rebeka mashisa aküm.

²²Lai jakrep chir asoba tanurtemji la nu menden nung toktep, aser lai ashi, “Yamaisa lirabang kechiba ni taküm alir?” Anungji lai KIBUBA dang asüngdangtsü ao.

²³KIBUBAi la dang ashi, “Ne nu menden nung kin ana lir, kin ana ne nu menden nungi pilatsü, kin ka kin tanga dang nungi tashi taitba alitsü, tambui tanubuji tenzüktsü.”

²⁴Kodang la nu amungtsü anogo atong, ajiang, la nu menden nung jakrep chir tebur ana liasü.

²⁵Mezüngbuba tereprangtsüji temerem temang ajak ku agi meibanger aso, anungji parnoki pa tenüng Esau[13] ta aja.

²⁶Kodang tanabubaji aso, pa teka Esau shibalang nung ameta liasü, anungji pa tenüng Yakob[14] ta aja. Tena asodang Isak küm roker tain liasü.

²⁷Kodang tanur anaji ain, Esau mongyin shirishir arem yatar nisung liasü, aser Yakob ajemaluba nisung aser süki nung ali.

²⁸Isaki Esau meim kechiaser Esaui kasetba mesü shi pai achi. Saka Rebekai Yakob meim.

²⁹Kenü Yakob luli aon soya alidang Esau arem nungi lumiseter adok.

³⁰Pai Yakob dang ashi, “Kü nem iba aon temeremji chidakjang, kechiaser ni lumiseta lir.” Ibayongji pa dang Edom[15] ta aja.

³¹Yakobi langzü, “Tamasa kü dang nai pei tambu senmangji yokang.”

³²Esaui ashi, “Reprangang ni tasütsü anasa lir, kü tasoba tambu senmang agi kü nem kechi ajangzüktsütsü?”

³³ Yakobi langzü, “Tamasa nai aji kü nem agütsütsü azüngashiang.” Idangji Esaui pei tasoba tambu senmangji Yakob nem agütsütsü ta azüngashi.

³⁴Aser Yakobi pa nem am tera aser luli asoba aon agütsü. Aser pai aji chia jemer külen pei lenmangi ao. Aji oda Esaui pa tasoba tambu senmangji sensamasatsü.