Read njo LIPOK 26 Bible Online

LIPOK 26 - njo bible

LIPOK 26

¹Abraham tendak atalokba mezüng ayawara dak alema iba lima nung ano ayawara ka liasü. Anungji Isaki Filistia nunger chuba Abimelek dangi Gerari ao.

²Aser KIBUBA pa dangi jungkai adoka ashi, “Ijip limai tetu, ni ne dang kechi lima sayudir idakjiang liang.

³ Iba lima nungji mungang. Ni ne den alitsü, aser na moatsütsü. Ne nem aser ne semchirtem nem ni item linüktem ajak agütsütsü, aser ne semchir nem iba linük ajak nebu Abraham dang ni kechi nangzük, ibaji ni atalokdaktsütsü.

⁴Aser ni ne semchirtemji anüng petinutem ama rendaktsüdi aser ne semchir nem item linük ajak ni agütsüdi aser ni parnok agi alima kintem ajakji moatsütsü.

⁵Kechiaser Abrahami kü o tashi anga, aser kü temelaba ozüngtem aser kü tesayubatem ajak nung tashi anga-a benshi.”

⁶Anungji Isaki Gerar nung ali.

⁷ Kodang iba linük nung aliba nisungtemi pa tebutsü indang asüngdang pai langzü, “Laji künu,” kechiaser “La kübutsü” ta ashitsübaji pai tsübu. Kechiaser pai bilem oda iba linük nisungtemi Rebeka meji ni tepsettsü, kechiaser la tobur tajung liasü.

⁸Kodang Isaki idakji talangka amung, Filistia nunger chuba Abimeleki kichiba nungi repranga alidang Isak tebutsü Rebeka den asayatepa angu.

⁹Anungji Abimeleki Isak jar pa dang ashi, “Ajiang, atangji la ne kibutsü! Kechiba nai la künu ta ashir?” Isaki langzü, “Kechiaser ni laji kübutsü ta ashi nungbo ni asütsü ta ni bilem.”

¹⁰Abimeleki pa dang ashi, “Nai onok dang inyakba ya kechi? Nisung kari nebutsü den yiptetla, aser aji agi nai onok madak tai bener arutsüla.”

¹¹Anungji Abimeleki nisungtem nem ozüng agüja ashi, “Shirisa iba nisung mesüra tebutsü dak teka idir, atangji paji südaktsütsü.”

¹²Iba kümji Isaki iba linük nung metsü yok, aser noklang bena aru, kechiaser KIBUBAi pa moatsü.

¹³Aser pa kanga takar aküm aser kanga merena maküm tashi paji tali tali azükarua züin.

¹⁴Pa san telok, nashi telok aser kilirtem den kechisarena akaba nisung asünung Filistia nungertemi pa dak tenük merema aküm.

¹⁵Pa tebu kilirtemi Abraham mapang atuba tzübu ajakji Filistia nungertemi tubangja ali agi süngtsü.

¹⁶Ano Abimeleki Isak dang ashi, “Ozü lima nungi apusoa oang, kechiaser na onok dang nungi tashi tuluba kümogo?”

¹⁷Anungji Isaki iba linük nungi aenshia or Gerar lenten nung kenpiga ali.

¹⁸Pa tebu Abrahami atuba tzübutem koba Abraham sür külen Filistia nungeri tubangtsü item tzübuji Isaki tanaben tushi aser tebui koba tenüng agi iba tzübu dang aja, paia kasa tenüngji aja.

¹⁹Isak kilirtemi lenten nungji atu, tzü temerük apokdak tzübu ka tutet.

²⁰Saka Gerar nunger sannükertemi Isak sannükertem den tzübu jagi raktepa ashi, “Tzüji onok meyong lir.” Anungji Isaki tzübu tenüngji Esek ta aja, kechiaser parnoki pa den raktep.

²¹Ajiser parnoki ano tzübu tanga ka atu aser parnoki iba jagia raktep, anungji pai iba tzübu tenüngji Sitna ta aja.

²²Yang nungjagi pila-a or pai ano tzübu tanga ka atu. Saka ibaji anema shingaia pa den meraktep, anungji pai iba tzübu tenüng Rehobot ta aja. Pai ashi, “Kechiaser tangbo KIBUBAi asen asoshi linük tasen ka agütsüogo, aser asenok linük nungji rena alitsü.”

²³Yang nungjagi pai Beershebai atu,

²⁴paonungji KIBUBAi pa dangi jungkai adoka ashi, “Ni nebu Abraham Tsüngrem lir. Tetsübuma, kechiaser ni ne den lir. Kü tenzüker Abraham asoshi ni na moatsütsü, aser ne semchirtem rendaktsütsü.”

²⁵Anungji Isaki idakji tenladak sabang ka yanglu aser KIBUBA dang külem. Idakji pai süki asü, aser pa kilirtemi tzübu ka atu.

²⁶ Idangji Abimeleki pa teyarir Ahuzat aser pa temeranger telok arkotong Fikol den Gerar nungi apusoa Isak dangi aru.

²⁷Isaki parnok dang ashi, “Nenoki ni sempa aser nenoki ni yokadok sürnung nenok kechiba kü dangi arur?”

²⁸Parnoki langzü, “KIBUBA ne den lir ta onoki jangja jangjaa angur, aser asenok tsüngda nung tezüngzüktepba takang ka ayutsü nüngdak ta onoki ajiteter. Anungji ne den onoki tezüngzüktepba ka yangludi.

²⁹Oda onoki ne dang junga benshiba aser yimjung nung na yokba ama naia onok dak tamajung kecha meinyaktsü. Kechiaser KIBUBAi na moatsüogo.”

³⁰Anungji Isaki parnok asoshi benjong ka yanglua, parnoki chia ajem.

³¹Tasüngnepji parnoki yakta shishia kati ka den azüngashitep, aser Isaki pei lenmangi parnok yok, aser parnoki yimjung nung Isak nungi pila-a ao.

³²Panüjisa Isak kilirtemi arua parnoki tzübu atuba indang pa dang ashi, “Onoki tzü nguogo.”

³³Isaki iba dangji Sheba ta aja. Anungji tanü tashi iba yimti dang Beersheba ta ajar.

³⁴Kodang Esau küm lir tain aküm, pai tetsür ana; Het nunger Beeri jala Yudi aser Elon jala Basemat pa kibutsü asütsü agi.

³⁵Iba yagi Isak aser Rebeka temulung kanga kuremdaktsü.