Read njo LIPOK 27 Bible Online

LIPOK 27 - njo bible

LIPOK 27

¹Joko Isak tambur liasü aser pa tenük rabanger mungui aküm. Pai pei chir tambusang Esau jar pa dang ashi, “Tebusang!” Esaui pa dang langzü, “Oba koda?”

²Isaki ashi, “Ajiang ni joko tambur lir aser tasütsü anogo ni memetet.

³Anungji ni ne dang mepishir, ne lijak aser lijakjang bener aremi oa mesü shi bener arung.

⁴Ni chinüba ama ni achitsü kü tebang dang sapuba chiyungtsü renema bener kü dangi arung, aser ni itemji chir külen ni masüdangsa na moatsüdi.”

⁵Isaki pei chir Esau den jembiba ajakji Rebekai anga-a liasü. Anungji kodang Esau aremi mesü shi abeni ao,

⁶lai pei chir Yakob dang ashi, “Ina, nebui nedi Esau dang oda jembiba ni angashiogo.

⁷‘Ni asoshi mesü shi bener arua ni sapuba ama chiyungtsü renemang, aser aji chir ni masüdangsa na KIBUBA matsüngdang moatsüdi.’

⁸Anungji kü chir, ni ashiba o angang, aser ni kechisa shidir nai aji inyakangma.

⁹Tang san telok dangi oa idak nungjagi techanu tajung ana kü nem bener arujang, aser ni iba nungi nebui chinüba ama ni pa bangdang sapuba ama renemtsüdi.

¹⁰Nai nebu dangi aji bener oang aser pai aji chir pa masüdangsa na moatsütsü.”

¹¹Saka Yakobi tetsü dang ashi, “Ajiang küdi Esau ku agi pungbanga lir, saka nibo teküp tesüsü.

¹²Ashiko kübui kü dak meyimdangtsü südi, aser pa madang ni tekülakba ama akümtsü, aser pai kü dak temoatsü masü, atakatemang benloktsü.”

¹³Tetsüi pa dang ashi, “Kü chir, ne atakatemji kü dak liang, kü o anga-a item kü dangi bener arung.”

¹⁴Anungji pai or itemji pur tetsü dangi bener aru, aser lai aji pa tebui chinüba ama pa bangdang sapuba ama renem.

¹⁵Lai pei chir tambusang Esau süoshi tajungtiba koba lai kidang yua liasü, aji Yakob dak semoktsü.

¹⁶Aser pa teka aser tekong nung san teküpji semoktsü.

¹⁷Aser pa bangdang sapuba chiyungtsü koba lai renem aji am den külemi Yakob ket nung agütsü.

¹⁸Pai tebu dangi arua ashi, “Oba!” Tebui langzü, “Ni yangi lir, na shiba kü chir?”

¹⁹Yakobi langzü, “Ni Esau, ne mezüng asoba, nai kü dang ashiba ama ni inyakogo. Tang yimlibilema na shishia menang aser nai ni moatsütsüsa mesü shi chiangma.”

²⁰Isaki pei chir dang asüngdang, “Kü chir nai ya kodaser yakta angu?” Yaboki langzü, “Kechiaser ne Tsüngrem KIBUBAi kü mapa nung takok agütsü.”

²¹Isaki Yakob dang ashi, “Ni anasai arungjong, ni ne dak kongshia na atangji kü chir Esauji asü masü-ar metettsü.”

²²Anungji Yakobi tebu anasa ao aser tebui pa dak kongshia ashi, “Olabo Yakob ola, saka tepenbo Esau tepen.”

²³Pai Yakobji meshiteti liasü, kechiaser pa tepen dak Esau ama tezüng meyir liasü, aser pa moatsütsü mapang nung,

²⁴pai ano tanaben asüngdang, “Na atangji kü chir Esau ama?” Pai langzü, “Ni pa.”

²⁵Idangji Isaki ashi, “Kü chiri renemba mesü shiji chir külen na moatsütsüsa aji kü dangi bener arung.” Yakobi itemji pa anasai bener arua pa nem chidaktsü, aser ano pa nem yi bener arua jemdaktsü.

²⁶Idangji Isaki pa dang ashi, “Anasai arua kü dak tebang mesepang kü chir.”

²⁷ Anungji pai tebu dak tebang meseptsü aodang, Isaki pa süoshi züknem menem aser pai pa moaja ashi, “Ah, ajiang kü chir züknem KIBUBAi moatsüba arem temenemtsü amato.

²⁸Tsüngremi ne nem anüng azüngtzü nungi, aser alima tesola rongsentem, tsük aser yi jenti agüjangma.

²⁹Nisungtemi ne dang tenzükang, kintemi ne madang apudakang. Ne adianu madak na kibur sangma. Netsü chiri ne madang apudakang, Shirnoki na atakatemdir, parnokji atakatem sangma. Shirnoki na moatsüdir, moajangma.”

³⁰Isaki Yakob moatsütemer külen, Yakobi tebu madang nungi pila-a oli dang, tedi Esau shikai aoba nungi adok.

³¹Paia tebu tebang dang sapuba chiyungtsü renema bener tebu dangi arua ashi, “Oba yimlibilema shishiang aser ni bener aruba mesü shi chir ni moajangma.”

³²Pa tebu Isaki asüngdang, “Na shiba?” Pai langzü, “Ni ne mezüng asoba jabaso Esau.”

³³Isaki kanga atenten aser ashi, “Sürabang shibai mesü shi kü dangi bener aru? Aser na marudang ni pa nungi aji chir kü tatembang temoatsütem pa nem agütsüogo, hau aji tatem makai pa temoatsü alitsü.”

³⁴Kodang Esaui tebu oji angashi, pai kukua aser tashi agi ajeb aser tebu dang ashi, “Nia moajangkoto Oh oba!”

³⁵Saka Isaki langzü, “Nenui ashikülaka arur ne shilem temoatsüji bener ogo.”

³⁶ Esaui ashi, “Atangji pa tenüng Yakob ta maja no? Kechiaser tan agi tanaben tekülak agi pai kü meyong rakzüka agir. Pai kü tasoba tambu senmang bener ao aser tang ajiang pai kü temoatsü bener ogo. Ni atema temoatsü ka danga nai yua mali no?”

³⁷Isaki Esau dang langzü, “Ni pa ne madak kibur kümdaktsüogo, aser pa adianutem ajak pa kilirtem kümdaktsüogo. Ni pa nem tsük aser yi agütsüogo. Ajangla kü chir tang ni na asoshi kechi inyaktsü?”

³⁸ Esaui tebu dang maneni mepishia ashi, “Na temoatsü ka danga mali ama oba? Nia moajangkoto Oh oba!” Aser Esaui tashi agi ola adoka ajeb.

³⁹ Idangji Isaki pa dang ashi, “Ajiang ne talidakji alima tesola rongsentem nungi pila-a, anüng temalen azüngtsü nungi na pila-a alitsü.

⁴⁰Na nok agi taküm alitsü, aser nai nenu tenzüktsü. Saka kodang nai pei nüji tiaji ngudir, nai pa yongrak ajak ne tekong nungi pungtoktsütsü.”

⁴¹Tang tebui Yakob nem temoatsü ajak agüjadokba yong Esaui Yakob sempa-a pei sasa süngzüka temulung nung ashi, “Kübu asoshi mangyimba anogotem tatonger, iba sülen ni künu Yakob tepsettsü.”

⁴²Saka kodang Rebeka dang lar chir tambusang Esau o metetdaktsü, lai pei chir Yakobji jar ashi, “Nedi Esaui na tepsettsü renema pa sasa süngzükdagi.

⁴³Anungji tang kü chir, ni ne dang kechi o shidir aji angang. Na aramesoa Haran nung küdi Laban dangi jenang,

⁴⁴nedi mit adoka rasabaji süngzüka maküm tashi idakji kenpiga liang.

⁴⁵Na anema nedi ain adokbaji mesüngzük tashi aser nai pa dang kechi inyak pai mamadok tashi, aser idangji ni na tajai yoktsü. Kechiba ni kü jabaso anaprongla kenüyongi samatsütsü.”

⁴⁶Ajiser Rebekai Isak dang ashi, “Ni item Het nunger Esau kinungtsürtem agi alaker. Yakobia iba Het nunger tetsürtem nungi pa kibutsü asütsü agirabang ni taküm aliba tajangzük maka.”