Read njo LIPOK 28 Bible Online

LIPOK 28 - njo bible

LIPOK 28

¹Idangji Isaki Yakob aja aser moaja ashi, “Kanan tsürtem rongnungi kibutsü asütsü nai magitsüla.

²Saka Padan-Aram nung nebou Bethueler yimtaki oa netsü tedi Laban jalatem rongnungi tetsür ka agiang.

³Aser ajak Takoksang Tsüngremi na moajang, aser na rendakjang, aser azükarudakjang; na agi aika tebu kümdakjang.

⁴ Abraham temoatsütem na aser ne semchir nem KIBUBAi agüjang, aser iba lima, koba pai Abraham nem agütsü, kong na amunger aji na agitsü.”

⁵Isaki Yakob Padan-Aram nung Bethuel chir Laban, shiba Rebeka tedi, Yakob aser Esau tetsü liasü, pa dangi yok.

⁶Tang Isaki Yakob moatsür Padan-Arami kinungtsü ka shimtsü pa yok, aser pai pa moatsüdang nai Kanan jala rongnungi tetsür tagima ta pa dang melaba,

⁷aser Yakobi tebu o tetsü na dang anga-a Padan-Arami ogo ta Esaui metet.

⁸Kodang Esaui Kanan jalatem agi, tebu Isak mulung mechi-i angu,

⁹anungji Esau Ishmael dangi oa pei mezüng aliba kibutsü alema Abraham chir Ishmael jala Nabaiot tenu Mahalat pa kibutsü asütsü agi.

¹⁰Yakobi Beersheba nungi aenshia Haran leni ao.

¹¹Anü lur külen pai temeshi tesem kati arua idakji anen, aser pai lung ka dak pa tekolak metaloker idakji mejang.

¹²Pai pungmang ka pungmang, aser ajiang, apu ka alima nung lar iba tebanglak jagi azüklen kotak tashi atong; aser Tsüngrem tenyar iba nungji tuli aluli ta angu.

¹³ Aser ajiang, temalen KIBUBAi noktaka ashi, “Ni KIBUBA, Abraham Tsüngrem, Isak Tsüngrem. Koba ali nung na noktaka lir aji ni ne nem aser ne semchirtem nem agütsütsü.

¹⁴ Ne semchirtemji alima lisem ama akümtsü, aser naji anüdoklen nungi anüolen, anüdoklentip nungi anüolentip tashi züina aotsü. Na aser ne semchirtem agi ni alima kintem ajak moatsütsü.

¹⁵Ajiang, ni ne den alitsü, aser na kolenisa odir ni na kümzüktsü ta bilemtetang, aser ni na iba lima yagi tanaben anir arutsü. Ni ne dang nangzükba ajak meinyak tashi ni na metoktsütsü.”

¹⁶Idangji Yakobi pa mejangba nungi saker ashi, “Atangji KIBUBA yangi lir, aser ni aji memeteti liasü.”

¹⁷Pai tsübuadok aser ashi, “Ibai koda tetsübutsüka! Ya tanga kechia masü, Tsüngrem ki, aser ibai kotak kikümbang.”

¹⁸Anungji Yakobi anepdang yakta shishir pai pa tekolak atalokba lungji temaitsü ka asoshi azüng, aser iba nung pai totzü shiloktsü.

¹⁹Iba linük dang pai Bethel[16] ta aja, saka tamasabo iba yimti tenüng Luz liasü.

²⁰Anungji Yakobi azüngashiba ka yanglua ashi, “Tsüngrem kü den lirabang aser ni aoba lenmang nung pai ni kümzükrabang aser tachitsü asoshi amtsük aser tabentsü asoshi süoshi agütsürabang,

²¹aser ni tanaben kidangi yimjung nung anir arutsüra, idangji KIBUBAji kü Tsüngrem asütsü.

²²Koba lung temaitsü asoshi ni azüngogo, ibaji Tsüngrem külemdak asütsü, aser nai kü nem agütsüba ajak nungi shilem ter nungi ka ni ne nem agütsütsü.”