Read njo LIPOK 29 Bible Online

LIPOK 29 - njo bible

LIPOK 29

¹Idangji Yakobi pei lenmang nung jaja-a, anüdoklen alir limai aru.

²Pai reprang aser moapu nung tzübu ka, aser idakji san telok asem iba anasa liasü. Kechiaser iba tzübu nungi parnoki san nem tzü jemdaktsü, aser tzübubang nung aliba lungji tulu liasü.

³Kodang san telok ajagi sentepdir, sannükertemi lungji mekeptoker santem nem tzü jemdaktsür lungji tanaben tzübubang nungji ayu.

⁴Yakobi parnok dang asüngdang, “Kü adianutem, nenok kong nungi?” Parnoki langzü, “Onok Haran nungi.”

⁵Pai ano parnok dang asüngdang, “Nenoki Nahor chir Laban metet asü?” Parnoki langzü, “Hau onoki meteter.”

⁶Pai asüngdang, “Pa junga lir ma?” Parnoki langzü, “Pa junga lir, aser reprangang par jala Rachel san telok den arudagi.”

⁷Yakobi ashi, “Ajiang ano anü talangka lir, aser santem anitentsü mapang ano matong; kechiba nenoki parnok nem tzüji jemdaktsür chimdaki anir maor?”

⁸Saka parnoki langzü, “Santem ajak külemi mesentep tashi aser tzübubang nungi lungji memekeptok tashi onoki yamaji inyaktsü makok. Kodang san ajak sentepdir idangji ang onoki santem nem tzüji jemdaktsür.”

⁹Yamaji Yakob parnok den alidang Rachel tebu-er san telok den aru, kechiaser la tebu-er sannüker liasü.

¹⁰Kodang Yakobi pa tetsü tedi Laban jala Rachel den la tetsü-er san telokji angu, pai tzübubang lenjagi oa lungji mekeptok aser santem nem tzüji jemdaktsü.

¹¹Idangji pai la dak tebang mesep aser ola adoka ajeb.

¹²Pai Rachel dang “Paji tebu kinunger aser Rebeka chir ta ashi.” Idangji lai asema oa tebu dang aji ashi.

¹³Kodang Labani pei tenu chir Yakob indang osang angashi, pai pa den ajuruteptsü asema ao aser pa dak azüiter tebang mesep, aser pa pei kidangi anir aru. Yakobi Laban dang kechisa atalok item ajak ashi.

¹⁴Labani pa dang ashi, “Atangji na kü shi aser kü teret lir” aser pa den ita ka songtema ali.

¹⁵Labani Yakob dang ashi, “Na kü kinunger asüyongkela angati dang nai ni tenzüktsü no? Ne taa kechi asütsü kü dang shiang.”

¹⁶Tang Laban jala ana liasü. Tantsüla tenüng Lea aser tanutsüla tenüng Rachel.

¹⁷Lea tenük tashi mait liasü, saka Rachel tereprangtsü tobur tajung temeimtsü ka liasü.

¹⁸Yakobi Rachel meim, anungji pai ashi, “Ne jala tanutsüla Rachel asoshi ni ano küm tenet tenzükdi.”

¹⁹Idangji Labani langzü, “Ni la tangar ka nem agütsüdang nungibo ne nem ang agütsüdi, ni tenzüka liang.”

²⁰Anungji Yakobi Rachel asoshi küm tenet Laban tenzük, saka aji anogo ishika ama dang pai bilem, kechiaser pai la meim.

²¹Idangji Yakobi Laban dang ashi, “Ni na tenzükba mapang abensaogo, ne jala kü kibutsü asütsüsa aser ni la dangi aitsüsa kü nem agüjangma.”

²²Anungji idakji alir nisungtem ajak anitena benjong ka agütsü.

²³Saka aonung pai pei jala Rachel melen Lea Yakob nem agütsü, aser Yakobi la dangi ai.

²⁴Aser Labani Lea nem kilitsür asoshi Zilpa agütsü.

²⁵Anepdang akümdang ibaji Lea ta Yakobi angu, anungji pai Laban dang ashi, “Nai kechiba kü dang yamai benshir? Ni Rachel atema na metenzük no? Kechiba nai ni külakoktsü?”

²⁶Labani langzü, “Tantsüla dang tamasa tanutsüla kibong küma yoktsübaji iba lima yimsü masü.

²⁷Tetsür aniokba abensa-ang, aser ni Rachel ne nem agütsüdi, shiba asoshi nai ni ano küm tenet tenzüktsüla.”

²⁸Yakobi hai-haura aka aser iba kiyimba benjong haptaji abensadaktsür külen Labani pei jala Rachel pa kibutsü asütsü agütsü.

²⁹Labani pei jala Rachel nem kilitsür asütsü asoshi Bilha agütsü.

³⁰Anungji Yakobi Rachel den medem aser pai Lea dang nungi la tali meim. Aser pai ano Laban küm tenet tenzük.

³¹Kodang Yakobi Lea dangbo Rachel temeimba ta KIBUBAi angu, pai Lea nu menden lapoktsü, saka Rachelbo tapung liasü.

³²Lea mashisa aküm aser tebur ka aso aser lai ashi, “KIBUBAi kü timtem angu, aser tang kü kinungpui kü dang meimtsü.” Anungji lai tanur tenüngji Reuben[17] aja.

³³La ano mashisa aküm aser tebur ka aso aser lai ashi, “KIBUBAi kü nem iba jabaso agütsüogo, kechiaser kü dang sempaba pai angu.” Anungji lai tanur tenüngji Simeon[18] aja.

³⁴Ano la mashisa aküm aser tebur ka aso. Lai ashi, “Tangbo kü kinungpui kü dak sakloktsü, kechiaser ni pa nem tebur asem sotsüogo.” Anungji lai tanur tenüngji Levi[19] aja.

³⁵Aser ano la mashisa küma, tebur ka aso. Lai ashi, “Tangbo ni KIBUBA tenüng sangdi.” Anungji lai tanur tenüngji Yihuda[20] aja. Aser lai tanur asoba anenadok.