Read njo LIPOK 3 Bible Online

LIPOK 3 - njo bible

LIPOK 3

¹ Tang KIBUBA Tsüngremi yangluba arem shiruru ajak dang perji tekülakba liasü. Pai tetsürla dang asüngdang, “Atangji atsüki nung aliba süngdong kecha nungia techi ta Tsüngremi ashi na?”

²Tetsürlai langzü, “Atsüki nung aliba süngjang ajak onoki chitet,

³saka süngdong koba atsü tiyong nung lir, iba süngjang techi aser tekongshi ta Tsüngremi ashi, aji mesüra ashiko nenok asütsü.”

⁴Peri tetsürla dang ashi, “Nenok atangji masütsü.

⁵Kechiaser koba anogo nung nenoki ibaji chidir nenok tenük lapoktsü aser nenok Tsüngrem ama tajung tamajung meteta akümtsü ta Tsüngremi metet.”

⁶Kodang tetsürlai iba süngjangji tachitsü asoshi tajung aser jangratemtsüka la nükdang ibaji angu, aser shisa kaa kümdaktsüba süngjangji nükshia lai süngjangji achi; aser lai pei kinungpu nema agütsü aser paia aji achi.

⁷Tenati ibaji chizükli idangjisa tena tenük lapok aser tena mangsa ta meteta aküm; anungji mungu to arütepa tena temang nembang.

⁸Nikongtsütsü tenati KIBUBA Tsüngrem atsüki nung jajaba angashi, aser tenati pa tsüngdang nungi atsüki süngdong züng nung atsüka ali.

⁹Saka KIBUBA Tsüngremi nisung dang ja-a ashi, “Na kong lir?”

¹⁰Pai langzü, “Atsüki nung ne ola ni angashir ni tsübua atsüka lir, kechiaser ni mangsa lir.”

¹¹KIBUBA Tsüngremi ashi, “Na mangsa ta shibai ashi? Ni ne dang techi ta ashiba süngjangto nai achi asü?”

¹²Nisungba jagi langzü, “Tetsür shiba nai kü den alitsü agütsü, lai iba süngjang kü nem agütsü aser ni aji chiogo.”

¹³ KIBUBA Tsüngremi tetsürla dang asüngdang, “Nai ya kechiba inyak?” Lai langzü, “peri ni külakoktsü, aser ni aji achi.”

¹⁴Idangji KIBUBA Tsüngremi per dang ashi, “nai ya inyak nungji kiset shiruru ajak aser arem shiruru ajak dang alia ne dak atakatem kaoang! Tepok agi nai juzütsü aser ne arishi anogo tepiyong nai auyi achitsü.

¹⁵ Ni tetsürla nena yongtsü nung, aser ne kidong o lar kidong na yongtsü nung tetsükchitep yutsütsü, pai ne kolak ajemsatsütsü, aser nai la shibalang yirutsütsü.”

¹⁶Aser pai tetsürla dang ashi, “Ni na tanur abenba timtem tali kümdaktsütsü; na kangshia tanur amungtsü, aji saka ne azüabungba ne kinungpu dak alitsü, aser pa ne madak kibur akümtsü.”

¹⁷ Aser Adam dang pai ashi, “Kechi süngdong nungi ni ne dang techi ta ashi, aji nai kinungtsü o angar achi nung, na atema ali nungji atakatem kaor. Ne arishi tepiyong belemseta inyaker-ang chiyungtsü angutsü.

¹⁸Ayi aser ai, na atema meitsütsü, aser arem nung meiba süngo-lio nai achitsü.

¹⁹Na tanaben ali maküm tashi ne tejak nungi asentzü sena inyaker chiyungtsü angutsü, kechiaser na iba nungi agitet, na ali lir, aser na tanaben ali küma aotsü.”

²⁰Adami[3] pei kinungtsü tenüng Eva[4] ta aja, kechiaser la akümlir ajak tetsü.

²¹Aser KIBUBA Tsüngremi Adam aser pa kinungtsü asoshi shiküp agi semoksü yanglua parnok nem semtsü.

²² Idangji KIBUBA Tsüngremi ashi, “Tang nisungji asenok rongnung ka mesüka tajung tamajung meteta kümogo. Ashiko pai teka songtoka taküm süngdong nungi ongzüka chir teti taküm alitsü.”

²³Anungji KIBUBA Tsüngremi koba ali agi parnok yanglu, aji inyakdaktsütsü atema Eden atsüki nungi parnok aridok.

²⁴Parnokji aridoker külen, taküm süngdong lenmang anüktsü atsüki anüdoklen cherubim aser ajaklen meyipshiba sentsüprang nok ka ayu.