Read njo LIPOK 30 Bible Online

LIPOK 30 - njo bible

LIPOK 30

¹Kodang Racheli Yakob nem tanur keta mesotsü, lai teyi dak tenük merema aküm, aser Yakob dang ashi, “Kü nem tanur kua, aji oda mesüra ni asütsü.”

²Yakobi Rachel anema ain adoka ashi, “Nu menden tejang na nungi sotba Tsüngrem melen ni lir ma?”

³Idangji lai ashi, “Ajiang idaki kü kilitsür Bilha lir, nai la dangi iang, aji oda kü tepima nung ajungshitsüsa lai tanur sotsütsü aser la agi nia tanur akatsü.”

⁴Anungji lai pa nem pei kilitsür Bilha pa kinungtsü ama agütsü, aser Yakobi la dangi ai.

⁵Bilha mashisa aküm aser Yakob nem tebur ka sotsü.

⁶Idangji Racheli ashi,“Tsüngremi kü ola angashia kü o bendangogo, aser kü nem jabaso ka agütsüogo.” Anungji lai pa tenüng Dan[21] aja.

⁷Rachel kilitsür Bilha ano mashisa küma Yakob nem tanabuba tebur ka sotsü.

⁸Idangji Racheli ashi, “Küyi küna tetoktepba tulu ka liasü, aser la kokogo.” Anungji lai pa tenüng Naftali[22] aja.

⁹Kodang Leai pei dang tanur asobaji anenogo ta metet, lai pei kilitsür Zilpa Yakob nem kibutsü asütsü agütsü.

¹⁰Aser Zilpai Yakob nem tebur ka sotsü.

¹¹Leai ashi, “Kü tia koda tajung!” Anungji lai pa tenüng Gad[23] aja.

¹²Zilpai ano Yakob nem tanabuba tebur ka sotsü,

¹³idangji Leai ashi, “Ni koda pela-a lir! Kechiaser tetsürtemi kü dang tepela ta ajatsü.” Anungji lai pa tenüng Asher aja.

¹⁴Wheat alurua Reuben alui ao aser mandrake jang ngua tetsü Lea dangi bener aru. Racheli aji ngua Lea dang ashi, “Yimlibilema ner chir mandrake[24] jang tera kü nem kua.”

¹⁵Leai langzü, “Nai kübuba rakzükba ya atamata masü no? Aser tanga nai kü chir mandrake jang aginür ama?” Racheli langzü, “Ajangla nai ne chir mandrake jangji kü nem agütsüra taonung nai pa den medemtsü akok.”

¹⁶Nikongdang kodang Yakob alu nungi adok, Leai pa lenji oa ashi, “Taonung nai kü dangi aittsüla, kechiaser ni ner chir meyong mandrake na asoshi ta-a agütsüogo.” Aser paonungji pai la den mejang.

¹⁷Tsüngremi Lea dang anga aser la mashisa küma Yakob nem tebur pungububa sotsü.

¹⁸Lai ashi, “Ni kübuba nem kü kilirtsür agütsüba atema Tsüngremi kü nem taa agütsüogo.” Anungji lai pa tenüng Issakar[25] aja.

¹⁹Lea ano mashisa küma Yakob nem tebur trokbuba sotsü.

²⁰Lai ashi, “Tsüngremi kü nem sempet tajung ka agütsüogo, tangbo ni kü kinungpu nem tetushi agütsütsü, kechiaser ni pa nem jabaso trok sotsüogo.” Anungji lai pa tenüng Zebulun[26] aja.

²¹Tesülen lai tetsür ka aso, aser la tenüng Dina aja.

²²Tsüngremi Rachel bilemtet, pai la sarasadem langzü aser la nu menden lapoktsü.

²³La mashisa küma tebur ka aso. Lai ashi, “Tsüngremi kü nem jabaso ka agütsüba agi kü maksü sensamasaba bener ogo.

²⁴Aser lai pa tenüng Yosef[27] aja, aser ashi, KIBUBAi kü nem ano jabaso ka agüjang.

²⁵Yosef sor külen Yakobi Laban dang ashi, “Ni kü talidaki aser ozü limai odakjangma.

²⁶Kü nem kü kibutsütem aser kü chirtem shir atema ni na tenzük, parnokji kua aser ni odi. Kechiaser ni na koda junga tenzük aji nai meteter.”

²⁷Labani pa dang ashi, “Ni ne nükdang yimlibilem ngura, yimlibilema ano ata-ang ta ni mepishir. Kechiaser KIBUBAi na agi ni moatsü ta ni kü ain ajanga metetogo.

²⁸Ne ta-a ataktetang aser aji ni agütsüdi.”

²⁹Yakobi langzü, “Ni na koda tenzük aser kü kübok ne shiruru aser rongsen koda züin aji nai meteter.

³⁰Kechiaser ni marudang na ishika dang ka-a liasü, saka tang itemji mezüngdangtettsüsa jenti kümogo, aser ni kolenisa odir KIBUBAi na moatsü. Saka tang ni kü kibong atemabo kodang inyaktsü?”

³¹Labani asüngdang, “Ni ne nem kechi agütsütsü?” Yakobi langzü, “Nai kü nem kecha tagütsü, saka nai ni asoshi ya benshirabang ni tanaben ne san telok nüka mesüdi.

³²Ni tanü ne san telok ajak ajanga odi, aser san rongnungi tsükrapusa aser pungmen aketba ajak, aser nabong rongnungi pungmen aketba aser tsükpuraksa ajak bendangdi, aser ibalaji kü taa alitsü.

³³Anungji kü tamayazübai ni asoshi langzütsü, aser tarutsü mapang nung kodang nai kü taa indang bilemdangdir, nabong rongnung tsükrapusa aser pungmen maketba aser san rongnung tanak masüba kü den lirabang auyaba ta züngshiang.”

³⁴Labani ashi, “Nai ashiba amaji sang.”

³⁵Aser panüji nabong tepung temdang aser pungmen aketba, aser nabong tetsü tsükrapusa aser pungmen aketba, ajak kechi nung temesüng liasü aser san rongnung tanak ajak, item pai bendanga pei chir ket nung agütsü,

³⁶aser pai pei o Yakob na tsüngda nung asemnü lenmang yutsü, aser Yakobi Laban shiruru tanüngba mesü.

³⁷Yakobi poplar dong, almond aser plam dong nungi süngsang agizüka süngkepji endoker süngsang nungji temesüng adokdakja temdangpusa yanglu.

³⁸Pai süngkep endokba süngsangji ayong tzü telatak dak kechi nung shiruru teloki tzü ajemtsü aru, idakji yutsü. Kechiaser kodang itemji tzü ajemtsü aru, parnok techanu merepa adok.

³⁹Kodang süngsang jakdang parnok techanu merep, parnok temdangpusa, tsükrapusa aser pungmen aketba mepu.

⁴⁰Yakobi techanuji balala ayu, aser pai san telokji Laban shiruru telok nung aliba temdangpusa aser tanak aliba lenji tejak meyipa yutsü. Aser pai pei san telokji Laban san telok nungi pila-a balaka ayu.

⁴¹Kodangsa tashi tait santem techanu merep, Yakobi süngsangji san telok jakdangji teptaka toktsü,

⁴²saka kodangsa tashi maitba santem techanu merepdir, pai aji teptaka meyutsü. Anungji tashi maitbaji Laban meyong, aser tashi aitbaji Yakob meyong aküm.

⁴³Yamaji Yakob kanga takar aküm. Pa san telok jenti, kilirtem, ut aser gado jenti liasü.