Read njo LIPOK 31 Bible Online

LIPOK 31 - njo bible

LIPOK 31

¹Laban chirtemi yamai jembiba Yakobi angashi, “Obala meyong ajak Yakobi bener ogo, pa rongsen ajakji obala akaba nungi lir.”

²Yakobi Laban tejak pa tsütsü mesüi ajitet.

³Idangji KIBUBAi Yakob dang ashi, “Nübu nunger limai aser ner nübur dangi meyipa oang, aser ni ne den alitsü.”

⁴Anungji Yakobi Rachel aser Lea moapui kong pa san telok chimdakja liasü, ajagi jaok.

⁵Aser pai tena dang ashi, “Nebui joko mezüng ama kü dak mesaklok ta ni ajiteter, saka kübu Tsüngrem kü den lir.

⁶Ni kü tashi ajak agi nebu tenzük ta nenati meteter.

⁷Saka pai ni ashioktsü, aser kü taa terben melenshitsü, aji saka pai kü dak tamajung meinyakdaktsütsü Tsüngremi pa dang mela.

⁸Tsükrapusa ne taa asütsü ta pai kü dang shirabang san telok ajaki tsükrapusa mepu, aser temdangpusa ne taa asütsü ta pai shirabang idangji san telok ajaki temdangpusa mepu.

⁹Tsüngremi nebu nungi shirurutemji bener oadok, aser itemji kü nem agütsü.”

¹⁰“San telok techanu merepba mapang pungmang nung ni kü tenük sak aser ajiang, san telok nung tsüngkhümba nabong tepung temdangpusa aser tsükrapusa liasü.

¹¹Aser pungmang nung Tsüngrem tenyari kü dang ashi, ‘Oh Yakob,’ aser ni ashi, ‘Ni yangi lir.’

¹²Aser pai ashi, ‘ne tenük roka asoa reprangang, san telok nung tsüngkhümba nabong tepung ajak temdangpusa, pungmen aketba aser tsükrapusa lir, kechiaser Labani ne dak benshiba ajak ni nguogo.’

¹³ Ni Bethel Tsüngrem, kechi nung nai azüngba lung nung totzü shiloktsü, kong nai kü dang azüngashiba ka züngzük. Tang iba linük nungi aramesoa ne nübur limai meyipa oang.”

¹⁴Rachel o Lea nati langzü, “Obalar kidang onok shilem mesüra senmang kecha melika,

¹⁵pai onok dang aener dang amai benshir. Pai onok ayok, aser onok yokzükba sen ajak endokogo.

¹⁶Obalar rongsen kechisa Tsüngremi bener ao, aji asen meyong aser asen chirtem meyong lir. Tsüngremi ne dang kechisa ashi aji inyakang.”

¹⁷Idangji Yakobi pei chirtem aser tebutsü nunger ajak ut manung mendaktsü,

¹⁸aser pei kiset shirurutem ajak, pai ajangzüktetbatem Padan Aram nung pai bendenba pa meyong oset ajakji bener tebu Isak dangi Kanan limai ao.

¹⁹Laban san züng mejeptsü or alidang Racheli tebu meyong kibong süngyanglu tsüngrem auya.

²⁰Yakobi Aram nunger teku Labani memetetdaktsüi miima jena aotsü asatetba ajanga pai paji ashioktsü.

²¹Aser pa akaba oset ajak bener ilunga apuso, aser Eufrata ayong ajanger tenem linük Gilead leni aru.

²²Asemnübuba nung Laban dang Yakob jena ogo ta metetdaktsü.

²³Idangji pai pei adianutem anir Yakob aria anogo tenetnü lenmang ao aser Gilead tenem nung pa menep.

²⁴Saka paonungji pungmang nung Tsüngremi Laban dangi jungkai adoka ashi, “Yakob dang tamajung süshia, tajung süshia kecha mejembitsü ne sasa kümdangang.”

²⁵Yakobi tenem nung süki sür lia Labani menep. Laban aser pa adianutemia Gilead tenem nung süki yanglu.

²⁶Idangji Labani Yakob dang ashi, “Kechiba ni ashioktsütsüsa nai ya inyaker? Aser kü jalatem rara nung nok agi apuba ama kechiba bener aor?

²⁷Kechiba kü dang meshi-i nai miima ajen aser ni ashioktsür? Nai kü dang ashi asübo ni na tepela nung ken tena aser kongki tema odaktsülato!

²⁸Kechiba nai kü semchirtem aser kü jalatem dak tebang memesepdaktsü? Tang nai tamashi mapa ka inyakogo.

²⁹Ni ne dak tamajung benshitsü tashi liasü, saka yasüng nebu Tsüngremi, nai Yakob dang tajung süshia tamajung süshia kecha mebenshitsü kümdangang ta kü dang ashi.

³⁰Aser tang nebu-er kidangi aotsü kanga yongya nungji nai apusoa aor, saka kechiba nai kü kibong tsüngremtem auya?”

³¹Yakobi Laban dang langzü, “Kechiaser nai tashiyim agi ne jalalatem ni nungi rakzüktsü ta ni tsübua liasü.

³²Saka shiba den ne tsüngremtemji ngudir pa taküm malitsü. Asen kinunger ajak den nai ne meyong kechi kü den lir aji bushiang aser aji na agiang.” Tang Racheli aji auya ta Yakobi memeteti liasü.

³³Labani Yakob süki nung bushi, iba sülen Lea süki aser kilitsür ana süki nung bushi, saka pai pei tsüngremtemji mangu. Idangji pai Rachel süki-i ai.

³⁴Tang Racheli kibong tsüngremtemji agia ut menden nung enok aser iba manung la amen. Labani süki ajak nung bushiaka ibaji mangu.

³⁵Racheli pei tebu dang ashi, “Ni ne tsüngdang noktaktsü makok nung obalai tejashima, kechiaser ni tetsür ita shilem aoba mapang lir.” Yamaji pai bushi saka kibong tsüngremtemji mangu.

³⁶Idangji Yakobi ain adoka Laban dang ashi, “Kü tai kechi? Nai ni yamai arishitsüsa kü temenen kechi ali?

³⁷Nai kü oset ajak lapoka bushiogo, ne meyong kechisa nai angu? Itemji yangi kü adianutem aser ne adianutem madang yuang aser parnoki ana tsüngda nung o bendangjangma.

³⁸Item küm metsü tashi ni ne den liasü aser ne lu, ne san aser nabong mapang shitak nung techanu merepa mepu aser item rongnung ni san tepung ka danga machi.

³⁹Arem shirurui tepsetba sanjia ni ne dangi bener maru, saka kü san nungi temenok agütsü. Anüngdang mesüra aonung auyaba asoshia nai kü dang nungi temenok meshi.

⁴⁰Aiben dang anüngdang tatsük agi aser aonung temokong agi ni kangshia liasü, aser ni ayip janga memejangteti liasü.

⁴¹Yamaji ni ne kidang item küm metsü liasü. Küm terpezü ni ne jala ana asoshi tenzük, aser küm trok ne kiset shirurutem asoshi na tenzük, aser nai ne taa terben melenshi.

⁴²Kübu Tsüngrem, oda Abraham aser Isak Tsüngrem kü den mali asübo atangji nai ni teka tazüng yoker lila. Saka Tsüngremi ni inyakba aser ni timtemba ngua yasüng na artsüogo.”

⁴³Labani Yakob dang langzü, “Tetsürtemji kü jala, parnok tanurtemji kü meyong, item kiset shirurutemji kü meyong; oda nai kechisa angur item ajakji kü meyong lir. Saka item kü jalatem aser parnok nem sotsüba chirtem asoshi tanü ni kechi inyaktsü?

⁴⁴Tang arung ana tsüngda nung o züngtepdi aser aji ana asoshi kuli ka asütsü.”

⁴⁵Anungji Yakobi lung ka bena arua temaitsü asoshi aji azünga ayu.

⁴⁶Aser pai adianutem dang lung kar bendenang ta ashi. Anungji parnoki lung bendena lungnang yanglu, aser parnoki idakji chiyung.

⁴⁷Labani iba dangji Yegar Sahadutha[28] aser Yakobi Galeed[29] ta aja.

⁴⁸Labani ashi, “Lungnang ya ana tsüngda kuli ka asütsü.” Anungji iba tenüng “Galeed” ta aja.

⁴⁹Labani ashi, “KIBUBAi ana senshia alidang nüka liangma.” Anungji iba dang Mizpa[30] aja.

⁵⁰Ano Labani ashi, “Nai kü jala kangshirabang, mesüra tangar tetsür agirabang, ni memetetaka ana tsüngda nung Tsüngrem kuli lir.”

⁵¹Idangji Labani Yakob dang ashi, “Iba lungnang aser tongshiji ajiang, koba ana tsüngda nung ni mesoa yutsü.

⁵²Iba lungnang aser tongshiji kuli sang, oda tamajung inyaktsü asoshi ni iba lung atena ne dangi marutsü, naia iba lungnang aser tongshi atena kü dangi marutsü.

⁵³Abraham Tsüngrem aser Nahor Tsüngrem, oda parnok tsürabur Tsüngremi asenok tsüngda o bendangang.” Aser Yakobi tebu Isaki külemba Tsüngrem tsübuba agi azüngashi.

⁵⁴Pai tenem nungji tarongba tenla ka agütsü aser pei adianutem chiyungi aja. Parnoki chiyunger külen aonung tepiyong tenem nungji ali.

⁵⁵Anepungi Labani shishir pei semchirtem aser jalatem dak tebang mesepa parnok moatsür külen pei kidangi meyipa ao.