Read njo LIPOK 32 Bible Online

LIPOK 32 - njo bible

LIPOK 32

¹Yakobi pei lenmangi meyipa ao aser Tsüngrem tenyar ana pai ajuru.

²Kodang pai parnok angu, pai ashi, “Ibai Tsüngrem alidak tesem ka lir.” Anungji pai iba linük tenüng Mahanaim[31] aja.

³Yakobi pa dang tama tedi Esau linük Sier limai osangbenertem yok.

⁴Pai parnok dang yamai metetdakja ashi, nenoki kü kibur dang yamai shiang, “Ne kilir Yakobi yamai ashir, ni Laban den tang tonga munga aliba agi meyipa arutsü menua liasü.

⁵Ni nashi, gado, san, nabong aser kilirtem aser kilitsürtem kar. Ni ne madang yimlibilem ngudakjangma ta iba o ne dangi yoker.”

⁶Kodang osangbenertem Yakob dangi meyipa aru, parnoki ashi, “Onoki nedi Esau dangi oa ne o ama shiogo, aser pa den nisung noklang pezü ne den ajuruteptsü arudagi.”

⁷Yakob kanga dang aoksa aser shisa bulua liasü. Pai pa den aliba nisungtem, san, nabong, nashi aser ut telok ana küma sadang.

⁸Pai bilem, oda Esaui arua telok ka samatsüra, tangar telokjibo jenbutsü.

⁹Idangji Yakobi sarasadem, “Kübou Abraham aser kübu Isak Tsüngrem KIBUBA shibai kü dang, ‘Ner limai aser ne nübur dangi meyipang, aser ni ne den junga benshitsü ta ashi,’

¹⁰ne kilir dang ne temulung lemtetba aser ne takang temeim tilatiba sayutsü ni metemsü. Kechiaser ni ajok ka dang amer iba Yordan ayong ajanga ao, aser tangbo ni item telok ana den meyipa arur.

¹¹Küdi Esau ket nungi ni kümzükang ta ni ne dang mepishir. Kechiaser ni pa tsübur. Ashiko pai arua onok ajak oda tetsür aser tanurtem dena tepsettsüa kar.

¹² Saka nai ya shiogo, ‘Nai ne dang junga benshitsü aser na azükarudaktsütsü aser ne semchirtem molu lisem ama kümdaktsütsü.’ ”

¹³Iba aonungji pai idakji anen aser pa ket nung aliba rongnungi tedi Esau nem sempet asoshi shimtet,

¹⁴nabong tetsü noklang ana, tepung metsü, san tetsü noklang ana, tepung metsü,

¹⁵ut tetsü semer, den parnok techanu, nashi tetsü lir den pungchi ter, gado tetsü metsü den tepung ter.

¹⁶Pai itemji telok balala küma lemsa aser telok shia kilir ka ket nung agütsü. Pai kilirtem dang ashi, “Kü dang nungi tama süia oang aser nenok o nenok na yongtsü tetsüngda tatsütsü yuang.”

¹⁷Pai mezüngbuba telok dang ashi, “Kodang küdi Esaui na ajurua ne dang ne kibur shiba? Na kongi aor? Ne jakdang aliba shirurutemji shir meyong ta asüngdangdir,

¹⁸idangji nai yamai langzüang, Itemi ne kilir Yakob meyong, pai itemi pa kibur Esau nem bendaktsüba sempettem aser pa-a onok sülen arudagi.”

¹⁹Pai tanabuba, tasembuba aser shiruru telok anir ajak dang kasaji mela-a ashi, “Nenoki Esau den ajurutepdang yamaji o kasaji ashitsüla.”

²⁰Nenoki yamai shiang, “Ne kilir Yakob onok sülen arudagi.” Kechiaser pai bilem ni kü jakdang mezüng yokba sempettem jagi pa jashia alibaji süneptsütsü aser ni pa jak angudang pai ni agizüktsü südi.

²¹Anungji pai sempettemji pa jakdang jelia yok aser paonungji pabo tanendakjisa ali.

²²Paonungjisa Yakobi sak aser aramesoa tebutsü ana, kilitsür ana aser par tanur terkaji anir Yabok ayong atena ao.

²³Parnokji yoker külen pai pa akaba ajak ayongji ajanga yok.

²⁴ Yakob tesülen pa kija liasü aser anepdang maküm tashi nisung ka den pai melangtep.

²⁵Kodang nisungba jagi Yakob mokoki aküm, pai Yakob tepi teloktep nung kongshi aser aji loktettsü.

²⁶Nisungba jagi ashi, “Ni chiokang, kechiaser joko sangwatsü mapang lir.” Yakobi langzü, “Nai ni memoatsü tashi ni na mechioktsü.”

²⁷“Ne tenüng shiba?” ta nisungba jagi pa dang asüngdang. Aser pai pa “Yakob” ta ashi.

²⁸Nisung jagi ashi, “Joko ne tenüng Yakob ta majatsü, saka ‘Israel,’ kechiaser nai Tsüngrem aser nisung den toktep aser nai kokogo.”

²⁹ Yakobi asüngdang, “Yimlibilema kü dang ne tenüng shiangma.” Saka pai langzü, “Nai kechiba kü tenüng asüngdanger?” Yamaji pai Yakob moatsü.

³⁰Yakobi ashi, “Ni Tsüngrem tejak o tejak na jitepa nguogo, aji saka ni ano taküm alir.” Anungji pai iba linük dang Peniel[32] aja.

³¹Pai Peniel ajanga aodang anü adoka pa dak yalok, aser pai tepi agi loka-loka jaja.

³²Anungji Israel chirtemi tepi tazüng shi tetsü tanü tashi machir, kechiaser pai Yakob tepi teloktep tetsü nung kongshi.