Read njo LIPOK 33 Bible Online

LIPOK 33 - njo bible

LIPOK 33

¹Yakobi pei tenük akasoa reprang, aser ajiang Esau den nisung noklang pezü aruya pai angu, anungji pai pei tanurtem Lea, Rachel aser kilitsürtem ana rongnung lemsa.

²Pai kilitsür ana aser parnok chirtem tejaklen yutsü, iba sülen Lea aser la chirtem, aser tesüsa Yosef o Rachel na yutsü.

³Yakobi parnok tejakdang ao aser pai tedi anasa arudang ali nung tenetben tashi apudak.

⁴Saka Esaui Yakob ajurutsü asema oa pa dak azüiter tebang mesep aser parnoki ajeb.

⁵Kodang Esaui pa tenük rangketa yok, ajiang Yakob kinungtsütem aser tanurtem ngua pai asüngdang, “Ne den aliba item nisungtem ya shirnok?” Yakobi langzü, “Itemi ne kilir nem Tsüngremi aochia agütsüba chirtem.”

⁶Idangji kilitsürtem aser parnok chirtem arua apudak,

⁷aser Lea o lar chirtem arua apudak, aser tesü Yosef o Rachel na arua apudak.

⁸Esaui asüngdang, “Ni ajuruba item telok ya shirnok? Ibai kechi tetezü?” Yakobi langzü, “Iba tetezü ni na nungi yimlibilem angutsü asoshi.”

⁹Saka Esaui ashi, “Tenur, ni teperi kar, na akabaji ne meyong sang.”

¹⁰Yakobi langzü, “Nungma, ni ne jakdang yimlibilem ngura, kü ket nungi item sempet agizükangma. Kechiaser ni asoshi ne jak anguba ya Tsüngrem jak anguba ama lir, aser tang nai ni aochia agizükogo.

¹¹Yimlibilema kü sempet koba ni ne nem bener arutsüogo ya agizükangma, kechiaser Tsüngremi kü dang aochia benshi nung ni teperi kar.” Yakobi aiben mepishi nung Esaui itemji agizük.

¹²Idangji Esaui ashi, “Asenoki apusoa pei lenmangi odi, aser ni ne jakdang odi.”

¹³Saka Yakobi pa dang langzü, “Tanurtem aser shirurutem ajak tashi mait ta kü kiburi meteter, aser ni kü shirurutem atema bilemtsür. Parnokji kenü lenmang danga talila anira parnok ajakji asütsü.

¹⁴Yimlibilema na onok dang tama oangma, aser kü den kiset shiruru aser tanurtem den ni meilungi Seir tenem matong tashi arutsü.”

¹⁵Anungji Esaui ashi, “Süra kü den aliba nisungtem kar ni ne den toktsüdi.” Saka Yakobi langzü, “Parnokji nüngdak mali, saka kü nem dang kü kibur madang taochi ngudakjangma.”

¹⁶Anungji panüji Esau Seir leni pei lenmangi apusoa ao.

¹⁷Saka Yakobi Sukoti oa pai ki ka yanglu, aser shirurutem asoshi anisüngzükdak semtu yanglu. Anungji iba yim dang Sukkot[33] ajar.

¹⁸Padam-Aram nungi Yakobi yimjung nung Kanan lima Shekemi aru, aser yimti anasa moapu nung süki yanglur ali.

¹⁹ Pai süki yangluba moapuji Shekem tebu Hamor chirtem nungi senpak noklang ka agi ali.

²⁰Idakji tenladak ka yanglua iba tenüng “Tsüngrem, Israel Tsüngrem” ta aja.[34]