Read njo LIPOK 34 Bible Online

LIPOK 34 - njo bible

LIPOK 34

¹Kenü anogo Leai Yakob nem sotsüba jala Dinai Kanantsür kar semdangtsü ao.

²Kodang iba lima tongtiba Hiv nunger Hamor chir Shekemi la angu, pai la kangshia anir oa nüktapangta benshi.

³Aser pa mulung Yakob jala Dina dak tenok, aser pai iba aiür dang meim aser pai iba aiür dang anükalema jembi.

⁴Anungji Shekemi pei tebu Hamor dang ashi, “Kü kinungtsü asütsü asoshi iba aiür kü dangi anir arudakjangma.”

⁵Tang Yakobi pei jalaji menentsüogo ta angashi, saka pa jabasotem kiset shirurutem anir aremi oadoker liasü. Anungji parnok madok tashi pai mokorai liasü.

⁶Shekem tebu Hamor den o jembiteptsü asoshi ao.

⁷Iba osangji angashia Yakob chirtem arem nungi adok aser iba osang jagi parnok kanga jashitepa ain adok. Kechiaser Shekemi Yakob jala den medema Israel dang tamashi benshi, koba mapa meinyaktsü tim liasü.

⁸Saka Hamori Yakob dang ashi, “Kü chir Shekemi ne jala meimer, anungji pa nem kibutsü asütsü laji agüjang ta ni mepishir.

⁹Asenok tsüngda kibalembuteptsü asoshi tenangzüktepba ka yangludi, oda nenok jalatem onok nem agidaktsütsü aser onok jalatem nenok nem agidaktsütsü.

¹⁰Nenoki onok den ozü lima nung alitsü aser linükji nenok madang lapoka yutsür. Nenoki kong linür idakji lia shishiang aser oset-tsüset züsentetang.”

¹¹Idangji Shekemia Dina tebu aser tedi nunger dang ashi, “Nenok nükdang ni yimlibilem ngudakjang, aser nenoki kechisa kü dang shidir aji ni agütsüdi.

¹²Tetsür asoshi senmen aser sempet kechisa aginür kü dang shiang, aser nenoki meshiba ama ni agütsüdi, saka nenoki laji kü nem agidakjangma.”

¹³Yakob chirtemi Shekem aser pa tebu Hamor dang tasa agi langzük. Kechiaser Shekemi Dina maksütsü mapa inyak.

¹⁴Parnoki ashi, “Onok tenu memejeptokba nisung nem agidaktsütsüji onoki makok, kechiaser aji onok asoshi maksü.

¹⁵Nenok onok ama mejeptokang, idangji dang onoki hai-haura akatsü.

¹⁶Aser asenok tsüngda kiba-lembuteptsü. Onoki ozü jalatem nenok nem agütsütsü aser onokia nenok jalatem agitsü, aser onok nenok den lia kin ka dang akümtsü.

¹⁷Saka nenoki onok o anga-a memejeptokra onoki ozü jala nenok nungi anir oadoktsü.”

¹⁸Parnok o jagi Hamor o par chir Shekem na pela-a kümdaktsü.

¹⁹Aser asanguba agi iba mapa inyaktsü atapisa meli-i parnoki ashibaji inyak. Kechiaser Yakob jala dak pai saklokadok. Tang paji tebuer kibong nung alirtem ajaki kanga akhüm tsübuba nisung ka liasü.

²⁰Anungji Hamor aser pa chir Shekem yimti süngkhümi aru aser par yimtisanger dang ashi,

²¹“Item nisungtem asenok tembar lir, parnok asenok lima nung lidaktsüdi aser idakji shishidaktsüdi, kechiaser alimaji parnok asoshi teperi lir. Asenoki parnok jalatem agidi aser parnok nem asen jalatem agidaktsüdi.

²²Saka item nisungtemi asenok tebur ajak parnok ama mejeptok nung dang asenok den kin ka ama alitsü ta ashir.

²³Parnok kiset shirurutem aser parnok akaba rongsen ajakji asenok meyong masütsü no? Asenoki parnok den o ajemdi aser parnok asenok den alitsü.”

²⁴Aser par yimti süngkhüm ajanga tuguba ajaki Hamor aser Shekemi ashiba nungji hai-haura aka aser tebur ajak mejeptok.

²⁵Tasemnübuba nung, parnok komo ano manebi lia Yakob chir ana: Dina tedi Simeon aser Levi nati pei nok amer miima yimti jagi aoksa ai aser tebur ajak tepset.

²⁶Parnoki Hamor aser pa chir Shekem nok agi tepset, aser Dina Shekem kidang nungi anir oadok.

²⁷Tasü mang madaki tanüngba Yakob chirtem adoka parnok tenu madak maksütsü mapa inyakba atema yimtiji makzüka bener ao.

²⁸Parnoki san telok, nashi, gado aser yimti nung kechisa aka aser alu nung aliba ajak bener ao.

²⁹Parnoki rongsen ajak tetsürtem aser tanurtem aser parnok kidang aliba ajak rakzüka bener ao.

³⁰Simeon aser Levi dang Yakobi ashi, “Iba lima nüburtem, Kanan nunger aser Periz nungertem madang nenoki ni tesembatsü ka kümdaktsüba ajanga kü madaki timtem bener arutsüogo. Kü nübur ishika dang aser Kanani ni anema külemi sendenra aser makra ni tepsettsü, oda ni aser kü kibong ajonga samatsü.”

³¹Saka parnoki langzü, “Onok tenu nüktapangtatsür ama benshidaktsütsübaji tim no?”