Read njo LIPOK 35 Bible Online

LIPOK 35 - njo bible

LIPOK 35

¹ Tsüngremi Yakob dang ashi, “Betheli tuang, aser yangji liang. Na nedi Esau nungi jena aodang ne dangi jungkai adokba Tsüngrem nem idakji tenladak ka yangluang.”

²Anungji pei kidang alir ajak dang Yakobi ashi, “Nenok rongnung aliba bendanger tsüngremtem endokang, nenok sasa meshitetang, aser süoshi melenang.

³Asenoki ibai toktsür Betheli atutsü, kong kü timtem nung yariba aser ni aolen ajak nung kü den dena aliba Tsüngrem nem tenladak ka ni yanglutsütsü.”

⁴Anungji parnoki Yakob nem bendanger tsüngremtem ajak aser parnok narong nung aliba yongmen küri ajak agütsü. Yakobi itemji Shekem anasa sülem dong kübok rema yutsü.

⁵Kodang Yakob aser par chirtem aenshia oa, meketa aliba yimtitem madaki Tsüngrem tsübuba taoksaba tulu ka aru, anungji shingaia Yakob chirtem aria mao.

⁶Yakob aser pa den aliba nisung ajak Kanan lima nung Luz, koba dang Bethel ta ajar ajagi aru.

⁷Pai idakji tenladak sabang ka yanglua iba dang El-Bethel (Tsüngrem Ki) ta aja, kechiaser pa tedi nungi jena aodang Tsüngremi idakji pa dangi jungkai adok.

⁸Rebeka yarila Debora idakji asü, aser sülem dong züng nung la Bethel anüdoklentip nung arem. Anungji iba tenüng Allon-bakut (mangyimba sülemdong) ta aja.

⁹Kodang Yakob Padan-Aram nungi meyipa aru, Tsüngrem pa dangi tanaben jungkai adok aser pa moatsü.

¹⁰ Tsüngremi pa dang ashi, “Ne tenüng Yakob, saka tang nungi na Yakob ta majatsü, Israel ta ajatsü.” Anungji Tsüngremi pa dang Israel ta aja.

¹¹Aser Tsüngremi pa dang ashi, “Ni ajak Takoksang Tsüngrem na soyapokya-a jenti renang, aser azükaruang. Ne dak nungi kintem jakzüktsü, aser ne dak nungi chubatem adoktsü.

¹²Ni koba ali Abraham aser Isak nem agütsü, ni ibaji ne semchirtem nem agütsütsü.”

¹³Idangji Tsüngremi pa den jembidak nungjagi pila-a tuadok.

¹⁴ Kong Tsüngremi Yakob den jembi, idakji pai lung ka azüng, aser idakji tajemtsü tenla yi aser oliv totzü shilokja aji pai meshitet.

¹⁵Pai iba dang Bethel ta aja.

¹⁶Idangji Yakob aser par kibong Bethel nungi apusoa ao aser parnoki Efrat atongtsü tatsüka lia Rachel nu amungtsü nüso ashitsü atua kanga kangshia tim atem.

¹⁷Kodang la nüso ashitsü atua kanga kangshia liasü, la yarilai ashi, “Tetsübuma, Rachel, kechiaser tang nai jabaso ka asotsü.”

¹⁸Saka la tasür liasü, aser la tasüi pai la tenüng Benoni[35] ta aja. Saka pa tebui pa tenüng Benjamin[36] aja.

¹⁹Kodang Rachel asü, la Efrati aji Bethlehem aoba lenmang nung arem.

²⁰Yakobi idakji lung ka azünga ayu, koba tanü tashi Rachel leper lung ta ajar.

²¹Yang nungjagi Yakobi aenshia oa Eder lungki ajanger pei süki yanglu.

²²Kodang Israel iba lima nung liasü, Reubeni oa tebu tezüngatsü Bilha den medem aser Israeli iba indang angashi. Tang Yakob jabaso terana liasü

²³Lea chirtem, Reuben, Yakob mezüng jabaso, Simeon, Levi, Yihuda, Issakar aser Zebulun.

²⁴Rachel chirtem, Yosef aser Benjamin.

²⁵Rachel kilitsür Bilha chirtem, Dan aser Naftali.

²⁶ Lea kilitsür Zila chirtem, Gad aser Asher. Itemji (Benjamin dak alaka) Yakob chirtem shirnok Padan-Aram nung pa nem sotsü.

²⁷Yakobi tebu Isak dangi Hebron anasa Mamre, kong Abraham aser Isak ali ajagi aru.

²⁸Isak arishi küm noklang ka ser tir ali,

²⁹aser tambur kümer asü aser pei pur den aden; aser pei chir Esau aser Yakob nati pa arem.