Read njo LIPOK 37 Bible Online

LIPOK 37 - njo bible

LIPOK 37

¹Tebu nunger aenlen amungdak Kanan nung Yakob ali.

²Ibai Yakob kidong otsü: Yosef küm tertenet renteter tedi nunger san telok nüka liasü, aser tebu kinungtsür Bilha aser Zilpa chirtem den pa ali, aser pai parnok indang osang tamajung bener arua tebu dang ashi.

³Tang Israeli pei chirtem ajak dang tali Yosef meim, kechiaser pa tambur kümer ang Yosef aso, aser pai sentsü tapu aika aketba semoksü ka pa nem renemtsü.

⁴Kodang pa tebui parnok ajak dang tali Yosef meim ta pa tedi nungeri angu, parnoki pei tenu sempa aser pa den mejembinüi aküm.

⁵Yosefi pungmang ka pungmang aser kodang tedi nungertem dang aji ashi, parnoki pa tali sempa.

⁶Pai ashi, “Ni anguba pungmang ya angangjo!

⁷Asenok ajak alu nung tsükpong langya liasü aser ni alangba tsükpongji indang indanga noktak, aser ajiang nenok tsükpongi kü tsükpongji meketa noktak aser apudaka külem.”

⁸Idangji tedi nungeri pa dang ashi, “Ajangla na onok madak chuba akümtsü asü? mesüra onok madak nai yimsü asütsü?” Anungji pa pungmang aser pai ashiba otem atema parnoki pa tali-ang sempa.

⁹Ano Yosefi pungmang ka pungmang, aser pai tedi nunger dang aji ashi, “Ano ni pungmang ka pungmangogo, aser ajiang anü, ita aser petinu terkati kü madang apudak.”

¹⁰Saka kodang pai kasaji tebu dang ashi, tebui pa arüja ashi, “Ne pungmang ya kechi? Atangji netsü aser nedi nungertem aser ni arua ne madang apudaktsü ta nai bilemer asü?”

¹¹ Anungji Yosef tedi nungertemi pa dak tenük merem, saka tebui item ajak indang temulung nung yua ali.

¹²Kenü anogo Yosef tedi nungertem tebu san telok chimdaktsütsü asoshi Shekem leni ao.

¹³Israeli Yosef dang ashi, “Nedi nunger Shekem nung san telok nükdagi, aser aji agi ni na yokdi.” Yosefi langzü, “Ni aotsü renema lir.”

¹⁴Anungji tebui ashi, “Oang nedi nunger aser san telok ajak junga ali asü masü metetpelang; aser kü dangi osang bener arung.” Aji oda tebui Hebron lenten nungi pa yok. Yosef Shekem tonga aru.

¹⁵Aser iba linük moapu nungji pa nemzüya alidang nisung kati pa ngua asüngdang, “Na kechi bushir?”

¹⁶Anungji pai langzü, “Ni küdi nunger bushir. Parnoki kong shiruru telok chiyimdaktsür yimlibilema kü dang shiangma.”

¹⁷Nisung jagi ashi, “Parnok yang nungi ogo, kechiaser parnok Dothani odi ta jembiba ni angashiogo.” Anungji Yosefi tedi nunger sülen anitaka ao aser Dothan lima nung parnok angu.

¹⁸Tedi nungeri pa oji nung aruya angu, aser pai parnok tonga marudang parnoki tasa tamajung ka asa aser pa tepsettsü bangjemtet.

¹⁹Parnok kati ka dang ashi, “Pungmang pungmangsang to yangi arudar.

²⁰Arung asenoki pa tepsetdi aser pa temangji kangla ka nung enoktsüdi aser pa shiruru kati tepset ta asenoki shidi, aser pa pungmangtemji kechi akümtsüar asenoki ajia atadi.”

²¹Saka kodang Reubeni parnok jembitepbaji angashi, pai Yosef parnok ket nungi kümzüktsü meranga ashi, “Asenoki pa metepsetli.”

²²Pai parnok dang ashi, “Nenoki azü tetokshima. Iba kangla nung pa ajongokjang, saka pa dak teka teyi.” Reubeni iba o ashiba ya parnok ket nungi paji kümzüka tebu dangi yoktsü asoshi liasü.

²³Kodang Yosef pa tedi nunger tonga aru, parnoki pa dak nungi semoksüji agizük.

²⁴Iba sülen pa ajonga arur kangla takong nungji parnoki pa ajongoka yutsü. Iba kanglaji tzü mait takong liasü.

²⁵Kodang parnok chiyungtsü amen, aoksa-a Ishmael nunger telok ka Gilead nungi liangmesen, tanebtsü mozü aser teronem menemtsü osettem ut nung bener Ijip limai luya angu.

²⁶Idangji Yihudai pa adianutem dang ashi, “Asen tenu tepseta pa miimbangba agi asenok kechi ajangzüktsü?

²⁷Anungji asenoki pa item Ishmael nunger dang yokdi. Asenoki pa dak teka meyili, kechiaser pa asenok tenu, asen shi aser azü lir.” Aser pa adianutemi iba oji anga.

²⁸ Idangji parnok madang Midian nunger shishilembar telok ka aji ajanga süidang, parnoki Yosef kangla nungi atsüteta senpak metsü yong Ishmael nunger dang ayok, aser parnoki Yosefji Ijip limai anir ao.

²⁹Kodang Reuben kangla jagi aru, pai Yosef mangu nung tejashi agi pei süoshi shisa.

³⁰Pai tenu nunger dangi meyipa arur ashi, “tanur to mali ato! Ni tang kechi inyaktsü?”

³¹Idangji parnoki nabong ka tepset aser Yosef semoksü talangji iba zü nungji meten.

³²Parnoki semoksü sentsü tapu aika aketbaji tebu dangi bener oa ashi, “Onoki ya angu. Ibai ne chir semoksü to masü no?”

³³Pai aji shitet aser ashi, “Hau, ibai kü chir semoksü! Arem shiruru kati pa tepsetogo. Kü chir Yosef anüka shisatsüogo!”

³⁴Idangji Yakobi tejashi agi pei süoshi shisa aser anemsü aben aser anogo aika mang ayim.

³⁵Aser pei jabaso jalatemi pa sünepja mesüzükaka pai parnok dang mangai ashi, “Ni tasü yim tonga kü chir asoshi mang yima alutsü.” Aji oda tebui pei chir asoshi mang ayim.

³⁶Idangji Ijip lima nung Midian nungeri Farao chuba anüker ar-kotong Potifar dang Yosef ayok.