Read njo LIPOK 38 Bible Online

LIPOK 38 - njo bible

LIPOK 38

¹Iba mapang nungji Yihudai pei adianutem toktsür lua Adulam nunger tenüng agi Hira den ali.

²Aser Yihudai yangji Kanan nunger ka tenüng agi Shua jala angu, aser pai la agi aser la den ayip.

³Aser lai pa nem jabaso ka sotsü, aser pai pa tenüng Er ta aja.

⁴La ano mashisa küma tebur ka aso, aser lai pa tenüng Onan ta aja.

⁵Ano lai tebur ka aso, aser pa tenüng Shela ta aja. Tanurji asodang Yihuda Kezib nung liasü.

⁶Mezüng jabaso Er asoshi Yihudai kibutsü tajung ka tenüng agi Tamar, la agidaktsü.

⁷Er mapa KIBUBA madang tamajung liasü, anungji KIBUBAi pa tepset.

⁸Idangji Yihudai Er tenu Onan dang ashi, “Nedi kinungtsü dangi oa la den medemang. La kinungpu tenu ka ama nai nedi asoshi metsü angutsüsa la dang benshiang.”

⁹Saka tanurji pa meyong masütsü ta meteta, Onani tedi kinungtsü den medemdang pei tedi nem pai metsüji magütsütsü asoshi aji ali nung endok.

¹⁰Pai inyakba mapa jagi KIBUBA mepeladaktsü, anungji KIBUBAi pa tepset.

¹¹Idangji Yihudai pei chir kinungtsü dang ashi, “Kü chir Shela tain maküm tashi nebu kidang oa liang.” Tedi nunger amaji Shela-a tepseta lir ta pai iba o ya ashi. Aser Tamari tebu kidangi meyipa ao.

¹²Kenpiga lir Yihuda kinungtsü Shua jala süadok. Kodang Yihudai pei mangyimba anogo abensa, pa sünepa aküm, aser pa tembar Adulam nunger Hira, Temnai san züng mejep daki alu.

¹³Nisung kari Tamar dang ne kinungpu tebu Temnai san züng mejeptsü ludagi ta ashi.

¹⁴Anungji lai pei amitsür sü koba lai sobua liasü, aji semzüka yur külen süoshi tanga melener la tejak meibanger Temnai aluba lenmang Enaim lenti nung mena ata. Kechiaser Yihuda chir tanubusang Shela tain kümaka pa nem kibutsü asütsü la magütsü ta lai metet.

¹⁵Kodang Yihudai la angu, la nüktapangtatsür ta bilem. Kechiaser la süko mei.

¹⁶Pei lenmang tezülen jagi la dangi or ashi, “Arung ni ne dangi aitdakjang. Lai pei chir kinungtsü ta memeteti pai o ya ashi. Lai asüngdang, Ni ne den medemba yong nai kü nem kechi agütsütsü?”

¹⁷Pai langzü, “Ni kü san telok nungi san chanu ka bendaktsütsü.” Lai asüngdang, “Nai ibaji mebendaktsü tashi kuli ka ama kü nem kechi agütsütsü?”

¹⁸Pai langzü, “Kuli asütsü asoshi ni ne nem kechi agütsütsü?” Lai langzü, “Ne tenüng ajena aliba ne lisü aser ne ajok koba nai ama lir.” Pai la nem aji agütsü aser tena medem, aser la mashisa aküm.

¹⁹Tamari aramesoa pei kidangi oa la süko meiba süoshi melener amitsür sü tanaben sübo.

²⁰Tetsürla ket nung kuli atema yutsüba osetji tanaben meyipa angutsü asoshi Yihudai pa temba Adulam nunger Hira ket nung san chanuji bendaktsü, saka pai laji mangu.

²¹Pai Enaim nunger kar dang asüngdang, “Lenmang tezülen nüktapangtatsürla to kong ali?” Parnoki langzü, “Idaki nüktapangtatsür ka danga mali.”

²²Anungji pai Yihuda dangi meyipa oa ashi, “Ni la mangu, aser yimti nung alirtemi idakji nüktapangtatsür ka danga mali ta shiogo.”

²³Yihudai ashi, “Lai itemji pei asoshi agidakjang, aji oda mesüra tangari asenok menütsütsü. Ni la nem taa agütsütsü merangogo, saka nai la mangu.”

²⁴Ita asem süir külen nisung kari Yihuda dang ashi, “Ne chir kinungtsü Tamari nüktapangta benshiogo, aser iba yongji la mashisa kümogo.” Yihudai ashi, “La anir arua mi nung rongseta südakjang.”

²⁵Kodang la anir aru, lai pei kinungpu tebu dangi iba o ya shiok, “Iba tenüng ajenba lisü, aser ajok shiba meyongar pa agi ni temang mazüngi lir. Reprangang aser ne sasa shitetangma.”

²⁶Aser Yihudai itemji nangzüka ashi, “La kü dang nungi tali temetenba, kechiaser ni la kü chir Shela nem magütsü.” Aser pai la den joko memedem.

²⁷Aser la nu amungba mapang nung ya adok, ajiang la nu menden nung jakrep chir liasü.

²⁸Kodang la tekangshiba mapangji atong, kati teka songtok, aser la yarirtemi teka nungji angsü temerem mesülokja ashi, “Ibai tama aso.”

²⁹Saka pai pei teka atsüa arudang tenujiang tama aso. Aser lai ashi, “Kechiba nai pei lenmang rakpok!” Anungji pa tenüng Perez ta aja.

³⁰Iba sülen pa tedi teka nung angsü temeremji aleneter aso, aser pa tenüng Zera ta aja.