Read njo LIPOK 39 Bible Online

LIPOK 39 - njo bible

LIPOK 39

¹Tang Yosef Ijip limai anir alu, aser pa ajagi anir alurtem Ishmael nunger ket nungi, Farao kübok alir tanüker ar-kotong Ijip nunger Potifari pa alizük.

²Aser KIBUBA Yosef den liasü, aser pa sadoksadoka ali; aser Ijip nunger kibur kidang ali.

³Aser KIBUBA pa den lir, aser pa ket agi inyakba ajak azükarudaktsür ta kiburi ajitet.

⁴Anungji pa madang Yosef yimlibilem angu, aser pai pa tenzük, aser kiburi pei kidang rongsen ajak madak pa ketdang südaktsü.

⁵Kodang par ki aser pa akaba ajak madak Yosef ketdang südaktsü, iba mapang nungjagi Yosef asoshi KIBUBAi Ijip nungba kibong, alu aser par akaba ajak nungji KIBUBAi moatsü.

⁶Anungji pa akaba ajak Yosef teka nung nungloka yutsü, oda pa chiyungba dak alaka pei kidang aliba oset kecha kiburi memetet.

⁷Kenpiga lir, pa kibur kinungtsüi Yosef dak sakloka adok, aser la den yipang ta lai pa dang ashi.

⁸Saka Yosefi aji hai-haura makai aküm, aser pai pei kibur kinungtsü dang ashi, “Ajiang ni aliba yong iba kidang kechi osetsa lir aser kechisa atalokdir, itemji kiburi meteta mali; aser akaba ajakji pai kü nem nungloka yutsüogo.

⁹Iba kidang kü dang tuluba shinga mali, aser kü nem magütsüba na dang, kechiaser na pa kibutsü, abenji ni iba tamajung tulu amshia Tsüngrem anema koda temenen menatsü?”

¹⁰Kenüamati lai Yosef dang ibai asüngdangaka pai menangzük.

¹¹Saka kenü anogo Yosef pei mapa inyaktsü asoshi kilungi ai, aser kidangji inyaker kata maliasü.

¹²Aser lai Yosef sü nung ameter ashi, “Kü den medemang.” Saka pai pei sü la teka nung yutsür kimai jena alu.

¹³Kodang pai pei sü la ket nung toktsür ajen ta lai metet,

¹⁴lai pei kibong nung mapa inyaker kilirtem jatener ashi, “Ajiang asenok mezüngmeshitsüsa ang kiburi Ibri nunger ka asenok dangi anir aru. Pai kü den medemtsü atua kü dangi ait, saka ni tashi agi ayimten.

¹⁵Kodang ni ayimtenba olaji pai angashi, pai pei süji kü madang toktsür kimai jena tugu.”

¹⁶Yosef kibur meshilang tashi lai süji la den ayu.

¹⁷Kodang pa shilang, lai otsüji pa dang ashi, “Nai anir aruba Ibri nungbai ni maksüdaktsütsüsa kü taktangi ait.

¹⁸Saka kodang ni ayimten, pai pei sü kü tsüngdang toktsür kimaleni jena tugu.”

¹⁹“Aji oda ne kiliri kü dak benshi” ta kodang tebutsüi jembibaji tebubai angashi, pa kanga ain adoka rasa,

²⁰aser Yosef pur chubar tepuokdak ayu, aser pa yangji ali.

²¹ Saka KIBUBAi Yosef moatsü aser pa den ali, anungji tepuokdak tanükeri pa meimdaktsü.

²²Tepuokdak alir ajak madak pai Yosefji tanishir kümdaktsü, aser tepuokdak kechisa inyak item ajakji Yosef mapa liasü.

²³Yosefi inyakba mapa ajak nungji tanüker jagi mashishi, kechiaser pa den KIBUBA liasü, aser pai inyakba ajak nung KIBUBAi azükarudaktsü.