Read njo LIPOK 4 Bible Online

LIPOK 4 - njo bible

LIPOK 4

¹Adami pei kinungtsü Eva den medem aser la mashisa aküm. Lai jabaso ka aso aser ashi, “Ni KIBUBA teyari agi tebur ka soogo.” Anungji lai pa tenüng Kain aja.

²Ano lai pa tenu Abel aso. Abel sannüker aküm, saka Kain aluyimer liasü.

³Mapang tatsüka lir külen Kaini ali nung atangba nungi KIBUBA dangi tenla aben.

⁴ Abel-ia san telok nung mezüng mepuba nungi aser item temotem KIBUBA dangi tenla aben. KIBUBAi Abel aser pa tenla agizük,

⁵saka Kain aser pa tenla pai magizük. Aser Kain kanga ain adok, aser pa tejak shimak

⁶Idangji KIBUBAi Kain dang ashi, “Kechiba na ain adoker? Kechiba ne tejak shimaker?

⁷Nai junga inyaka lira na magizüktsü ama? Saka nai junga meinyakrabang kishizüng nung temenen munga lir. Iba yagi ne dak jangrar, saka nai aji azüoktsü tim.”

⁸ Kaini tenu Abel dang ashi, “Asenoki alui odi.” Kodang tena alu nung liasü, Kaini tenu Abel anema apuso, aser pa tepset.

⁹Idangji KIBUBAi Kain dang ashi, “Nenu Abel kong lir?” Pai langzü, “Ni memetet, Ni künu anükba ama?”

¹⁰KIBUBAi ashi, “Nai kechi inyak? Nenu züi ali nungi kü dang ayimtendagi.

¹¹Tang koba ali-i ne ket nungi nenu zü agizüktsü tebang lapok, iba ali nungjagi na aridoker aser atakatem kaor.

¹²Kodang nai alu nung züsendir, iba jagi ne nem tejang kecha magütsütsü; na alima nung talidak maka tenemzür ka asütsü.”

¹³Kaini KIBUBA dang ashi, “Kü temerenshi ni aremzüktettsüba dang nungi tali.

¹⁴Tanü nai ni ali jak nungi aridoker; aser ne madang ni atsüktsü alima nung ni talidak maka tenemzür ka asütsü, aser shibaisa ni ngudir pai ni tepsettsü.”

¹⁵Saka KIBUBAi langzü, “Masü, shibaisa Kain tepsetdir, tenetben agi tali pa dak mang ayangtsü.” Aser kari pa ngua tepseta lir ta ser KIBUBAi Kain dak temaitsü ka ajen.

¹⁶Aser Kaini KIBUBA tsüngdang nungi pila-a ao, aser Eden anüdoklen Nod lima nung ali.

¹⁷Kaini tebutsü den medem aser la mashisa aküm, aser Enok aso. Kaini yimti ka yanglu aser yimti tenüngji par chir nüngten Enok ta aja.

¹⁸Enok nem Irad sotsü, Iradji Mehujael tebu, Mehujaelji Metushael tebu, aser Metushaelji Lamek tebu.

¹⁹Lameki tetsür ana agi. Ka tenüng Ada aser tangarla tenüng Zila liasü.

²⁰Adai Yabal aso, shiba kiset shiruru metsüha süki nung alirtem tebou aküm.

²¹Pa tenu tenüng Yubal, kentenertem, kongki aser jemji amshirtem tebu liasü.

²²Zilai Tubal-Kain aso. Shiba yongmenyin aser merang agi taleptsü oset ajak atsüngba nisung liasü; Tubal-Kain tenu tetsür ka tenüng Nama liasü.

²³Lameki pei kinungtsütem dang ashi, “Ada aser Zila, kü o angang; nenok Lamek kinungtsütem, kü o angang. Kechiaser ni yirutsüba yong, kü dak atep nung asangur ka ni tepsetogo.

²⁴ Kain dak tayang tenetben kepzükra, Lamek dak neter tenetben kepzüktsü.”

²⁵Ano Adami pei kinungtsü den tanaben medem, aser lai jabaso ka aso, aser pa tenüng Set aja, kechiaser lai ashi, “Tsüngremi kü nem Abel melena metsü tanga ka agütsüogo, kechiaser Kaini pa tepset.”

²⁶Set nem jabaso ka sotsü aser pa tenüng Enos aja. Iba mapang nungjagi nisungtemi KIBUBA tenüng nung ajatsü tenzük.