Read njo LIPOK 40 Bible Online

LIPOK 40 - njo bible

LIPOK 40

¹Kenpiga lir külen Ijip chuba marok amsang aser am asangba tenaji Ijip chuba anema met ayim.

²Faraoi marok amsang tongtiba aser am asanger tongtiba iba sosang ana dangji rasa,

³aser tenaji tepuokdak tanishiba ki kong Yosef puoka liasü, idakji puoka yutsü,

⁴Parnok mapang talangka idakji liasü, aser tanishibai Yosef nem tena anebalutsü nungloktsü. Parnok tepuokdak tatsüka lir,

⁵konung chuba marok amsang aser am asanger tenapronglai pungmang ka ka pungmang, aser parnok pungmang tetezü balala liasü.

⁶Anepdang kodang Yosef parnok dangi aru, parnok tejak meküma liasü.

⁷Pai tena dang asüngdang, “Kechiba tanübo nena tejak meküma alir?”

⁸Tenati langzü, “Künapronglai pungmang ka ka pungmangogo, aser iba tetezü rateta ashir shinga mali.” Yosefi ashi, “Teratettsü tashiji Tsüngremi agütsür masü no? Kü dang nena pungmangji shiang.”

⁹Idangji marok amsang tongtibai pa pungmang Yosef dang ashi, “Kü pungmang nung ni kü jakdang tsükmenatzü tezü ka ni angu.

¹⁰Idakji kongsang asem liasü. Tepen pungli dang tejang atang aser tsükmenatzü tejep tamen atang.

¹¹Chuba marok kü ket nung ama liasü, anungji ni tsükmenatzüji ongzüka chuba marok nungji ajetzüker chuba nem marokji agütsü.”

¹²Idangji Yosefi pa dang ashi, “Iba tetezüji ya: kongsang asemji anogo asem.

¹³Asemnü tsüngda Faraoi ne kolak mesor akhi ataba mapa nung tanaben na yutsütsü, aser tamalen pa marok amba ama nai Farao ket nung pa marok agütsütsü.

¹⁴Joko na kodang junga kümdir nia bilemtetangma, aser yimlibilem kü indang Farao dang jembia, iba kidang nungi ni anitetdakjang.

¹⁵Kechiaser ni Ibri lima nungi asangsang auya anir aru; aser yangia ni kecha tai mebenshi sürnung parnoki ni tepuokdak lungpok nung ayu.”

¹⁶Kodang Yosefi pungmang tetezüji kanga junga ratettsübaji am asangba tongtibai angu, pai Yosef dang ashi, “Nia pungmang ka pungmangogo; kü kolak manung amtsük molok asem liasü.

¹⁷Molok tematiba nungji Farao asoshi amtsük tapu ajak liasü, saka ozütemi kü kolak manung aliba molok nungi aji achi.”

¹⁸Idangji Yosefi pa dang ashi, “Iba tetezüji ya: molok asem tetezü anogo asem.

¹⁹Anogo asem tsüngda nung Faraoi na anitettsü, aser pai ne kolak atangtsü! Pai na süngdong ka nung metatsü, aser ozütemi ne shi achitsü.”

²⁰Tasemnübuba nung Farao asoba anogo, pa kübok tenzüker ajak asoshi yimpoksü yanglu, pai marok amsang aser am asanger tongtiba tena aniteta pa tenzükertem dangi anir aru.

²¹Marok amsang nemji tanaben pa akhi mapa meyipa agütsü, anungji pai chuba nem marok agütsü.

²²Saka am asanger nisungji soseta südaktsü. Item ajak Yosefi ashiba ama atalok.

²³Aji saka marok amsang tongtibai Yosefji mebilemtet, saka pa amadok.