Read njo LIPOK 41 Bible Online

LIPOK 41 - njo bible

LIPOK 41

¹Küm ana renteter, Faraoi pungmang ka pungmang: pa Nile ayongkhüm nung noktaka liasü,

²aser ajiang, tapayutsüka nashi teyira tenet ayong nungji adoka rem manung chiyima ali.

³Iba sülen nashi tenet tesempatsüka kongrasüker adoka mezüng adokba nashi denji arua noktak.

⁴Nashi tekongra tenet jagi teyira tenetji achi. Idangji Farao sakadok.

⁵Yaser pa mejanga ao tanabena pungmang, aser ajiang tsük modong ka nung tsükjong jilung-jilunger tajung tenet adok.

⁶Iba sülen anüdok mopung agi rongsetba tekongra modong tenet adok.

⁷Tsükjong tapung jagi tsükjong jilung-jilunger tajung tenetji meyok. Ajiser Farao saak, aser ajiang ibaji pungmang liasü.

⁸Anepdang pa temulung tip metemi aküm, aser pai Ijip lima nung ainkertem aser shisakar ajak jaten. Pai parnok dang pa pungmangtemji ashi, saka shingaia pa dang iba tetezü rateta meshitet.

⁹Idangji marok amsangi Farao dang ashi, “Tanü ni kü tia bilemtetogo.

¹⁰Khen mapang chubai pei kilir marok amsang aser am asanger dang ain adoka tepuokdak kibur kidang onok puok.

¹¹Konung künapronglai pungmang ka ka pungmang, aser iba tetezü balala liasü.

¹²Idakji Ibri nunger asangur ka tepuokdak tanishibar kidang kilir ka onok den liasü. Onoki pa dang pungmangji ashi, aser pai iba tetezü balalaji onok dang rateta ashi.

¹³Pai tetezü ashiba amaji ibaji shitak atalok; ni tanaben kü mapa agütsü, saka am asangsangbo soseta südaktsü.”

¹⁴Idangji Faraoi Yosef tani-i yoka, pa tepuokdak nungi aniteta anir aru. Pai ku mejepa süoshi melener Farao dangi aru.

¹⁵Faraoi pa dang ashi, “Ni pungmang ka pungmang, aser iba tetezü ratettsü shinga mali. Nai pungmang tetezü ratettsür ta kari kü dang shiogo.”

¹⁶Yosefi langzü, “Ni ibaji meinyaktet, saka Tsüngremi iba tetezüji Farao dang ashitsü.”

¹⁷Faraoi ashi, “Kü pungmang nung Nile ayongkhüm nung noktaka liasü.

¹⁸Idangji nashi teyira tenet ayong nungi adoka rem lanu chiyima liasü.

¹⁹Iba sülen nashi tekongra tenet adok. Iba ama tekongra aser tesempatsü nashiji ni Ijip nung kodanga munguka.

²⁰Nashi tekongra tenet jagi teyira tenetji chiadok.

²¹Saka parnoki aji chiaka, parnoki achibaji shingaia mechitet. Kechiaser parnokji akhi ama dang tesempatsüka kongrasüker liasü.

²²Ano ni kü pungmang nung tsükjong tajung tenet modong ka nung kanga junga mener angu.

²³Iba sülen anüdok mopung agi kongdaktsüba tsükjong takong tenet adok,

²⁴idangji tsükjong takong tenet jagi tajung tenetji meyokadok. Ni kü pungmang ainketertem dang ashi, saka shingaia item tetezü kü dang rateta meshitet.”

²⁵Idangji Yosefi Farao dang ashi, “Pungmang anaprongla tetezü kasa dang, Tsüngremi kechi inyaktsü aka, aji pai ne dang shiogo.

²⁶Nashi teyira tenet tetezü küm tenet, aser tsükjong tajung tenet tetezü küm tenet, pungmangji kasa dang.

²⁷Iba sülen adokba nashi tekongra tenet aser tsükjong tapung tenet tetezü küm tenet, tetezü küm tenet ayatsü.

²⁸Ni Farao dang jembiba o ya Tsüngremi yakta kechi inyaktsü iba indang Farao dang sayuogo.

²⁹Küm tenet Ijip lima ajak nung yimchiyimjung alitsü.

³⁰Iba sülen küm tenet ayawara alitsü, kechiaser ayawara jagi alimaji rusepdaktsütsü.

³¹Kaa yita aliba mapang ajak amadoktsüsa alima nung ayawaraji kanga sashia alitsü.

³²Nai pungmang tetezü kasa anaben tashi pungmangba tetezü Tsüngremi tarutsü nung kechi inyaktsü lemtetogo ibaji sayur.

³³“Tang Faraoi tangatetba akaba aser temeteter nisung kar bushia Ijip rongsen madak ketdang südakjang.

³⁴Faraoi ano tangar nisung kar shimteta Ijip lima nung küm tenet yimchiyimjung mapa adokba nungi shilem pungusü saruang.

³⁵Aser parnoki item küm tajung nungji chiyungtsü ajak bendendakjang, aser tachi-tajemtsü asoshi Farao tasa nung, yim ajak nung tsük rizünga yur nükdakjang.

³⁶Anungji Ijip lima nung tarutsü aliba ayawara küm tenet asoshi jendang aji rizünga ayu nung, idangji ayawara jagi alimaji mesamatsütsü.”

³⁷Farao aser pa den alir ajaki aji junger ta bilem,

³⁸Faraoi parnok dang ashi, “Tsüngrem tanela aliba nisung Yosef ama asenoki kar ngudi ma?”

³⁹Idangji Faraoi Yosef dang ashi, “Tsüngremi item ajak ne nem metetdaktsü nung, na ama teshisadanger aser shisa taka shinga melika.

⁴⁰ Na kü yimli madak kibur sang, aser kü jamirtemi ne dang angatsü. Oda chuba menden nung dang ni ne den tuluba südi.

⁴¹Ni tang na Ijip lima rongsen ajak madak kibur shimteter.”

⁴² Idangji Faraoi pei tenüng ajenba küri sepzüker Yosef temeyong nung sepoktsü, aser sentsüprang süoshi sübodaktsü, aser tekong nung hon zük azüktsü.

⁴³Pai pei kor talungtsü tanabuba nung pa mendaktsü, aser nisungtemi ayimtena ashi, “Lenmang lapokjang.” Aji oda pai Ijip lima rongsen ajak madak Yosef kibur kümdaktsü.

⁴⁴Faraoi Yosef dang ashi, “Ni chuba, na medeni Ijip lima nung shingaia teka süshia, tetsüng süshia mekangtsü makok.”

⁴⁵Faraoi Yosef dang Zefenath-Panea ta aja, aser On putir Potifera jala Asenat, kibutsü asütsü Yosef nem agütsü. Aser Ijip lima ajakleni Yosef ao.

⁴⁶Ijip chuba Farao yimli nung yimsü asütsü tenzükdang Yosef küm semer liasü. Aser Yosef Farao tsüngdang nungi oa Ijip lima ajaklen senzü.

⁴⁷Küm tenet yimchiyimjung mapang nungji alu nung tzük jenti aru.

⁴⁸Aser Ijip lima nung küm tenet nungji aruba tsük ajak pai bendena, yimti shia rizüng, yimtitem meketa aliba alu nungi adokba chiyungtsü ajak pai yangji rizüng.

⁴⁹Yamaji Yosefi molu lisem ama tsük jenti rizüng, oda onsara asünung aji mezüngdangtet, odang yutsü.

⁵⁰Ayawara marudang pa tebutsüi jabaso ana sotsü.

⁵¹Pai mezüng asoba tanur tenüngji Manase aja. Pai ashi, “Kechiaser Tsüngremi kü timtem ajak aser kübu kibonga amadaktsü.”

⁵²Jabaso tanabuba tenüngji Efraim aja. Pai ashi, “Kechiaser ni timtemba lima nung Tsüngremi kü nem techir moatsüogo.”

⁵³Küm tenet yimchi yimjung, koba nung Ijip nunger jenti kaa liasü aji tempanga aru.

⁵⁴Aser Yosefi ashiba ama küm tenet ayawaraji tenzük. Ayawaraji temeket linük ajak nung liasü. Saka Ijip lima ajak nung chiyungtsü liasü.

⁵⁵Kodang Ijip nungera ayatsü tenzük, parnoki chiyungtsü asoshi Farao dang ayimten. Anungji Faraoi parnok dang ashi, “Yosef dangi oang aser pai kechisa shidir aji inyakang.”

⁵⁶Ayawaraji alima ajaklen kanga sashia ao, anungji Yosefi jen ajak lapoka Ijip nunger tsük ayok.

⁵⁷Aser alima ajaklen nungi Ijipi tsük aneti Yosef dangi aru, kechiaser ajaklen ayawaraji kanga sashia liasü.