Read njo LIPOK 42 Bible Online

LIPOK 42 - njo bible

LIPOK 42

¹Kodang Ijip lima nung tsük lir ta Yakobi angashi, pai pei chirtem dang ashi, “Nenoki kechiba kati ka dak tejak ajitepa alir?”

²Ano pai ashi, “Ijip nung tsük lir ta ni angashiogo. Nenok ajagi lua asenok asoshi tsük alia bener atung, anungji asenok taya agi mesüi kümzüktsü.”

³Anungji Yosef tedi nunger terji Ijipi tsük alitsü alu.

⁴Saka Yakobi Yosef tenu Benjamin parnok den meyok, kechiaser pa dak langka ataloktsü ta pai tsübu.

⁵Yakob chirtema tsük aneti aortem rongnungji aden, kechiaser Kanan lima nunga ayawaraji liasü.

⁶Yosef Ijip rongsen ajak madak kibur kümer alima ajak nungi arurtem dang tsük yokya liasü. Idangji pa tedi nungertem arua pa tsüngdang apudak.

⁷Kodang Yosefi tedi nungertem angu, parnok shitet, saka pai parnok memetet ama kanga sashia asüngdang, “Nenok kong nungi aru?” Parnoki langzü, “Onok tsük alitsü Kanan nungi aru.”

⁸Yosefi tedi nunger shitetaka parnoki pa meshitet.

⁹Idangji parnok indang pai pungmangba bilemteta parnok dang ashi, “Nenok itdangiter, ozü lima tashi maitba ajitsü nenok aru.”

¹⁰Parnoki langzü, “Masü, kü kibur, onok ne kilirtem tsük aneti aruba lir.

¹¹Onok ajak tebu ka chir dang, ne kilirtem ochishirtem, itdangitertem masü.”

¹²Yosefi parnok dang ashi, “Masü! Nenok ozü lima kechi nung tashi mait, aji latangtsü aru.”

¹³Parnoki langzü, “Ne kilirtem adianu terana, tebu ka chirtem shiba Kanan lima nung alir. Onok rongnung tanubuti obala den lir, aser kabo süogo.”

¹⁴Yosefi parnok dang ashi, “Tang ang ni nenok dang itdangiter ta shiogo.

¹⁵Ya agi ni nenok tentangtsü: Farao tenüng ajenba agi ni azüngashir, nenok tenu tanubusangji yagi anir maru tashi nenok yang nungi maotsü.

¹⁶Nenok rongnung ka oa pa anir arung. Tanüngbaji yangi puoka atatsü, aji oda nenok agi nenok o shitak asü tiyazü metettsü. Yamaji mesüra Farao taküm agi ni azüngashir, nenok atangji itdangiter.”

¹⁷Aser pai parnok anogo asemnü puoka ayu.

¹⁸Asemnübuba nung Yosefi parnok dang ashi, “Nenoki yamai inyakra ni nenok kümzüktsü, kechiaser ni Tsüngrem tsübur.

¹⁹Nenok ochishir süra nenok rongnung ka iba tepuokdak atang, aser tanüngba jagi nenok kidang ya-a alirtem dangi tsükji bener oa agüjang.

²⁰Aser nenoki nenok tenu tanubusangji kü dangi anir arung. Aji agi nenok ochishir asü masü ni nenok metettsü.” Aser parnoki yamaji inyak.

²¹Parnok rongnung jembitepa ashi, “Atangji asen tenu anema aibelena benshiba yong asenok tim atemer, kechiaser pai asenok dang kanga mepishidang asenoki manga, anungji iba timtem asen dangi arur.”

²² Reubeni ashi, “Nenoki tanur anemaji temenen tebenshi ta ni meshika ma? Saka nenoki manga. Tang pa asüba atema asen dangi ibai aruogo.”

²³Yosefi parnok o mangatettsü ta parnoki mebilem, kechiaser parnok tsüngda o meyiper ka liasü.

²⁴Yosefi parnok toktsür oa ajebtsü tenzük, saka pai parnok dangi arua tanaben jembi. Aser pai Simeon aniteta parnok jakdang pa alen.

²⁵Idangji Yosefi parnok juli nung tsük südaktsü, aser nisung shia pei juli nung pei sen shia enoktsür, parnok lendang achitsü teperi agüjang ta mela. Yamaji parnok dang inyak.

²⁶Ajiser parnoki pei gado nung khu oshir apuso,

²⁷aser aonung ayipdak parnok kati pei gado nem monü agütsütsü asoshi juli sala nung pei sen julibang nung liasü.

²⁸Idangji pai adianutem dang ashi, “Kü senbo meyipa enokja lir, ajiang sen kü julibang nung kar!” Aser parnok temulung nung tetsübu agi sünga kati ka dang ashi, “Tsüngremi asenok dang inyakba ya kechi?”

²⁹Kodang parnoki Kanan lima atong, tebu dang parnok dak atalokba ajak ashi.

³⁰Ijip lima kiburi onok dang o kanga sashia jembi aser par lima anema itdangitertem ta shia liasü;

³¹Saka onoki pa dang ashi, “Onok tsüngchir nisung, itdangitertem masü.

³²Onok tebu ka chirtem adianu terana. Kabo süadokogo, aser tanubudi Kanan nung onok tebu den lir ta ashi.”

³³Yangji aliba kiburi onok dang ashi, “Nenok tamayazür nisung süra ya agi ni metettsü, nenok rongnung ka kü den yutsür tanüngbaji kidang ya-a alirtem asoshi tsük bener oang.

³⁴Nenok tenu tanubusangji kü dangi anir arung, ajagi nenok itangiter masü, saka ochishirtem ta ni metettsü, ni nenok tenu nenok nem meyipa agütsütsü, aser nenok idaki arua shishia liang.”

³⁵Iba sülen parnok nisung shia pei juli nungi tsük tokzük nung nisung shia pei senlep pei juli nung aliba ngua, Tebu Yakob aser parnok ajak tsübua adok.

³⁶Idangji parnok tebui parnok dang ashi, “Nenoki ni techir makai kümdaktsüogo. Yosef mali aser Simona mali, aser tang nenoki Benjamina anir onür. Item ajak ya ni anema lir.”

³⁷Idangji Reubeni tebu dang ashi, “Ni Benjamin ne dangi meyipa anir marura, nai kü chir anaji tepsetang. Ni pa anebalua ne dangi tanaben anir arutsüsa nai pa kü den yokang.”

³⁸Saka Yakobi ashi, “Kü chiri nenok den ajagi maotsü, kechiaser tedi süogo aser pa kija dang anünga lir. Lenmang nung lendong kar pai ajurura, kü asa taoi iba tejashi jagi nenoki ni asüleni yoktsü.”