Read njo LIPOK 43 Bible Online

LIPOK 43 - njo bible

LIPOK 43

¹Tang alima nung ayawaraji kanga sashia liasü.

²Kodang parnok Ijip nungi bener aruba tsük chiyungma, parnok dang tebui ashi, “Ano oang aser asenok asoshi tsük tera alia bener arung.”

³Saka Yihudai pa dang ashi, “Nisungbai jagi onok dang jung junga shiogo, nenok tenuji nenok den anir marura, nenoki kü tejakbo mangutsü” ta ashi.

⁴Nai onok den onok tenuji yokra, onoki ne nem tsük alitsüi odi.

⁵Saka nai pa meyokra, onoki maotsü, kechiaser nisungba jagi onok dang ashi, “Nenoki kü tejakbo mangutsü.”

⁶Yakobi ashi, “Nenok tenua ka lir ta nisungba dang ashiba yagi kechiba nenoki kü nem iba timtem bener arutsü?”

⁷Parnoki langzü, “Nisungba jagi onok indang aser asen kinunger indang sashia asüngdanga ashi, nenok tebu tang tonga taküm lir ma? Aser nenok tenu ka lir ma? Anungji onoki pa o ama langzü, aser pai nenok tenu yagi anir arung ta ashitsüa ta onoki koda metet?”

⁸Idangji Yihudai tebu Israel dang ashi, “Tanurji kü den yokang, aser onok apusoa odi, anungji onok, na aser ozü chirnura mesüi taküm alitsü.

⁹Pa asoshi ni kuli südi, kü ket nungi nai pa meshiang; aser ne madang meyutsüra ajangla teti ni tai asütsü.”

¹⁰Kechiaser onoki memenulasang, tangibo onok tanaben arur lila.

¹¹Idangji tebui parnok dang ashi, “Ajangla yamaji südi süra, ya oda sangma, nisungba nemji asen lima nungi adokba süngjang tajung, temezüba mozü, ninang mochitzü tera, an menemtsü, teronem menemba pista aser almond süngjang, itemji ishika khu nung oshia benang.

¹²Nenok julibang nung shia agütsüba sen bener oa agüjang. Ashiko langka nung aitepa alitsü südi.

¹³Nenok tenu anir iba nisung dang jagi luang.

¹⁴Ajak Takoksang Tsüngremi pa madang nenok nem taochi ngudakjangma, oda nisungba jagi Benjamin aser nenok adianu tangarbaji nenok den meyipa anir yoktsü. Ni techir mali kümtsüra joko techir malia ta dang lidi.”

¹⁵Anungji adianutem jagi parnok den sempettem aser pei sen aser Benjamin anir oa Yosef madang noktak.

¹⁶Kodang Yosefi parnok den Benjamin angu, par kidang ketdangbuba dang ashi, “Item nisungtemji ozü kidangi anir oang, shiruru ka tepseta chiyungtsü renemang; kechiaser tanü anjongmeshi nung parnok kü den chiyungtsü.”

¹⁷Ketdangbubai nisungtemji Yosef kidangi anir aru, aser pa dang ashiba ama inyak.

¹⁸Kodang parnok Yosefer kidangi anir ao, parnok tsübua liasü aser bilem, “Mezüng asenok juli nung sen agütsüba asoshi asenok yagi anir aru. Pai asenok dak tai enokja asenok pua alar kümdaktsütsü aser asen meyong gado agitsü.”

¹⁹Anungji Yosef ketdangbuba dang parnoki kikümdang oa ashi,

²⁰“Yimlibilema tulur, onoki mezüng tsük ali-i alu,

²¹saka aonung kodang onoki juli sala, onok nisung shia pei senlep shitak angu. Anungji onoki aji meyipa bener aru.

²²Ano tsük alitsü asoshi onoki sen balaka bena lir. Shibai onok juli nung senji enoktsüar aji onoki memetet.”

²³Idangji nisungba jagi langzü, “Nenok tsübua shisa tebuluma. Nenok Tsüngrem, aser nenok tebu Tsüngremi nenok juli nung senji yutsü; nibo nenok sen agizükogo.” Idangji pai parnok dangi Simeon anir aru.

²⁴Ketdangbuba jagi parnok Yosefer kidangi anir arua tetsüng shitoktsü tzü agütsü, aser parnok gado nem monü agütsü.

²⁵Anjongmeshi nung Yosef arudang pa nem agütsütsü sempetji parnoki renem, kechiaser parnok pa den chiyungtsü ta parnoki angashia liasü.

²⁶Kodang Yosef kidangi aru, parnoki bener aruba sempetji pa nem agütsü aser parnoki pa madang ali nung apudak.

²⁷Pai parnok tia indang asüngdang, “Nenok tebu tambur ka lir ta ashiba to koma lir? Pa tanga taküm lir ma?”

²⁸Parnoki langzü, “Ne kilir, onok tebu ano taküm lir aser junga lir.” Aser parnoki pa nem akhüm agüja apudak.

²⁹Kodang Yosefi tenu Benjamin angu, pai asüngdang, “Nenok tenu tanubusang indang nenoki ashibato ibai asü? Tebu, Tsüngremi na moajang.”

³⁰Idangji Yosefi pei tenu Benjamin indang aria bilemdang pa temulung raksa-a parnok toktsür pei taktangi yia ajeb.

³¹Aser pei tejak meyir temai adok, aser pei sasa süngjemshir chiyungtsü renemang ta ashi.

³²Idangji parnoki Yosef, tedi nunger aser Ijip nunger shir pa den chiyung, parnok nem chiyungba langbang balala renemtsü. Kechiaser Ibri nunger den külemi chiyungtsübaji Ijip nunger atema tesembatsü liasü.

³³Adianutemji Yosef den tejak reprangtepa, aser tasoba tamburen nungi mendaktsü. Kodang parnok yamaji mendaktsübaji angu, parnoki süngmangtepa kati ka dak reprang.

³⁴Yosefi langbang nungi parnok nem chiyungtsü lemsa-a agütsü, aser tangar dang nungi pungusü agi tali Benjamin nem agütsü. Idangji parnoki pa den sadok sadoka chia ajem.