Read njo LIPOK 44 Bible Online

LIPOK 44 - njo bible

LIPOK 44

¹Yosefi ketdangbuba dang ashi, “Nisungtem nemji parnoki akokba tashi juli nung tsük sepdakjang, aser nisung shia pei senji julibang nungji enokjang.

²Ano tanubusang juli nungjibo pa tsük aser sen den külemi kü taribi marok julibang nungji enokjang.” Yosefi ashiba ama pai inyak.

³Anepungi nisungtemji pei gado anir küpa ao.

⁴Aser parnoki yimti nungi apigati maodang, Yosefi ketdangbuba dang ashi, “Aramesoang, nisungtem sülenji aritaka oang, aser kodang parnok menepdir parnok dang shiang, ‘Nenoki tajung melen kechiba tamajung benshir?

⁵Kechiba nenoki kü kibur marok koba nung pai ajemer aser an toktanger, aji auya? Nenoki aibelen tulu ka inyakogo.’ ”

⁶Kodang ketdangbubai parnok menep, pai kasa oji ashi.

⁷Saka parnoki pa dang langzü, “Onok kiburi jembiba tetezü ya kechi? Onoki yamaji kodanga mebenshi ta azüngashidi.

⁸Ajiang onok julibang nung aliba sena onoki Kanan lima nungi meyipa ne dangi bener arutsü. Süra kechiba onoki hon mesüra taribi ozü kibur ki nungi auyatsü?

⁹Ne kilir ka ket nung danga aji ngurabang pa südakjang, aser onok tanüngbaji onok kibur lar südi.”

¹⁰Pai ashi, “Nenoki ashiba amaji sang, saka shiba khu nung marokji ngudir, paji dang kü kibur lar asütsü, aser nenokbo iba taitsüba nungji matentsü.”

¹¹Parnoki ilunga pei juli ali nung agizüka julibangji sala.

¹²Idangji ketdangbubai parnok khuji tambuti nungi tenzüka tanubuti tashi reprang nung marokji Benjamin juli nung liasü.

¹³Idangji adianutemi pei süoshi shisa, aser pei khu gado nung oshia bener yimti jagi tanaben aru.

¹⁴Kodang Yihuda aser pa adianutem Yosefer kidangi aru, pa ano yangji liasü, aser parnoki pa madang apudak.

¹⁵Yosefi parnok dang ashi, “Nenoki inyakba ya tetezü kechi? Ni amala nisung yagi an toktangba agi nenok putettsü ta nenoki memetet no?”

¹⁶Yihudai langzü, “Ozü kibur dang onoki koda jembitsü? Onoki kechi ashitsü? Tsüngremi ozü temenen temai adokdaktsüogo, ajiang shiba ket nung marokji agi, pa dang masü onok ajak kü kibur lar südi.”

¹⁷Saka Yosefi ashi, “Ni yamaji kodanga mebenshitsü, shiba ket nung marokji liasü, pa dang kü lar asütsü, saka nenok tanüngba nisungtembo pei tebu dangi yimjung nung oang.”

¹⁸Idangji Yihudai pa anasa or ashi, “Oh kü kibur, ne narong agi angashia ne kiliri o ka ashitsü ni mepishir, aser ne kilir madang terasama; KIBUBA, na Farao den saku.

¹⁹Kibur, nai onok dang, ‘nenok tebu mesüra tenu ka lir ma?’ ta asüngdang.

²⁰Onoki langzü, ‘Onok tebu tambur ka lir, aser pa tambur kümer asoba onok tenu ka lir. Pa tedibo süogo, aser tetsüi asoba tanur paji dang asüba agi tebui pa kanga meimer.’

²¹Idangji nai ne kilirtem dang ashi, ‘Ni reprangdangtsü atema pa yagi anir alung.’

²²Anungji onoki langzü, tanur jagi tebu toktsür malutettsü, pai yamaji inyakra pa tebuji asütsü.

²³Idangji nai ashi, ‘Nenoki nenok tenu tanubusangji yagi anir malura nenoki kü tejakbo mangutsü.’ ”

²⁴“Kodang onok tebu dangi meyipa ao, onok kiburi ashiba ajak onoki pa dang ashi.

²⁵Idangji pai onok dang, ‘Meyipa oa tsük alia bener arung’ ta ashi.

²⁶Saka onoki langzü, ‘Onoki moutettsü, tebusang onok den denra onok aotsü, kechiaser tanubusangji onok den medenra onokibo nisungba jakji mungutettsü.’

²⁷Obalai onok dang ashi, ‘Kübutsüi tanur ana dang aso ta nenoki metet.

²⁸Tena rongnung kabo kü dang nungi tama ogo. Ashiko arem shiruru kati pa anüka shisaogo südi, kechiaser ni tang tonga pa mangu.

²⁹Tang nenoki ibai kü dang nungi anir oa pa dak langka atalokra, ajangla kü sasa taoi iba tejashi jagi ni asüleni yoktsü.’ ”

³⁰“Anungji kibur, tanur shiba dang kübui pei taküm ajak agi meimer ni ne kilir kübu dangi aodang, tanurji onok den medenra,

³¹aser kübui tanurji mungura pa asütsü. Aji oda ne kilirtemi ne kilir ozü tebu kupu pur tejashi agi asü yimi yoktsü.

³²Kechiaser ne kiliri tanur asoshiji kuli süa shiogo, oda ni pa ne dangi anir marura, ni teti kübu madang tai alitsü.

³³Anungji tang ne kiliri mepishir, tanur melen ne kilir kü kibur lar süa lidi, saka tanurjibo tedi nunger den yokangma.

³⁴“Tanurji kü den medenra ni kodaser kübu dangi meyipa aotsü? Kechiaser obala dangi timtem arubaji ni ajia melitettsü.”