Read njo LIPOK 45 Bible Online

LIPOK 45 - njo bible

LIPOK 45

¹ Idangji Yosefi pa sasa temulung mesüngjemteti aküm nung pa den noktaka alir ajak pa nungi aenshiang ta ashi. Anungji pai pei adianutem dang pa jak shitetdaktsü dang shinga maliasü.

²Aser pai tashi agi kanga ajeb nung pa olaji Ijip nungertemi angashi, aser iba nungjagi Farao kidang alirtem tonga ao.

³Yosefi pei adianutem dang ashi, “Ni Yosef to lir, kübu tang tonga taküm lir ma?” Kodang parnoki ya angashi pa dang kecha melangzütet, kechiaser parnok pa madang kanga tama.

⁴Aser pai parnok pa anasai aja aser ashi, “Ni nenok tenu Yosef, shiba nenoki Ijip nunger dang ayok.

⁵Nenoki ni yangi yokba atema nenok rongnung aitsütepa tejashima, mesüra pei sasa dang terasama, kechiaser taküm kümzüktsü asoshi Tsüngremi nenok dang tama ni yangi yok.

⁶Tang alima ajak nung ayawara küm ana dang rentetogo, ano küm pungu tashi metsü meyoktsü, mesüra alu marutsü,

⁷saka nenok aser nenok chirtem kümzüktsü iba tesüngmangtsü tekümzükba mapa asoshi Tsüngremi ni nenok dang tama yok.”

⁸“Anungji nenoki ni yagi yok masü, saka Tsüngremi yok. Pai ni Farao madang pa tebu ka ama aser par kidang aser Ijip lima ajak madak yimsüsür kümdaktsü.”

⁹“Tang nenoki ilungang, aser kübu dangi oa pa dang shiang, Ne jabaso Yosefi o ya shioker, Tsüngremi ni Ijip lima ajak nung kibur kümdaktsüogo, na kü dangi alung, menua teli,

¹⁰na Goshen lima nung liang; angji ne chirtem aser semchirtem aser ne san telok, nashi telok, aser na akaba ajak ni anasa alitsü.

¹¹Idakji ni na mesüdi, kechiaser ano küm pungu ayatsü, aji mesüra ashiko na, ne kinunger aser kechisarena akaba ajak akoksatsü.”

¹²“Atangji ni kü bang agi nenok dang ashir ta nenoki pei tenük agi aser künu Benjamin tenük agi nguogo.

¹³“Ano Ijip lima nung ni uluba ajak aser nenoki pei tenük agi kechisarena anguba otsü ajak kübu dang shiangma; aser yakta kübu yangi anir alung.”

¹⁴Idangji pai pei teka agi tenu Benjamin tekong nung azüiter ajeb, aser Benjaminia pa dak azüiter ajeb;

¹⁵Ajiser pai tedi nunger ajak dak tebang mesep aser ajeb. Iba sülen tedi nungertemi pa den o jembi.

¹⁶Kodang Yosef adianutem alua lir ta Farao aser pa den alirtemi angashi, parnok kanga pela

¹⁷Pai Yosef dang ashi, “Ne adianutem dang shiang, nenoki shiruru nem khu bendaktsür Kanan limai oang.

¹⁸Parnok tebu aser kinunger ajak yagi anir alung. Ni nenok nem Ijip lima ajak dang tajungtiba tesem agütsütsü, aser angji nenok alua temo nungi chia alitsü.

¹⁹Ijip nungi talungtsü kar anir oa parnok kinungtsürtem, tanurtem aser parnok tebu anir arung ta shiang.

²⁰Nenoki pei oset indang kecha tebilem, kechiaser Ijip nung aliba oset tajungtiba ajakji nenok meyong asütsü.”

²¹Israel chirtemi parnok dang ashiba amaji inyak. Faraoi melaba ama Yosefi parnok nem talungtsü den parnok lenmang asoshi chiyungtsü agütsü.

²²Ano pai parnok shia nem temelentsü süoshi agütsü, saka pai Benjamin nem pai senpak noklang asem aser temelentsü sü pungu agütsü.

²³Aser pai pei tebu nem gado ter amena Ijip lima adokba oset tajungtem aser gado ter nung tsük, am aser tanga chiyungtsütem parnok lenmang asoshi bener yok.

²⁴Ajiser pai adianutemji küpa yok aser pai parnok dang ashi, “Nenok aodang lenmang nung teraratep.”

²⁵Anungji parnoki Ijip toktsür Kanani pei tebu dangi shilang.

²⁶Parnoki pa dang ashi, “Yosef to tang tonga taküm lir. Pa Ijip ajak madak kibur lir!” Saka Yakob temulung atem, kechiaser pai parnok o mamang.

²⁷Saka kodang Yosefi parnok dang ashiba oji pa dang ashi, aser pai Ijipi anir alutsü asoshi talungtsü bener yokbaji angu, pa temulung shia aru.

²⁸Idangji Israeli ashi, “Kü chir Yosef taküm lir na! Ya ni asoshi teperi! Ni masüdangsa ni oa pa ajidangdi.”