Read njo LIPOK 46 Bible Online

LIPOK 46 - njo bible

LIPOK 46

¹Anungji Yakobi pei akaba ajak bener apuso, aser Beersheba tonga aru, idakji pai pei tebu Isak Tsüngrem dang tarongba tenla agütsü.

²Aser aonung mangdang ka nung Tsüngremi pa den jembia ashi, “Yakob, Yakob!” Yakobi langzü, “Ni yangi lir.”

³Idangji pai ashi, “Ni Tsüngrem, nebu Tsüngrem, Ijipi aotsü tetsübuma, kechiaser idakji ni ne semchirtem kin tulu ka kümdaktsütsü.

⁴Ni ne den Ijipi aotsü, aser ni ne semchirtem tanaben iba limaisa meyipa anir arutsü, aser Yosef teka manung ne arishi atemtsü.”

⁵Idangji Yakobi Beersheba nungi apusoa, aser par chirtemi parnok kinungtsürtem aser tila tanurtem Faraoi bener yokba talungtsü nungji mendaktsü.

⁶Parnoki Kanan nung bendenba rongsen aser taküm shiruru ajak anir Ijipi alu. Yakobi pa dak jakzükba nisung ajak anir alu,

⁷oda pei jabaso jalatem aser semchirtem ajak anir alu.

⁸Ijip limai aoba Israel chirtem itemi, Yakob mezüng jabaso Reuben.

⁹Reuben chirtem: Hanok, Palu, Hezron aser Karmi.

¹⁰Simeon chirtem: Yemuel, Yamin, Ohad, Yakin, Zohar aser Kanantsüri asoba tanur Shaul.

¹¹Levi chirtem: Gershon, Kohat aser Merari.

¹²Yihuda chirtem: Er, Onan, Shela, Perez aser Zera. Saka Er aser Onan Kanan lima nung asü. Perez chirtem: Hezron aser Hamul.

¹³Issakar chirtem: Tola, Pua, Yashub aser Shimron.

¹⁴Zebulun chirtem: Sered, Elon aser Yahlel,

¹⁵Parnokji Dina dena Padan-aram nung alidang Leai Yakob nem sotsübatem. Parnok ajak agi semer asem.

¹⁶Gad chirtem: Zefon, Haggai, Shuni, Ezbon, Eri, Arod aser Areli.

¹⁷Asher chirtem: Imna, Ishva, Beria aser parnok tenu tetsür Sera. Beria chirtem: Heber aser Makliel.

¹⁸Itemji Labani pei jala nem agütsüba Lea kilitsür Zilpa ajanga Yakob nem sotsüba parnok ter-trok.

¹⁹Yakob kinungtsü Racheli pa nem jabaso ana: Yosef aser Benjamin sotsü.

²⁰On nung putir Potifera jala Asenati Ijip nung Yosef nem jabaso ana: Manase aser Efraim sotsü.

²¹Benjamin chirtem, Bela, Beker, Ashbel, Gera, Maman, Ehi, Ros, Muppim, Huppim, aser Arrd.

²²Itemji Racheli Yakob nem sotsüba parnok ter-pezü.

²³Dan chir Hushim.

²⁴Naftali chirtem: Yahaziel, Guni, Yezer aser Shillem.

²⁵Itemji Labani pei jala nem agütsüba Rachel kilitsür Bilhai Yakob nem sotsüba parnok tenet.

²⁶Yakob dak jakzükba aser pa den Ijip limai aoba chir kinungtsütem mezüngi parnok roker-trok.

²⁷ Ijip lima nung Yosef chir ana aso. Anungji Ijip limai aoba Yakob kidong ajak agi nisung neter liasü.

²⁸Goshen limai lenmang anitsü asoshi Yakobi parnok jakdang Yihuda Yosef dangi yok, aser parnoki ao Goshen lima atong.

²⁹Yosefi pei kor talungtsü nung mener tebu den ajuruteptsü asoshi Goshen limai ao. Kodang parnok ajurutep, Yosefi pei teka agi tebu dak azüiter talangka ajeb.

³⁰Tesü Yakobi Yosef dang ashi, “Tang ni asütsü renema lir, kechiaser ni na taküm lia ne jak nguogo.”

³¹Idangji Yosefi tedi nunger aser tebu kinunger dang ashi, “Ni Farao dangi oa kü adianutem aser kübu kinunger shir Kanan lima nung liasü, parnok kü dangi arua lir ta Farao dang shidi.

³²Ni pa dang nenokji sannüker aser shiruru metsürtem, nenok akaba shiruru ajak anir arua lir ta shidi.

³³Kodang Faraoi nenok jar nenok kechi mapa inyakertem ta asüngdangdir,

³⁴nenoki yamai langzüang, ‘Ne kilirtem onok lanuwa nungi tang tonga onok tebutem ama kiset shiruru anükertem.’ Anungji pai nenok Goshen lima nung lidaktsütsü.” Ijip nungeri sannükertembo sempa ta meteta Yosefi iba o ya ashi.