Read njo LIPOK 47 Bible Online

LIPOK 47 - njo bible

LIPOK 47

¹Anungji Yosefi Farao dangi oa ashi, “Kübu aser kü adianutem parnok akaba oda san aser shiruru telok ajak anir arua lir. Parnok tang Goshen lima nung anena lir.”

²Aser pai pa adianutemji Farao dang sayu.

³Faraoi parnok dang asüngdang, “Nenok kechi mapa inyaker?” Parnoki langzü, “Ozü tsüraburtem ama onok ne kilirtem sannükertem lir.”

⁴Parnoki ano Farao dang ashi, “Onok idaki mapang tatsüka alitsü aruogo, kechiaser Kanan nung ayawaraji kanga sashia lir, onok ne kilirtem san chimdak maka. Anungji ne kilirtem Goshen lima nung lidakjang ta mepishir.”

⁵Faraoi Yosef dang ashi, “Tang nebu aser ne adianutem ne dangi aruogo.

⁶Ijip limaji ne jakdang lir. Ali tajungtiba Goshen linük nungji parnok lidakjang. Aser parnok rongnung mapa ajeter kar lira, parnok kü kiset shiruru madak kibur südakjang.”

⁷Iba sülen Yosefi pei tebu Farao dangi anir aru. Yakobi Farao moatsü.

⁸Aser Faraoi Yakob dang asüngdang, “Na arishi küm kwi?”

⁹Yakobi langzü, “Ni aenersa senzüba küm noklang ka ser semer. Kü arishi tatsüka dang, saka item anogotemji timtem agi dang sünga lir. Alemli kübou nungeri sema senzüba anogobo nia metongtet.”

¹⁰Aser Yakobi Farao moatsü aser pa nungi pila-a ao.

¹¹Idangji Yosefi tebu aser pa adianutem nem Ijip lima tajungdak Ramses yimti anasa Faraoi ashiba ama talidak agütsü.

¹²Yosefi tebu aser pa adianutem aser tebu kinunger ajak nem parnok kibong shia nung alir tanur shia apir parnok nem chiyungtsü lemsaa agütsü.

¹³Ayawaraji onsara sashi nung alima ajak nung chiyungtsü makai aküm, Ijip nunger aser Kanan nunger ajak taya agi lumiseta adok.

¹⁴Aser Ijip aser Kanan nung aliba sen ajak koba parnoki tsük aliba jenjang Yosef nem agütsü, item sen ajakji Yosefi bendener Farao kidangi aruli asü.

¹⁵Kodang Ijip nunger aser Kanan nungertemi pei sen ajak agimadok, Ijip nungertem Yosef dangi arua ashi, “Onok nem chiyungtsü agüjang! Kechiba ne madang onok asütsü? Joko onok sen maka.”

¹⁶Yosefi parnok dang langzü, “Ajangla nenok kiset shirurutem bener arung, nenok sen makara kiset shiruru melen ni nenok nem tsük agütsüdi.”

¹⁷Anungji parnoki pei kiset shiruru Yosef dangi bener aru, aser Yosefi parnok kor, san, nabong, nashi aser Gado melen tsük agütsü. Pakümji pai parnok kiset shiruru ajak melen tsük agütsü.

¹⁸Aser iba kümji temer parnoki pa dangi arua ashi, “Ozü kibur madang nungi onok kecha memiimshili, kechiaser sen aser kiset shiruru ajak ozü kibur meyong kümogo, tang ozü temang aser ali dak alema onok kecha maka.

¹⁹Kechiba ne nükdang onok aser onok lima samatsü? Tsük melen onok aser ozü ali aliang. Onok aser onok li ajak Farao lar asütsü. Onok nem metsü kua, aji oda onok mesüi taküm alitsü aser alua arem makümtsü.”

²⁰Anungji Yosefi Ijip lima ajak Farao nem alitsü, kechiyong Ijip nunger ajaki pei alu ayok; kechiaser ayawaraji onsara sashia liasü. Aji oda Ijip nunger lu ajak Farao meyong aküm.

²¹Aser Yosefi nisungtemji Ijip lima tatem külen nungi tatem külen tashi alar kümdakja ayu.

²²Saka pai putirtem alidakjibo malizük, kechiaser parnoki Farao nungi parnok ta-a ngua liasü, aser iba nungjagi parnok chiyungtsü peria angu.

²³Yosefi nisungtem dang ashi, “Tang ajiang, tanü ni nenok aser nenok li Farao asoshi alizüktsüogo. Nenok asoshi yangi metsü lir, aji bener oa alu nung prokang.

²⁴Saka kodang alu rudir, nenoki shilem pungusü lemsar shilem ka Farao nem agüjang aser tanüngba shilemji metsü aser nenok kidang alirtem asoshi chiyungtsü asütsü.”

²⁵Parnoki langzü, “Kibur, nai onok kümzükogo, nai onok dang kanga junga benshiogo, onok Farao lar kümdi.”

²⁶Anungji Yosefi Ijip nung ozüng ka ya oda yanglu, pungusü nung kasü Farao meyong asütsü. Tanü tashi iba ozüng parnoki amshir. Saka putir libo Farao meyong maküm.

²⁷Aji oda Israel nunger Ijip lima Goshen nung ali, aser parnok takar küma soyapokya-a jenti aren.

²⁸Yakob Ijip nung küm ter-tenet ali, aser pa küm ajak agi noklang ka ser lir-tenet liasü.

²⁹ Kodang pa asütsü mapang atong, pai pei chir Yosef aja aser ashi, “Ne teka kü tepibok nung yuang[37] aser nai kü mang Ijip nung maremtsü ta azüngashiangma.

³⁰Kodang ni kübu nunger den mejangdir, Ijip nungi ni bener oa parnok leper nung rema yujang.” Yosefi langzü, “Nai ashiba amaji ni inyaktsü.”

³¹Yakobi ashi, “Nai aji inyaktsü ta azüngashiang.” Aser Yosefi azüngashi, aser Yakobi pei yipten kolak nung mechioker tenüngsang agütsü.