Read njo LIPOK 48 Bible Online

LIPOK 48 - njo bible

LIPOK 48

¹Ajiser kari Yosef dang ashi, “Ajiang nebu shirangdagi.” Anungji pai pei jabaso ana: Manase aser Efraim pa den anir ao.

²Kodang par chir Yosef arudar ta Yakob dang ashi, pai pei tashi shia arushir yipten manung amen.

³ Yakobi Yosef dang ashi, “Ajak Takoksang Tsüngremi Kanan lima nung Luz yimtak kü dangi jungkai adoka ni moatsüogo.

⁴Pai kü dang ashi, ‘Ni na kanga tejang tanga rendaktsüdi, aser na nungi jakzükbatemji kin tulu ka kümdaktsüdi. Ni iba lima ne semchir nem teti asoshi agütsüdi.’ ”

⁵“Aser tang ne chir ana shir ni Ijip limai marudang ne nem sotsü aji kü meyong alitsü, Reuben aser Simeon ama tenajia kü chirtem akümtsü.

⁶Saka tena sülen ne chir kwika sodir parnokjibo ne meyong alitsü, aser parnok senmang asoshi parnok tenüngji tedi nunger tenüngren agi ajatsü.

⁷ Ni ibai netsü Rachel tenüng nung inyaker. Kechiaser ni Padanaram nungi Kanan limai arudang lenmang nung Efrat atongtsü tatsüka lia ni tejashi tulu agi atongtsüsa Rachel asü, aser ni la yangji Efrati (aji Bethlehem) aoba lenmang nung rema yutsü.”

⁸Kodang Yakobi Yosefer jabaso anaji angu, pai asüngdang, “Tanur anaji shirnoksa?”

⁹Yosefi langzü, “Tsüngremi idaki kü nem moatsüba ya kü jabasotem.” Yakobi ashi, “Kü dangi anir arung aser ni parnok moatsüdi.”

¹⁰Yakob tambur asünung tenük mejungi kümer junga majitet. Yosefi tanurji pa anasa anir aru aser pai parnok dak azüiter tebang mesep.

¹¹Yakobi Yosef dang ashi, “Ni na tanaben angutsü ta meimla, saka Tsüngremi kü nem ne chirtem ngudaktsüogo.”

¹²Idangji Yosefi tebu tepi manung tanurji anizüker parnok tejak alilen shir apudakdaktsü.

¹³Yosefi Efraim Yakob tabelen tsütsü, aser Manase Yakob ajichilen ta amer tebu dangi aru.

¹⁴Saka Yakobi pei teka paitepa Efraim tanubu saka pa dak teka tajichi agi, aser tambusang Manase dak tabelen agi ta nemet.

¹⁵Aser pai Yosef moaja ashi, “Tsüngrem shiba madang kübu Abraham aser Isak jaja, Tsüngrem shibai kü arishi anogo songtema ni anük,

¹⁶Tsüngrem tenyar shibai tamajungba ajak nungi ni kümzüka yutsü, Pai item tanur ya moajang. Kü tenüng aser kübou Abraham aser Isak tenüng agi parnok ajatsü, aser parnok metsü alima nung kanga rendakjang.”

¹⁷Kodang tebu teka Efraim kolak nung nemeta angu, Yosefi mepelai aküm. Anungji pai pei tebu ajichilen tekaji Manase kolak nung ataloka yutsü.

¹⁸Aser pai tebu dang ashi, “Yamaji masü, oba ibaiang tambusang lir, ne teka tajichi pa tekolak manung nemetangma.”

¹⁹Saka tebui ibaji nungtema ashi, “Ni shiteter kü chir. Ni meteter. Manase dak nungi jakzükbaji kidong tulu ka akümtsü. Saka pa dang nungi tenu tuluba asütsü, aser pa dak jakzükbaji kin telok aika akümtsü.”

²⁰ Anungji panüjisa pai parnok moaja ashi, “Ne tenüng atemer Israeli iba temoatsü agütsütsü. Tsüngremi na Efraim aser Manase ama kümdakjang.” Anungji pai Efraimji Manase tema dang yutsü.

²¹Ajiser Yakobi Yosef dang ashi, “Ajiang ni tasütsü anasa lir, saka Tsüngrem ne den alitsü, aser tanaben nebou nunger limai na meyipa anir arutsü.

²²Iba dak tali ne adianutem dang nungi alia, Shekem lushi koba ni kü lijak aser kü nok agi Amor nunger ket nungi makzük, aji ne nem agütsür.”