Read njo LIPOK 49 Bible Online

LIPOK 49 - njo bible

LIPOK 49

¹Idangji Yakobi pei chirtem jar ashi, “Nenok ajak sentepang, aser tarutsü anogotem nung nenok dangi kechi arutsü, iba indang ni nenok dang shidi:

²‘Oh Yakob chirtem külemi senteper angang, aser nenok tebu Israel dang angang.’

³“Reuben, na kü mezüng chir, na kü tashi aser kü tashi mezüng süngjang. Na akhüm taket aser tashi tait!

⁴Na tzü mesüngjemtet ama, na merena malitsü, kechiaser nai pei tebu yipteni atu, kü yipteni tua aji menentsü.

⁵Simeon aser Levi adianu ana; parnoki azü tokshitsü asoshi parnok nok o nü amshir,

⁶ni parnok jembishinüba rongi maitsü, parnok mungdang nung ni madentsü. Kechiaser terasadang parnoki nisung tepseter, parnoki nashi pungchi temeküp tezü leptangtsür.

⁷Parnok terasaba dak atakatem kaoang, kechiaser ibaji onsara tesashi! Parnok ain adokbaji onsara tesashi. Ni parnok Yakob nung lemsatsütsü, aser Israel nung parnok prokshidaktsütsü.

⁸“Oh Yihuda, ne adianutemi nabo asangtsü; ne merir tekong nai lenettsü, nebu adianutemi ne madang apudaktsü.

⁹ Yihudabo molusongzü chanu ama. Kü chir nai shi ngusadak nungi atu, Molusongzü tetsü ka ama shibai pa mesotsü.

¹⁰Pai Shiloi maru tashi pa madang nüburtem tashi angabaji alitsü. Chuba mechiji Yihuda nungi mepilatsü, mesüra yimsüsüba ajokji pa tetsüng tsüngda nungi mepilatsü.

¹¹Tsükmenatzü tezü nung pei gado sentaka pai yi nung pei süoshi shitok, pei sobutsü tsükmenatzü azü nung shitoker.

¹²Pa tenükji yi ama temerem, pa tebu mamatzü danga temesüngba.

¹³Zebulun tzüyim küm nung alitsü. Pa tzüküm nung rong tulu ayudak asütsü. Pa litsü Sidon tashi alitsü.

¹⁴“Issakar tashi tait gado ka, san taktang ana yongtsü nung mejangba.

¹⁵Kodang pai anisüngzükdak tajung ka aser alima tajung ka angu, khu abentsü pai pei tapubang tendaktsü, aser tashiyim agi inyakdak pa alar aküm.

¹⁶Israel kidongren rongnung kin ka ama, Dani pei nübur o bendangtsü.

¹⁷Dan lendang per ka ama lenmang tezülen mim aketba per, pai kor tetsüng nung meji nung angji asanger tesülen tsüktsü.

¹⁸Oh KIBUBA, ne tekümzükba asoshi ni atar.

¹⁹Gadbo yimaker telok kati amaktsü, saka pai parnok shibalang nung lepa arishitsü.

²⁰“Asher asoshibo pa chiyungtsüji temo alitsü. Pai chuba asoshi tetemsü chiyungtsü yanglutettsü.

²¹Naftali süngdong tobur tajung ama, pa kongsang tobur junga mesangshitsü.

²²“Yosefbo tetangdong kongsang Pa kongsangtemji jara ajak mesangbanger.

²³Pa tsükchirtemi pa kanga arishi, parnoki lijak yoka pa jeta rishikangshi.

²⁴Aji saka pa lijak tashi ita liasü. Ajak Takoksang Yakober tashi agi. Israel Lung, Israel Sannüker tashi agi pa teben tashi ita kümdaktsü.

²⁵Ibai nebu Tsüngrem shibai yarir. Temalen kotak temoatsü tzünglu, Ali telung nung aliba temoatsü, Mama temoatsü, tetsüi asoba temoatsü. Item ajak temoatsü agi Ajak Takoksangi na moajangma.

²⁶Nebu temoatsütem, marakzüi aliba tashi tait tenemtem ama, Yosef pei adianutem dang nungi balaka bendanga ayusang kolak madak item temoatsütem tatem makai lidakjang.

²⁷Benjaminbo tesashi tsünü ama anepdang tepsetba pai shisa-a achitsü. Nikongtsütsü temakzükba oset alemtsü.”

²⁸Itemji Israel kidong terana, parnok shia pei dak alangba temoatsü balala agi moatsü dang tebui parnok dang ashiba o lir.

²⁹Idangji Yakobi pei chirtem dang ajang ajanga ashi, “Jokorla ni pei pur den külemi alitsü odi. Het nunger Efron alushi nung aliba leprungki nung alemli kübu nunger den nia remjangma.

³⁰ Iba leprungkiji Kanan lima nung Mamre madang aliba Makpela alupu nung alushi den külemi leper asoshi Abrahami Het nunger Efron dang nungi alizük.

³¹ Idakji parnoki Abraham aser tebutsü Sarah arem, aser Isak o Rebeka na arem, aser Lea ni idakji arem.

³²Leprungki aser alushiji Het nunger dang ali. Nia idakji remangma.”

³³Aji oda Yakobi pei chirtem den item jembimar külen, pei tetsüng yipten manung ayu aser asü, aser pei pur den aden.