Read njo LIPOK 50 Bible Online

LIPOK 50 - njo bible

LIPOK 50

¹Idangji Yosefi tebu dak jiloker jeba tebang mesep.

²Aser pai tebu mang teronem menemba tamashitsü mozü agi mezüjang ta pei kübok alir mozü shitetertem dang ashi. Anungji parnoki yamaji inyak.

³Aser anogo lirnü tashi agia Yakob temangji mashitsüsa mozüji mezütsü. Aser Ijip nungeri pa asoshi anogo neternü tashi mang ayim.

⁴Kodang pa asoshi mangyimba lepkhuji abensa, Yosefi Farao tenzüker dang ashi, “Yimlibilema iba o Farao dang shiang.

⁵ Kodang kübu asütsü mapang atong, pai kü nem azüngashidakja ashi, ‘Ni tasütsü mapang atonger, Kanan nung ni koba leper yanglu, idakji nai ni aremtsüla.’ Anungji yimlibilema ni kübu aremi aotsü aser tanaben meyipa arutsü mela-angma ta ni ne dang mepishir.”

⁶Faraoi langzü, “Nebui ne nem azüngashidaktsüba ama oang aser nebu remang.”

⁷Anungji Yosefi tebu aremtsü ao. Ijip nunger Farao tongtipurtem aser bangdak alir tambur aika Yosef sülen anitak.

⁸Iba dak alaka, Yosef kinungertem, pa adianutem aser tebu kinunger ajak, oda tanurtem, san, nabong aser nashi dang Goshen lima nung toktsür parnok ajak ao.

⁹Kor talungtsü, kor nung amenertem jenti pa den ao, aser ibaji telok tulu ka liasü.

¹⁰Kodang parnoki Yordan külen Atad motsüngnem atong, parnoki kanga tashi agi aser kukua mangyima ajeb. Yosefi mangyimba anogo tenet tashi amung.

¹¹Kodang Kanan nungeri Atad motsüngnem nung nisungtem jebtepbaji angu, parnoki ashi, “Ijip nungeri idaki kanga mangyima jepteber. Anungji Yordan külen aliba dangji Abel-Mizraim[38] aja.”

¹²Aji oda Yakobi pei chirtem dang ashiba ama parnoki inyak.

¹³ Parnoki pa temangji Kanan limai bener oa Abrahami Het nunger Efron dang leper asoshi aliba alu Mamre anüdoklen Makpela nung arem.

¹⁴Tebu mang rema yutsür külen Yosef aser pa adianutem aser parnok den aor ajak Ijip limai meyipa shilang.

¹⁵Tebu süadok nung Yosef adianutemi yamai jembitep, “Yosefi asen mapa tamajung asoshi tayang küpzükdi süra koda asütsü?”

¹⁶Anungji parnoki Yosef dangi iba o ya shiok, “Nebui pa masüdang onok dang yamai ashi,

¹⁷‘Nenoki Yosef dang yamai shiang, nedi nungeri na anema aibelenba mapa ajak nungi yimlibilema tai tokangma.’ Kechiaser parnoki ne dang tai inyakogo. Anungji onoki tang ya mepishir, nai pei tebu Tsüngrem kilirtem taiji tokangma.” Kodang parnok o ya Yosefi angashi, pai ajeb.

¹⁸Idangji tedi nungertem arur pa madang apudaka ashi, “Ajiang onok ne kilirtem lir.”

¹⁹Yosefi parnok dang ashi, “Tetsübuma. Ni Tsüngrem menden nung ali asü?

²⁰Nenokibo ni anema tamajung inyaka liasü, saka tanü nenoki anguba amaji Tsüngremibo nisung jenti taküm lidaktsütsü asoshi tajung inyaka liasü.

²¹Anungji nenoki tangbo tetsübuma. Ni nenok aser nenok chirnurtem mesütsü.” Yamaji pai parnok dang temeim agi o tajung jembia parnok mulung süngzükdaktsü.

²²Yamaji Yosef aser tebu kinungertem Ijip nung ali, aser Yosef arishi küm noklang ka ser ter ali.

²³Aser pai Efraim chir putu asembuba tashi angu. Ano Manase chir Makir chirtema Yosef tsüngdang aso.

²⁴Idangji Yosefi pei adianutem dang ashi, “Ni tasütsü mapang tonga aruogo. Saka Tsüngremi nenok atangji yaritsü, aser pai Abraham, Isak aser Yakob dang nangzükba limai nenok anir aotsü.”

²⁵ Idangji Yosefi Israel chirtem dang azüngashidaktsü, aser ashi, “Tsüngremi atangji nenok bilemtettsü, idangji nenoki kü teret iba lima nungi bener aotsüla.”

²⁶Aji oda Yosef arishi küm noklang ka ser ter lir Ijip nung asü. Aser parnoki pa temang shia maotsü asoshi teronem menemba mozü mezütsü aser lep nung shibanger Ijip lima nung ayu.