Read njo LIPOK 6 Bible Online

LIPOK 6 - njo bible

LIPOK 6

¹ Kodang alima nung meimchir soyapokyatsü tenzük, aser jalanulatem parnok nem sotsü,

²Tsüngrem chirtemi nisung jalatem tobur junga angu, anungji parnoki aginübatem parnok kinungtsü asütsü agi.

³Idangji KIBUBAi ashi, “Kü nelai nisung den teti rara-a malitsü, kechiaser parnok shi nung dang. Tang nungi parnok arishi küm noklang ka ser metsü dang alitsü.”

⁴ Item anogo nungji alima nung aso tulu nisungtem[5] liasü, aji ser külena Tsüngrem chirtemi nisung jalanulatem den medema, parnok nem chirnurtem sotsü. Parnokji alemli nungi nokinketertem aser shiratem liasü.

⁵ Kodang meimchiri tekülak tamajung mapatem inyakba aser parnok mulung nung teti tamajung dang bilemer ta KIBUBAi angu,

⁶pai alima nung meimchir yangluba atema jashi aser pa temulung mepelai aküm.

⁷Anungji pai ashi, “Meimchir shiba ni yanglu, parnok den ayazüba shirurutem aser ozütem ajak ni samatsütsü, kechiaser parnok yangluba atema ni jashir.”

⁸Saka KIBUBA madang Noai taochi angu.

⁹ Noa putu itemi: Noa par putu nung ochishir aser tai makaba nisung ka liasü. Pai Tsüngrem den jaja.

¹⁰Noa nungi jabaso asem jakzük: Shem, Ham aser Yafet.

¹¹Tang Tsüngrem madang alima temenen aser teka yitepba agi sünga liasü.

¹²Aser Tsüngremi alimaji reprang aser ibaji teraksa aser memeshi liasü; alima nung meimchir ajakji temenen yimya nung aliba pai angu.

¹³Tsüngremi Noa dang ashi, “Meimchir ajak tatem küma meshimeshia samatsütsü ni lemtetogo, kechiaser parnoki alimaji azü tokshiba agi süngtsüogo aser ajiang alima den parnokji ni samatsütsü.

¹⁴Nai gofer süng agi rong ka na asoshi yangluang, aser iba nungji taktang taktang enokang; iba telunglen aser temalen temenateptsü agi nübangang.

¹⁵Nai aji yamai yangluang: metong nung süklep noklang asem, lenten nung süklep tenem aser touchi nung süklep semer.

¹⁶Rong nungji kichiba ka yangluang, aji temalen süklep ka tashi yangluang, aser nai rong kishiji iba temalenji yangluang, aser nai aji teküpoklen, tanabuba aser tasembuba taktang keta yangluang.

¹⁷Kechiaser ni alima dangi tzümetsüng yoka taküm ajak samatsütsü. Alima nung aliba taküm ajak asütsü.

¹⁸Saka ni ne den tezüngzüktepba ka yanglutsü. Na aser ne kinungtsü, ne jabasotem aser parnok kinungtsütem rong jagi tuang.

¹⁹Aser taküm aliba shiruru ajak nungi tapu shia anana parnok taküm alitsüsa rong jagi anir iang, parnok tepung o tetsü na alitsüla.

²⁰Ozütem tapu shia, shirurutem tapu shia, aser alima nung ayazüba tapu shia parnok taküm litettsüsa tapu shia anana ne dangi arutsü.

²¹Ano nai tachitsü asoshi chiyungtsü tapu ajak bendena yuang aser aji na aser parnok asoshi chiyungtsü alitsü.”

²² Aser Tsüngremi melaba ajak Noai inyak.