Read njo LIPOK 7 Bible Online

LIPOK 7 - njo bible

LIPOK 7

¹KIBUBAi Noa dang ashi, “Ner kinunger ajak rongi tuang, kechiaser iba putu nung na dang temeshi ta ni nguogo.

²Temeshi shiruru shia nungi atsü-apung tenetnet kümdanga nai agiang. Saka memeshiba shiruru shia nungi atsü-apong ka ka dang agiang.

³Ozütem nungia atsü-apung tenetnet alima ajak nung taküm lidaktsütsü asoshi agiang.

⁴Kechiaser anogo tenetnü lir ni alima nung anogo lirnü aser lir aonung tzünglu arudaktsütsü, aser alima nung ni yangluba taküm ajak samatsütsü.”

⁵KIBUBAi pa dang melaba ama Noai ajak inyak.

⁶Alima nung tzümetsüng arudang Noa küm noklang trok tain liasü.

⁷ Tzümetsüng nungi jenbutsü asoshi Noa aser tebutsü, par jabaso aser parnok kinungtsürtem rongi ai.

⁸Temeshi shiruru aser memeshiba shiruru nungi atsü-apong aser ozütem rongnungi atsü-apung parnok tapu tabensa anana,

⁹aser ali nung ayazüba shiruru ajak Tsüngremi melaba ama Noa den rongi ai.

¹⁰Anogo tenetnü lir alimai tzümetsüng aru.

¹¹ Noa arishi küm noklang trokbuba ita tanabuba anogo ter-tenetbuba nung tzüpokdak tulutem ajak rakpok, aser anüng kichiba lapok.

¹²Aser alima nung lirnü aser lir aonung tzüngluji aru.

¹³Panüjisa Noa aser tebutsü, par jabaso asem: Shem, Ham aser Yafet, aser parnok kinungtsürtem rongi atu.

¹⁴Parnok den shiruru ajak tapu shia, kiset aser arem shiruru tulu aser tila, aser ali nung ayazüba ajak tapu shia, aser ozü ajak tapu shia;

¹⁵tetsü aser tepung taküm tangula aliba shiruru ajak Noa den rongi ai.

¹⁶Tsüngremi melaba ama shi ajak nungi tetsü o tepung na atu, aser KIBUBAi Noa sülen kishiji shibang.

¹⁷Tzümetsüngji alima nung anogo lirnü liasü, aser rongji ali nungi ajungketa temaleni punga atutsüsa tzüji tali aküm.

¹⁸Tzüji kanga tali aküm nung rongji iba manung pungdak.

¹⁹Tzüji kanga tali aküm aser anüng kübok tenem talangtem ajak metsüngbang.

²⁰Tenem talangtem nungi temaleni süklep terpungu tashi tzüji metsünga atu.

²¹Alima nung taküm aliba ajak, ozütem ajak, shirurutem ajak aser nisung ajak asü.

²²Alima nung taküm tangula sashiba ajak asü.

²³Alima nung taküm aliba ajak, meimchir, shiruru aser ozütem samadok; saka Noa aser pa den rong nung aliba dang kümzük.

²⁴Aser tzüji alima nung anogo noklang ka ser tenem tashi metsüngbanga liasü.