Read njo LIPOK 8 Bible Online

LIPOK 8 - njo bible

LIPOK 8

¹Saka Tsüngremi Noa aser pa den rong nung aliba shiruru ajak mamai liasü, aser alima nung mopung ka süidakja tzüji aremdaktsü.

²Tzüpokdak tarok ajak aser anüng kichibatem shibanga tzünglu sot.

³Anogo noklang ka ser tenem nung tzüji alima nung aremadok,

⁴aser ita tenetbuba anogo tertenetbuba nung rongji Ararat tenem nung anen.

⁵Tzüji maneni aremadok aser ita terbuba anogo mezüngbuba nung tenem kolak ngua aküm.

⁶Anogo lirnü lir Noai rong kichiba lapoker,

⁷waro ka yok, aser alima nung tzüji makong tashi waroji oli aruli ta yimzü.

⁸Ano alijak nung tzüji arem asü marem metettsü asoshi Noai posü ka yok,

⁹saka alima ajak nung tzü sünga aliba agi posüji tatemdak maka rongi tanaben meyipa aru, aser Noai teka songtoka aji aniok.

¹⁰Noai ano anogo tenetnü ata-a liasü aser pai posüji tanaben yok.

¹¹Nikongtsütsü posü jagi tebang nung oliv süngo ka mechizüka bener aru. Anungji alima nung tzüji aremogo ta Noai metet.

¹²Ano Noai anogo tenet lir posüjisa yok aser aji joko pa dangi meyipa maru.

¹³Noa küm noklang trok ser ka buba mezüng ita mezüngbuba anogo nung tzüji alima nung kongadok. Noai rong nembangbaji lapoka alimaji ajidang, aser aji takong liasü.

¹⁴Ita tanabuba anogo metsür tenetbuba nung alimaji takong liasü.

¹⁵Tsüngremi Noa dang ashi,

¹⁶“Na aser nebutsü, ner jabasotem aser parnok kinungtsürtem rong nungi adokang.

¹⁷Ozütem aser shirurutem ajak rong nungi adokdakjang, aser parnok jenti rena alimaji süngdakjang.”

¹⁸Anungji Noa, tebutsü, par jabasotem aser parnok kinungtsürtem rong nungi adok.

¹⁹Shiruru ajak, taküm aliba ayazübatem ajak aser ozü pei pei tapu shia rong nungi adok.

²⁰Noai KIBUBA atema tenladak ka yanglu aser tekülem asoshi temeshi ozü shia nungi aser shiruru shia nungi ka ka agiteta item ajakji tarongba tenladak sabang nung arong.

²¹KIBUBAi tenla teronemji agizük aser pei sasa ashi, “Ni meimchir mapa asoshi alimaji tanaben atakatem masütsü; kechiaser lanuwa nungi parnoki shisadangbatem tamajung dang lir, aser alima nung taküm aliba ajak ni tang samatsüba ama parnok mesamatsütsü.

²²Alima ali tashi metsü mapang aser aluruwa, asükwa aser lemluwa aser tsüngkhüm mapang, anüngdang aser aonung maneni alitsü.”