Read njo LIPOK 9 Bible Online

LIPOK 9 - njo bible

LIPOK 9

¹ Tsüngremi Noa aser par chirtem moaja ashi, “Tejang tanga jenti renang aser alimaji süngdakjang.

²Alima nung aliba taküm shiruru ajak madak, anüng ozü madak, aser tzüyim ango ajak madak na tsübuba alitsü. Parnokji ne ket nung nungloka yutsür.

³Ni ne nem süngo-lio tajem agütsüba ama arakzüa taküm aliba ajakji na asoshi chiyungtsü asütsü item ajakji ni ne nem agütsür.

⁴ Saka shi den iba zü koba nung taküm lir, iba ya nenoki techi.

⁵Kari nisung zü tokshira, ni pa nungi ibaji meyipa akhangtsü. Shiruru süaka nisung süaka shibai nisung zü tokshidir, ni parnok tasüba agi merenshitsü.”

⁶Shirisa nisung zü tokshidir, nisung agisa pa zü tokshitsü, kechiaser Tsüngrem mesükba nung pai nisung yanglu.

⁷“Nenoki jenti rena soyapokya-ang aser alimaji süngdakjang.”

⁸Tsüngremi Noa aser par chirtem dang ashi,

⁹“Ajiang nenok den aser nenok sülen nenok metsü den ni tezüngzüktepba ayur,

¹⁰aser ne den taküm shiruru ajak, ozü aser shiruru ajak ne den rong nungi adoker ajak den ni ya ayur.

¹¹Ni nenok den tezüngzüktepba yamai yanglur: Ni kodanga tzümetsüng yoka taküm shirurutem mesamatsütsü, ni alimaji tanaben tzümetsüng agi mesamatsütsü.”

¹²Tsüngremi ashi, “Ni aser nenok aser taküm aliba shiruru ajak den tatem maka putu tashi kü tezüngzüktepba temaitsüji ya:

¹³ni mepet nung kü tongnüsen yutsür. Ibai ni o alima na tsüngda tezüngzüktepba temaitsü alitsü.

¹⁴Kodangsa ni mepet agi anüngji sübanger aser tongnüsenji ngudir,

¹⁵aser kü tezüngzüktepba koba ni o na aser taküm aliba shiruru ajak tsüngda nung lir, aji ni bilemtettsü, aser tzümetsüng agi kodanga ni taküm aliba ajakji mesamatsütsü.

¹⁶Kodang tongnüsenji mepet nung adokdir, ni aji angutsü aser tatem maka tezüngzüktepba koba Tsüngrem aser alima nung taküm aliba ajak den lir, aji ni bilemtettsü.

¹⁷Ibaji ni o taküm aliba ajak tsüngdang tezüngzüktepba temaitsü alitsü.”

¹⁸Noa chirtem shir rong nungi adok parnokji: Shem, Ham aser Yafet. Hamji Kanan tebu liasü.

¹⁹Parnok asemji Noa chirtem aser par asem ajanga alima ajonga meimchir agi süngdaktsü.

²⁰Noa aluyimer mezüngbuba küma tsükmenatzü lu ayimtsü tenzük;

²¹kodang pai iba yi ajem, pa mesepadok aser pei süki nung mangsa ontaka liasü.

²²Kodang Kanan tebu Hami pei tebu mangsa aliba angu, pai oa pei adianu ana dang ashi.

²³Aser Shem o Yafet nati sü ka bener arua parnok tapubang nung aji jeploker; tesüleni jajaa oa parnok tebu mangsa alibaji nembangtsü, aser parnok tejak tesülen shir alinung pei tebu mangsa alibaji mangu.

²⁴Kodang Noa yi mesepba nungi sak, aser par chir tanubusangi pa dak inyakba meteta aru,

²⁵pai ashi, “Kanan dak atakatem kaoang! Pa pei adianutem lar asütsü,”

²⁶Ano pai ashi, “Kü Tsüngrem KIBUBAi Shem moajang. Aser Kananji Shem lar sang.

²⁷Tsüngremi Yafet ulujang. Pa Shem süki nung lidakjang; aser Kanan par lar sang.”

²⁸Tzümetsüng süir külen Noa küm noklang asem ser tenem liasü,

²⁹pa arishi küm noklang tuku ser tenem liasü aser pa asü.