Read njo 2 SAMUEL 1 Bible Online

2 SAMUEL 1 - njo bible

2 SAMUEL 1

¹Saul sür külen, kodang Dawidi Amalek nunger kokteter meyipa aru, Ziklag nung pai ananü ali.

²Aser tasemnü, ajiang, nisung ka pei süoshi shisar, pa kolak nung ali mezür, Saul anendak nungi aru. Aser kodang Pa Dawid dangi aru, pai ali nung apudaka akhüm tsübu sayu.

³Dawidi pa dang asüngdang, “Na kong nungi aru?” Pai langzü, “Ni Israel temeranger telok nungi jentet.”

⁴Dawidi pa dang ashi, “Kodasa odar shiangjo.” Aser pai langzü, “Tongbang jia nisungtem jenshiogo, aser nisung aika laoa süogo; Saul aser par jabaso Yonathan süogo.”

⁵Idangji pa den jembiba asangur dangji Dawidi ashi, “Saul aser par jabaso Yonathan asü ta nai koda metet?”

⁶ Aser pa dang ashisang asangur jagi langzü, “Tia agi ni Gilboa tenem nung lishia ata, aser yangji Saul pei nü nung metaloka liasü; aser ajiang, talungtsütem aser kor nung amenertem pa anasa liasü.

⁷Aser pai pa sülen reprangdang pai ni ngua aja. Aser ni langzü, ‘Ni yangi lir.’

⁸Aser pai kü dang ashi, ‘Na shiba?’ Ni pa dang langzü, ‘Ni Amalek nunger.’

⁹Idangji pai kü dang ashi, ‘Yagi arung aser ni tepsetang, kechiaser ni kanga mejungi yiruogo aser tasür lir.’

¹⁰Anungji ni pa anasa noktak, aser pa tepset, kechiaser pa laor külenbo pa asütsü ta ni metet; aser pa tekolak nung aliba chuba korang aser pa teben nung aliba kap ni bena aru, aser ni itemji yangi kü kibur dangi bener arua lir.”

¹¹Idangji Dawidi pei süoshi dak amet, aser itemji shisa; aser yamaji pa den alir ajaki inyak.

¹²Parnoki mang ayim aser ajeb aser Saul aser par jabaso Yonathan aser KIBUBA nüburtem asoshi aser Israel kidong asoshi aonung tashi lumi, kechiaser nok agi parnok lao.

¹³Pa dang ashisang asanguba dangji Dawidi ashi, “Na kong nungi aru?” Pai langzü, “Ni aener ka chir, Amalek nunger lir.”

¹⁴Dawidi pa dang ashi, KIBUBAi shimtetba samatsütsü asoshi ne ket aitsü kodaser nai metsübui liasü?

¹⁵Aser Dawidi asangur rongnung ka jar ashi, “Oang, aser pa laodakjang.” Aser pai pa dak azük nung pa asü.

¹⁶Kechiaser Dawidi pa dang ashi, “Ne zü ne kolak manungsa benang; kechiyong ne bang agi na anema kuli agüja ashi, Ni KIBUBAi shimtetba tepsetogo.”

¹⁷Saul aser pa jabaso Yonathan madak iba aiatai ken agi Dawidi asüku ken aten.

¹⁸ Ibai Yihuda nunger dang sayutsüla ta pai ashi; ajiang, ibai Yasher Kaket nung zülua lir.

¹⁹“Oh, Israel, ne sentsüwangshi, ne temaba tesemtem nung tepseta lir! Tashi tulurtem koda laoa lir!

²⁰Gat nung aji teshi Ashkelon yimdong nung aji tesangdong; Filistia nunger jalatem pelatepa lir, memejeptoker jalatemi washilokja lir, Gat nung aji teshi, Ashkelon yimdong nung aji tesangdong.

²¹“Nenok Gilboa tenemtem, ne madak azüngtzü mesüra tzünglu taludaktsü mesüra iba liji tabung lidakjang. Kechiyong yangji nokinketer jong menentsü, Saul jong, totzü agi memezütsü.

²²Tetepseter zü nungi, tashi tulur temo nungi Yonathan lijak meyipa maru, Aser Saul nok tazüng meyipa maru.

²³“Saul aser Yonathan, tena temeimtep aser tobur ajung, taküm nung aser tasü nunga tena mepila; mongzü dang nungi tena tekaraba liasü, molusongzü dang nungi parnok tashi taitba liasü.

²⁴“Nenok Israel jalatem, Saul asoshi jebang. Shibai nenok meraketa jakjaa meremba sü agi abendaktsü, shibai nenok süoshi nung hon yangloktsü.

²⁵“Tongbang tiyong nung nokinketertem koda laoa lir! Yonathan ne temaba menden nung tepseta lir.

²⁶“Ni na asoshi asükua lir, kü adianu Yonathan; kü madang pa kanga jangratemtsü liasü; kü dang ne temeim tesüngmangtsüka liasü. Tetsür temeim dang nungia taoba.

²⁷“Tashi tulurtem koda laoa lir, aser rara nok o nütem sama-a lir!”