Read njo 2 SAMUEL 12 Bible Online

2 SAMUEL 12 - njo bible

2 SAMUEL 12

¹ KIBUBAi Nathan ainkar Dawid dangi yok. Aser pa dangi Nathan arua ashi, “Yimti ka nung nisung ana liasü; ka takar aser kaji sensaker.

²Takar nisungji san aser nashi telok jenti liasü;

³saka sensaker nisungji san tsüla chanu ka, koba pai alia mesütet, iba dak alaka kecha maliasü; ibaji pa den külemi aser par chirtem den yintet; iba jagi pa pei chiyungtsü nungi achi, aser pa pei marok nungi ajem, aser pai teku nung mangadaka liasü, aser pa madang jala ka amai liasü.

⁴Aser takar nisung dang jagi aener ka aru, saka pai pei san telok mesüra nashi telok nungi, pa dangi aruba aener asoshi magi, saka sensakersang meyongji agi, aser pa dangi aruba nisung asoshi aji renemtsü.”

⁵Nisungba anemaji Dawid ain kanga adok, aser pai Nathan dang ashi, “KIBUBA tenüng atemer shidi, iba inyakba nisungji tasütsü tetemsü;

⁶aser pai san chanuji pezüsü meyipa agütsütsüla, kechiaser pai ya inyak aser pai taochi mesayu.”

⁷Nathani Dawid dang ashi, “Nisungbaji na lir.” Yamai KIBUBA Israel Tsüngremi ashir, “Ni na Israel madak chuba asütsü mezüja shimtet, aser ni na Saul ket nungi kümzük;

⁸aser ni ne nem ne kibur ki agütsü, aser ne teku nung ne kibur kinungtsütem agütsü, aser ne nem Israel aser Yihuda ki agütsü, aser aji tera dang asübo, ni ne nem item dang tali bendenloktsür lila.

⁹Kechiba nai KIBUBA tsüngdang koba tamajung aji inyaktsü pa o sensatsü? Nai Het nunger Uria nok agi tepsetogo, aser tebutsü ne kinungtsü asütsü agi, aser pa Ammon chirtem nok agi tepset.

¹⁰Tang aji asünung, ne kidang nungi nok kodanga mepilatsü; kechiaser nai ni sensatsü, aser Het nunger Uria kibutsü ne kibutsü asütsü agi.

¹¹ Yamai KIBUBAi ashir, Ajiang ni ne kidang nungi na anema tamajung adokdaktsütsü, aser ne nükdang nungi ni ne kibutsütem agitsü, aser parnok ne kiyonger nem agütsütsü, aser pai ne kibutsütem den anü matsüngdang mejangtsü.

¹²Kechiyong nai aji miima inyak, saka ibai ni Israel ajak madang aser anü madang inyaktsü.”

¹³Dawidi Nathan dang ashi, “Ni KIBUBA anema tai menaogo.” Nathani Dawid dang ashi, “KIBUBAi ne menen endoktsüogo; na masütsü.

¹⁴Aji saka, iba mapa yong nai KIBUBA tsükchirtem nem atalatsütsü mapang tulu agütsüogo, ne nem sotsüba tanurji atangji asütsü.”

¹⁵Aser Nathan pei kidangi meyipa ao. Aser KIBUBAi Uria kibutsüi Dawid nem sotsüba dak azük, aser pa kanga shiranga aküm.

¹⁶Aser tanur asoshiji Dawidi Tsüngrem dang kanga mepishi; aser Dawidi lumi, aser taktangi ai, aser ammang piyong ali nung ondaka ali.

¹⁷Aser par kidang tamburtemi aramesoa pa ali nungi pa mesotsü noktak; saka pai meshishi, mesüra parnok den mechiyung.

¹⁸Tang tenetnübuba nung tanurji asü. Aser Dawid kilirtemi tanurji süogo ta pa dang ashitsü tsübua liasü, kechiyong parnoki ashi, “Ajiang, tanurji ano taküm alidang asenoki pa den jembi, saka pai asenok ola manga, ajangla asenoki tanurji süogo ta pa dang shira, pai pei sasa dak tamajung kar meinyakli ma?”

¹⁹Kodang Dawidi pa kilirtem tanemi jembitepa angashi, pai tanurji süogo ta shitet: aser pai pei kilirtem dang ashi, “Tanurji sür asü” Aser parnoki langzü, “Pa süogo.”

²⁰Idangji Dawid ali nungi arameso, aser tzü chigur pa sasa totzü mezür, süoshi melen aser KIBUBA kidangi arua külem. Ajiser pai pei kidangi aru; aser chiyungtsü meshi aser parnoki aji pa madang yutsü aser pai achi.

²¹Aji saka pa kilirtemi pa dang ashi, “Nai inyakba ya kechi tetezü? Tanur taküm alidang nai pa asoshi lumi aser ajeb; saka kodang tanur asü, na shishia chiyungtsü achir?”

²²Pai ashi, “Kodang tanur ano taküm liasü, ni lumi aser ajeb, kechiyong ni asoshi KIBUBAi kü dang yimlibilem sayutsü aser tanurji masütsüa shibai metet?

²³Saka tangbo pa süogo, kechiba ni ajebtsü? Ni pa meyipa bener arutetdi ma? Ni pa dangi aotsü, saka paibo kü dangi meyipa marutsü.”

²⁴Dawidi pa kibutsü Bathsheba süngzükdaktsü, aser la dangi ia, la den mejang, aser lai jabaso ka aso, aser pai pa tenüng Solomon aja aser KIBUBAi pa meim.

²⁵Aser ainkar Nathan ket nung osang yok, aser pai pa tenüng Yedidia[4] ta aja, kechiyong KIBUBAi pa meim.

²⁶Tang Yoabi Ammon chirtem Rabba anema rara, aser chubar yimtiji agi.

²⁷Yoabi osang benertem Dawid dangi yoka ashi, “Ni Rabba anema raraogo,aser, ni tzü yimtiji agiogo.

²⁸Anungji tang tanüngba nisungtem külemi atenshidakjang, aser yimti anema arü menang, aser aji agiang, aji mesüra ni yimtiji agia, aji kü nüngten agi jaadoktsü.”

²⁹Anungji Dawidi nisung ajak atenshidaktsü, aser Rabbai oa iba anemaji rara, aser aji agi.

³⁰Pai chuba korangji Ammon nunger chuba Molek kolak nungi agi, aser iba odangbaji hon seret semer liasü, aser iba nungji senti lung liasü; aser aji Dawid kolak nung semoktsü. Aser pai yimti nungi makzükba osettem jenti bener aru.

³¹Yangji aliba nisungtem pai anir adok aser süngrangtsü, merang mejeptetba, merang po agi mapa inyakdaktsü, aser lungru yangludak inyaktsü yok. Yamajisa pai Ammon nunger yimti ajak dang inyakdaktsü. Idangji Dawid aser nisung ajak Yirusalemi shilang.